Nuummiut Kalaallit Nunaat sorsuutiginiarlugu akerliussutsimik takutitsipput
USA-p Donald Trumpillu Kalaallit Nunaannik nakkutiginnilernissamik kissaataa akiorniarlugu ullumi nunarput tamakkerlugu akerliussutsimik takutitsisoqarpoq.
Nuummi akerliussutsimik takutitsineq Amisunit aallartilluni Amerikamiut sinniisoqarfianut ingerlassaaq.
Foto: Oscar Scott Carl
- Maannakkut sinnarluttarpunga.
Qaartinneqarnissarput ernumassutigaara. Kisimiikkama annilaanganaqaaq.
Taama Jacobina Rødbjerg Nuummi Amisuni
nalunaaqutaq ataatsinut aallartittussamik akerliussutsimut
takutitsisoqarnissaanut piffissaqarluarni takkuttoq oqarpoq.
- Siorna peqataannginnama ullumikkut
peqataarusuppunga. Kalaallillu Nunaat Kalaallit pigimmassut peqataavunga –
uagununa nunarput, taanna oqarpoq.
Jacobina Rødbjerg kisimi akerliussutsimik
takutitsiartorluni takkutinngilaq. Inuit takkussuupput.
Jacobina Rødbjerg Trumpip ulluni makkunani sakkortuumik oqaaseqartarnera pissutigalugu annilaangavoq.
Foto: Oline Olsen.
Nuummi akerliussutsimik
takutitsisoqarnerata saniatigut kalaallit nunarput tamakkerlugu aamma
akerliussutsimik takutitsillutik ingerlaaqatigeerrapput. Qaqortumi, Aasianni,
Sisimiuni Ilulissanilu USA-p præsident Trumpillu Kalaallit Nunaannik
nakkutilliilernissamik kissaateqarneranut akerliussutsimik takutitsisoqarnissaa
pilersaarutaavoq.
Nalunaaqutaq ataatsinut tikilluaqqusisoqarpoq, inuillu nillerrallutillu erfalasunik erfalatitsipput. “Kalaallit Nunaat, Kalaallit pigaat”, inuit suaartaapput.
Takkuttunut politikerit arlallit peqataapput, taakkununngalu Naalakkersuisut siulittaasuat Jens-Frederik Nielsen (D), Inatsisartullu siulittaasuat Kim Kielsen (S) ilaapput.
Inuiattut erinarsuuterput erinarsorneqarpoq.
Karen Jessen Kalaallit Nunaat suli nunatut eqqissisimasuussasoq namminersortuussasorlu isumaqarami, ilaquttani peqatigalugit akerliussutsimik takutitsisunut peqataapput.
- USA-p pisiarissappatigut inuiattut suujunnaarsinneqassasugut isumaqarpunga. Kingulissakka pillugit maani peqataavunga.
- Piffissaq manna ilungersunartupilussuuvoq, oqarpoq qullilillunilu.
Karen Jessen ilaquttanilu akerliussutsimik takutitseqataanissamut piareerput.
Jens Salik Lailalu Donald Trumpi isumaqatiginnginnamikku akerliussutsimik takutitseqataapput.
- Inuuvusi inuttulli allatut, nunarsuarmi innuttat naligalugit, Jens Salik oqarpoq, imalu nangilluni:
- Isumaqatiginngilarput. USA-p ataatsimeeqatiginissaa sioqqullugu pissangasimavugut, ataatsimeeqateqarnerullu kingorna – aamma kongressimi ilaasortanik - eqqissisimanerulerpugut.
Jens Salik Lailalu aamma akerliussutsimik takutitsiartorlutik takkupput.
Foto: Oline Olsen
Pingasunngormat nunanut allanut naalakkersuisoq Vivian Motzfeldt (S), nunanut allanut ministeri Lars Løkke Rasmussen (Moderaterne) Amerikamiut nunanut allanut ministeriannik præsidentiatalu tullianik J.D. Vancemik ataatsimeeqateqarput.
Ullup tulliani danskit kalaallit aallartitaat kongressimi senatimilu ilaasortanik naapeqateqarput.
Akerliussutsimik takutitsineq aallartilluareerpoq. Takkuttut amerlapput, Nuup aqqusernisigut ingerlaarnermi nipilersortoqarpoq.
