Oqaaseqartartoq: USA saassussinerminik unitsitsippat Iran taamaaliussasoq

USA Iranimut saassussinngippat, Iran aamma Kangiani Qiterlermi akisilluni saassussinernik ingerlatsilersaanngilaq.

Taama Mohammad Akraminia, Iranimiut sakkutuuinut oqaaseqartartoq, nutaarsiassaqartitsivik AFP malillugu sapaammi oqarpoq.

- Saassussinerit taakku unnuat marluk matuma siorna tikillugu ingerlanneqarput, unnualli kingulliit marluk Amerikamiut saassussinerminnik unitsitsisut, oqarpoq.

Oqaaseqartartoq malillugu Irani Amerikamiut Iranimut saassusitillugit annertunertigut akilluni saassussisarpoq. Taamaammallu aamma akisilluni saassussisarnerit unitsinneqarput.

Mohammad Akraminiap ilanngullugu USA Iranimut saassussisarnerminik aallartitseqqippat sorsunneq sakkortuseqqissasoq Iranimiut TV-annut oqaatigaa.

USA-p illersornissamut ministereqarfiani tusarfiup USA-p Iranimut saassussisarnini unitsikkallarai, Amerikamiut tusagassiorfiannut CNN-mut oqaatigaa.

Tusarfiit marluk taakku Amerikamiut sakkuini toqqortat ikippallaalernerannik aarleqquteqarneq patsisit ilagigaat, aviisimut The New York Timesimut oqaatigaat.

Amerikamiut vicepræsidentiat J.D. Vance generalilu nuimasoq Dan Caine tallimanngormat Det Hvide Husimi ataatsimiinnermi saqitsaannerup sakkortusinissaanik aarleqquteqarnertik oqaatigisimagaat, CNN-ip ilanngullugu nalunaarutigaa.

Unitsitsigallarneq Amerikamiut Iranimut sapaatip akunnerini marlunni ullut tamaasa Iranimut saassussisareernerisa kingorna pivoq.

USA Israelillu Iranimut saassussinertik februaarip 28-ianni aallartippaat. Irani akisilluni Kangiani Qiterlermi Amerikamiut sakkutooqarfiinut saassussivoq.