Nuuk tamarmi innaallagiaaruttoq – ajoqut paasineqartoq

Nuuk pingasunngornermi ullaakkut innaallagiaaruppoq.

Taama Nukissiorfiit Facebookimi quppernerminni allapput.

Nukissiorfiit ajoqutaasup aaqqinnissaa sulissutigaat.

Innaallagiaaruttoqarnerani suna pissutaanersoq suli paasineqanngilaq.

Tusass qamittoorneq pissutaalluni mobilikkut attaveqarnerit ilaat sunnerneqarsinnaasut allappoq.

- Mobilnetimut attaveqarniarnikkut ajornartorsiuteqaruit, mobilinni flytilstand ikiguk qamillugulu. Ajornartorsiut ingerlaannarpat, telefonip aallaarteqqinnissaa iluaqutaasinnaavoq, Tusassimiit allapput.

Kalaallit Nunaanni Politiit innaallagiaarunneq pillugu oqaaseqarsinnaanngillat. Ajornartoornermi sarfalersuuteqarlutik, nalinginnaasumillu sulillutik Sermitsiamut paasissutissiissutigaat.

Nuup mittarfiani ajornartoornermi aamma sarfalersuuteqarput, sarfaaruttoortoqaraluartorlu sulineq nalinginnaasumik aamma ingerlaannartoq, Greenland Airportsimiit Sermitsiamut paasissutissiipput.

Ajoqut paasigaat

Nukissiorfiit ajoqut nassaarineqartoq Facebookkimi quppernerminni nal. 09.37 allapput.

- Nukissiorfiit ajoqut nassaarivaat. Piffiit tulleriiaarlugit ikititerneqalissapput.

- Naatsorsuutigineqarpoq illoqarfik tamarmi akunnerit marluk iluanni innaallagissamik pilersorneqaqqilernissaa.

Nutarterpoq.