Nuuk nunani tamalaani ilinniartitsisut kattuffiinit tikeraarneqartoq

Ilinniartitsisut Meeqqat Atuarfianneersut Kattuffiat, IMAK, nunani allani ilinniartitsisut kattuffiinit ataatsimeersuariarnermut peqataajartortunik tikeraartoqarpoq.

Nunani tamalaani ilinniartitsisut nunatsinnik tapersersuinertik takutinniarlugu Inatsisartoqarfiup silataani Inatsisartuni ilaasortat peqatigalugit assilisittut. Allagartarsuaq 'Nunarsuarmi ilinniartitsisut Kalaallit Nunaat tapersersorpaat'-mik nutserneqarsimasoq, tigummineqartoq assimi takuneqarsinnaavoq.

Assi: Education international-ip facebookkimi quppernerani tigulaagaq.

Masauna Peary Masauna Peary Journalist

Saqqummersinneqarpoq 11. Juuni 2026 - 12:53

Nunani tamalaani ilinniartitsisut kattuffissuanni Education Internationalimi ilaasortat qulit, juunip arfineq pingajuanni qulingiluaannilu, Nuummi IMAK-ip aaqqissuussaanut ataatsimeersuarnermut peqataajartorlutik tikeraarput.

- Nunarsuatsinni ilinniartitsisut kattuffippassui, aatsaat taama amerlatigalutik, Kalaallit Nunaannukarlutik, IMAK-imut tikeraarnissaat kattuffiup tulluusimaarutigeqaa, IMAK allappoq.

Kalaallit Nunaat nunamit pissaanilissuarmit tatisimaneqartoq siorasaarneqartuartorlu nunani tamalaani ilinniartitsisut kattuffissuisa arajutsinngilaat.

Ussassaarut

Nunatsinnut tapersersuisut

NUNAT PEQATAASUT

Hawaii
Mexico
USA
Canada
Island
Færøerne
Danmark
Sverige
Norge
Irland

Najoqqutaq: IMAK.gl

Ataatsimeersuartut nunatsinnik tapersersuinertik ersersinniarlugu Inatsisartut ataatsimiittarfiata silataani marlunngornermi juunip qulingiluaani takutitsipput.

- Nunat assigiinngitsut akornanni peqatigiilluta nikisinneqarsinnaanatalu Kalaallit Nunaannik tapersersuinerput takutipparput, ilinniartitsisut kattuffissui allapput.

Oqaluuserineqartut allat

Ataatsimeersuarnermi anguniakkat pingaarutillit arlallit eqqartorneqarput.

Ilinniartitsisut kattuffii Nuummi Hotel Hans Egede-mi ulluni marlunni ataatsimeersuarput.

Ataatsimeersuarnermi qulequttat sammineqartut tassaapput: Ilinniartitsisunut politikki, kattuffittut isumaqatiginninniartarnerit, sullivinni avatangiisitigut atukkat, ilinniartitsisut ilitsoqqussaralugu oqaatsiminnik atuartitsinerminni atuisinnaanerat aamma atuartunut angujuminaatsutut inissisimasinnaasut atugaannik immikkut ukkatarinninneq.