Nunatta kitaata imartaani plastikkinik mingutsitsineq misissuiffigineqartoq

Nunani tamalaani avatangiiseq pillugu suliniaqatigiiffik eXXpeditionimeersut, arnat aqqanillit, ilaatigut amerikamiut, tuluit, canadamiut, østrigimiut spaniamiullu juulip aqqaneq-aappaaniit nunatta kitaata sineriaata imartaani plastikkinik mingutsitsineq misissuiffigaat.

Ilisimasassarsiortut Ilulissaniit Qeqertarsuakkoorlutik aallartipput, Sisimiutigooriarlutik Nuummukassallutik.

Atortorissaarutit immap qanoq annertutigisumik plastikkeqassusaanik uuttuisinnaasut atorlugit immami plastinik mingutsitsinermik misissuineq ingerlanneqarpoq.

Ilisimatusaqatigiit kitaata sineriaani angalanerminni tikitaminni eqqagassanik aamma inuiaqatigiit eqqagassaqarnikkut qanoq suleriuseqarnersut sumiiffinni ilisimasaqartut peqatigalugit misissuiffigisarpaat.

- Issittumi angalaaraanni imaq nunalu attorneqarsimanngisaannartoq nassaasaavoq, ilisimatusarnerullu takutippaa immami nunallu sineriaani plastikinik eqqagassanik nassaassaqartoq. Sumiiffinnut avinngarusimasumiilluinnartunut mingutsitsinermik ajornartorsiutit pisarput, Emily Penn, eXXpedition-imik pilersitsisoq allappoq.  

Kingusinnerusukkut paasissutissat katersorsimasat saqqummiunneqassasut, avatangiiseq pillugu suliniaqatigiiffik eXXpedition ilisimatitsivoq.

Suliniaqatigiiffiup eXXpeditionip nunatsinni ilisimatusarnera ukiormanna nunani tamalaani sumiiffinni assigiinngitsuni ilisimatusarnerisa sisamassarisaat, University of Georgia suleqatigalugu aaqqissuunneqarpoq.

Uumap suliniutip assinganik apriilimi maajimilu New Zealandimiit Tongamut aamma misissuisimallutik, aaqqissuisut allapput