Nunatsinnut saassussinissamut inerteqquteqarnissamut amerikami Senatori siunnersuummik saqqummiussivoq

Senatori Ruben Gallego (D-AZ) aalajangiiffigisassatut siunnersuummik saqqummiussivoq aningaasat sorsunnermut, akerleriissuteqarnermut imaluunniit sorsunnissamut piareersarnermut Kalaallit Nunaannut atorneqarnissaat inerteqqutaassasoq.

Præsident Trumpimut nunatta tiguarnissaanut pilersaarutai pillugit akerliuneq annertusiartorpoq. Maanna siunnersuut saqqummiunneqarpoq Præsident Trumpip amerikamiut sakkutuui atorsinnaassanngikkai nunatta pigilernissaanut suliniutiminut atatillugu.

Foto: Kamil Krzaczynski/AFP/Ritzau Scanpix

Jensine Berthelsen Jensine Berthelsen Jensine Berthelsen Tusagassiortoq

Saqqummersinneqarpoq 9. Januaari 2026 - 15:22

Annonse

Senator Ruben Gallego (D-AZ) USA-mi senatimut maanna siunnersuummik saqqummiussivoq, siunertarineqarluni Kalaallit Nunaannut tunngatillugu sorsunnissamut, akeqqersimaarnermut imaluunniit sorsunnissamut piareersarnermut aningaasat atornissaat inerteqqutaassasoq.

Nunatsinnut saassussinissamut inerteqquteqarnissamut amerikami Senatori siunnersuummik saqqummiussivoq

Taama pisoqarpoq senatip illersornissamut aningaasaliissutaannut inatsimmut allannguutissatut siunnersuummik saqqummiussimmat.

Siunnersuummi siunertaasoq tassaavoq amerikamiut illersornissamut ministeriaqarfianut aningaasaliissutit allannguuteqartinneqassasut, ministeriaqarfik taanna Trumpip kingusinnerusukkut sorsunnermut ministeriaqarfittut atsernikuusaanut, ukiullu naatsorsuusiorfiup 30. september 2026-mut naanerata tungaanut atuuttussamut allanngortitsinikkkut.

"Trumpip amerikamiut innuttaasut allamut saasarpai"

- Ilaqutariit inuuniarnermikkut sakkortuumik erloqipput, ulluinnarni nioqqutissat akii qaffakkiartuinnarput taamatuttaaq ineqarnermut akiliutit qaffakkaluttuinnarlutik, tamakku pineranni aamma Trumpip aqqa Epsteinip allagaataani sumi tamaniippoq, Ruben Gallego oqarpoq nangillunilu:

- Ajornartorsiutit aaqqinniarlugit iliuuseqarnissaq pinnagu, Trumpip innuttaasut allamut saasarpai sorsunnernik aporaannernillu aallartitseqattaarluni nunanillu tiguartitseqattaarluni - siullermik Venezuelami, maannakkut NATO-mi suleqatitta Danmarkip tungaanut.

- Venezuelami pisut takutippaat Trumpip navianartorsiortitsineranut isiginninngitsuusaaginnarsinnaanngitsugut. Pissusilersuutai navianartut amerikamiut inuunerannik nunarsuarmilu tatigineqarnitsinnik navianartorsiortitsivoq.

- Aningaasaliissutinut allannguutissatut siunnersuut saqqummiuppara ersarissarniarlugu, Kongressi inatsisitigut tunngavissaqanngitsumik, pisariaqanngitsumik sorsunnersuarmik iliuuseqarnissamut aningaasaliissuteqassanngitsoq, aammalu Republikanerit toqqaasariaqalersinneqartariaqarmata, Trumpip aserorterineranut tapersersuisuussanersut imaluunniit akerliuniassanersut.

Allannguutissatut siunnersuut amerikami Senatimi suli suliarineqarpoq.