Trump-imut,
Una
allagaq nunami uannut pingaarnerpaajusumit allappara. Tamaaniipput inuit
nalunngisakka.
SUNA TRUMPIMUT OQAATIGISSAGALUARPIUK?
Takorluulaariaruk præsident Donald Trumpip adressea pisimallugu allakkamik nammineq assammik allatannik nassinnissaanut periarfissaqarlutit. Qanoq allaffigissagaluarpiuk?
Trumpimut, USA-mut Kalaallillu Nunaannullu tunngasut tamaasa allatulaaq sammiumallugit Sermitsiamiit inunnik arlaqanngitsunik Donald Trumpimut namminneq allagaqarnissaminnut piffissaqarlutillu kajumittunik pissarserusuppugut.
Peqataanissannut soqutiginnikkuit mailimut uunga allassinnaavutit: bk@sermitsiaq.gl.
Trump-imut,
Una
allagaq nunami uannut pingaarnerpaajusumit allappara. Tamaaniipput inuit
nalunngisakka.
Tamaaniipput eqqaamasakka misiginikuusakkalu. Tamaanilu inuunera siunissamut isumalimmik tunniussaqarnissara anguniarlugu ingerlakkusuppara.
Nunarput pisiarineqarsinnaasutut tiguarneqarsinnaasutulluunniit eqqartorpat,
soorlu nuna inuuneqanngitsutut isigineqartoq. Taakkua oqariartuutit
tusaagaangakkit uannut annertuumik sunniuteqartarpoq.
Nunarput
inuuneqanngitsuunngilaq. Nunaavoq eqqaamasanik, kulturimik, oqaatsinik
inuiaannillu nukittuunik sumilluunniit aqqusaagaqaraluarlutik nikueqqittartunik
ulikkaartoq. Nunaavoq oqaluttuarisaanera nunasiaataanermik pilik. Qanoq inuuneqassanersugut nunaminngaanniit allamit aqunneqarnikoq.
Nunasiaataanerup kingunipilui suli misigaagut.
Nunarput
sakkussatut oqaluuserigaangakku nunasiaatilittut eqqarsartariaaseq atorlugu
oqaatigisarpat. Tassaasoq nunatta sumut
atorsinnaaneranut eqqarsartariaaseq. Kalaallit Nunaalli tassaaginnanngilaq pisuussutit, sakkutooqarfiit imaluunniit nunani tamalaani politikki. Angerlarsimaffiuvoq. Ataatsimoorfiuvoq. Inuit nunallu aningaasanik pissaanermilluunniit uuttortarneqarsinnaanngitsumik atassuteqaatigaat.
Nunatta siunissamut nammineq aalajangiisinnaanera ukioq manna annertunerulissasoq neriuppunga. Neriuppunga
nunarsuaq tusarnaarnerulissasoq, taamatullu uagut sinnerluta oqalunniartut
annikillissasut. Pissaanneqarniunneq sioqqullugu inoqqaajusunut uagutsinnut ataqqinninneq annertunerusoq anguniartariaqarpoq . Tamanna ilissi naalagaaffiit (nationer) nunat
inoqqaavinik naqisimanninnikut nipangersaanikullu pisussaaffigisariaqarparsi.
Kisianni aamma ernumassuteqarpunga. Oqaatsivit uteqattaarnerisa naliginnaasunngoriartoqqinnissaa
nunarsuarmilu nunat inoqqaavi inuiaqatigiillu mikinerit
isiginngitsuusaarneqarneruleriartoqqinnissaat ernumassutigaara. Oqaluttuarisaaneq “allamik oqaasiliinnarlugu” uteqqinneqassasoq ernumassutigaara.
Inuit allat “ajunngitsumik” siunertallit
maani nunatsini malugereerlugillu suli sunniutai malugaagut - amerlanernik
ilassallugit soqutiginninngilagut.
Inuulluaqqusillunga, Ulloriaq Kristian Lennert
