ULLORMUT NALUNAARUSIAQ
Nuummi mittarfimmi marloriarluni hashimik nassaartoqartoq
Politiit nunatsinni assigiinngitsunik suliaqarput, ilaatigut Nuussuarmi nakuusernermik, Nuummi mittarfimmi ikiaroornartunik marlunnik kiisalu Qaanaami Uummannamilu tillinniarnernik.
Kalaallit Nunaanni Politiit nalunaarutit misissuiffigaat.
Assi: Oscar Scott Carl
Politiit Nuup illoqarfiata ilaani, Nuussuarmi, nakuusertoqarneranik marlunngormat unnukkut nalunaaqutaq 21.03 kalerrinneqarput.
Angut politiininngaanneernerarluni kasuttorsimavoq, najugaqartullu ammaammagu nakuuserfigisimagaa.
Politiiniit Aputsiaq Hansen oqarpoq.
Politiit ornigupput pasisarlu, angut inersimasoq, tigusaralugu. Nakuusersimasutut unnerluutigineqarpoq, killisiorneqareernalli ulorianartorsiortitsinngitsutut politiit nalilermassuk iperagaavoq.
Innuttaasut assingusumik pisoqartillugu politiinut saaffiginneqqullugit kajumissaarneqarput, erseqqissarlugulu politiinit kasuttorfigineqartillutik qulakkeerniarlugu sianeqqaartarsinnaasut.
Nuummi mittarfimmi hashi annertuumik nassaartoqartoq
Ilanngaaserisut Danmarkimit Nuummut timmisartumik marlunngormat tikittut marluk hashimik nassaarfigaat.
Pisumi siullermi ilanngaaserisut hashi 492 grammi taskemi nassaaraat. Politiit aggersarneqarput, pasisaasoq tigusarineqarpoq kingusinnerusukkullu unnerluutigineqarluni, kingornali iperagaavoq.
Ulloq taanna kingusinnerusukkut nalunaaqutaq 13.24 politiit timmisartoqarfimmut aggersarneqaqqipput, tassani ilanngaaserisut angalasup allap nassataani hashimik annertuumik nassaarput. Pasineqartoq tigusarineqarpoq, suliarlu suli misissorneqarpoq. Pasineqartoq eqqartuussivimmut sassartinneqaqqaartussaammat haship annertussusaa saqqummiunneqarsinnaanngikkallartoq, politiit paasissutissiipput.
Qaanaami tillinniartoqartoq
Politiit Qaanaami Pilersuisup quersuaanut tillinniartoqarsimanera aamma misissorpaat.
Tillinniartoqarnera marlunngornermi nalunaaqutaq 08.30 nalunaarutigineqarpoq, immiaaqqallu quersuarmit tillinneqarsimapput. Tillinniat kikkuuneri politiinit suli paasineqanngillat.
Innuttaasunut pisumut paasissutissaateqartunut pasinartunillu takunnissimasunut Qaanaami politiit attaveqaqqullugit imaluunniit oqarasuaat +299 70 14 48 sianeqqullugit kaammattuutigineqarpoq.
Uummannami sunngiffimmi ornittakkamut tillinniartoqaqqittoq
Uummannami sunngiffimmi ornittakkami tillinniartoqaqqippoq. Ullup marluk ingerlanerani aappassaat tillinniartoqarpoq. Tillinniarneq kingulleq marsip qulingani nalunaaqutaq 11.30 nalunaarutigineqarpoq. Politiit maanna misissuipput, tillinniartullu pillugit paasissutissanik pissarsiniarlutik.
Pisimasoq siulleq sapaammi marsip 8-ata ataasinngornerullu martsip 9-ata akornanni pivoq.
Brugseneeqqami sulisoq unnerluutigineqartoq
Kiisalu Qaqortumi suliffimmi tillinniartoqarneranik politiit nalunaarfigineqarput.
Qaqortumi Brugseneeqqami sulisup aningaasanik tillissimasutut pasineqartoq politiinit kinaassusersineqarsimalerpoq. Inersimasuuvoq suliarlu misissuiffigineqarluni.
Ullormut nalunaarusiami paasissutissat poliniit Aputsiaq Hansenimit paasissutissiissutigineqarput.
