Nuummi Qitiusumik Kigutileriffimmi isugutannera silaannarissaanermillu ajornartorsiuteqarnera pissutigalugu oqoqangaatsiarpoq.
Tamanna Sermitsiap Kalaallit Nunaanni Suliffeqarnermut Nakkutilliisoqarfimmit allagaatinik takunnissinnaanermigut paasivaa.
Nuummi Qitiusumik Kigutileriffimmi isugutannera silaannarissaanermillu ajornartorsiuteqarnera pissutigalugu oqoqangaatsiarpoq.
Tamanna Sermitsiap Kalaallit Nunaanni Suliffeqarnermut Nakkutilliisoqarfimmit allagaatinik takunnissinnaanermigut paasivaa.
Peqqinnissaqarfimmi illuutit sanaartornerlu pillugit immikkoortortap - illuutinik aserfallatsaaliinermik isumaginnittuusut - aasaanerani sulinngiffeqannginnermi ajornartorsiutit ilisimareersimagai aamma takuneqarsinnaavoq.
Nakorsaanerup Sabina Gabrielsen Eugeniusip kigutileriffimmi sulisunik kiisalu Illuutit Sanaartornerlu pillugit immikkoortortami suliniuteqarnermut aqutsisumik mailikkut allaqateqarnermigut iluarsaassinissaq qanoq sivisutigissanersoq arlaleriarluni apeqqutigisimavaa.
Suliaq taanna sulisumit peqqinnissaqarfimmi suliunnaarsimasumit aallartinneqarsimasoq akineqarpoq.
“Sulisuusimasoq suli aallartitsisimanngitsoq paasigakku aasaanerani sulinngiffeqarfinngulereerpoq. Taamaammat suliaq soorunami kinguaattoorpoq. Pilersaarutilli sapaatip-akunnerata siuliani naammassivagut, suliassarlu ingerlaannaq suliariumannittussarsiuunneqarpoq,” suliamik aqutsisoq septembarip 24-ani allappoq.
Nutarsaanissaq sooq taama aallartinniaasaartigisimanersoq peqqinnissaqarfimmi pisortat Sermitsiamit aperineqarput. Kigutileriffiup nutarsarneqarnera sisamanngornermi novembarip 13-ianni ullaakkut aallartittoq sapaatillu akunnerata tulliani naammassineqartussatut naatsorsuutigineqartoq Peqqinnissaqarfimmi pisortat Sermitsiamut akissuteqarlutik allapput.
- Qitiusumik kigutileriffimmi sulisut Nuummi kigutileriffinnut allanut nuunneqarput, taakkunani kigutilerisoqarsinnaassaaq. Kigusiartut ulluni tulliuttuni Qitiusumik kigutileriffimmi nakorsiartussaagaluartut kigutileriffik matuneqarsimasoq attaveqarfigineqarlutillu ilisimatinneqarput, peqqinnissaqarfimmi aqutsisut allapput.
Angakkuarsinnaanngitsoq
Suliffeqarfik R&T apriilimi misissuivoq, tassanilu kigutileriffik oqoqangaatsiartoq paasineqarpoq. Tamatuma kingorna kigutileriffiup Illuutit Sanaartornerlu saaffigaat, septembarilli naanerani suli susoqaqqissimanngilaq.
Atortunik qalaassanik poortuivimmi suli oqoqarnera nakorsaanerup septembarip 24-ani e-mailikkut allakkami ernumassutiginerarpaa.
" Tamanna naliliinerput naapertorlugu illersorneqarsinnaanngilaq, taamaammallu erngerluni iliuuseqarfigineqartariaqarpoq. Sulisut naammagittarunnaarput, qanittukkullu akissuteqarfigineqarumaarnerput qilanaaraarput.“
Sabina Gabrielsen Eugenius oktobarip 7-ani suliamut tunngatillugu nutaanik paasisaqaqqinniarluni saaffiginnimmat suliniummik aqutsisoq ima akivoq: “Sapinngisara tamaat iliuuseqartarpunga, kisianni angakkuarlunga sanasoqalersissinnaanngilara, ilisimatitsereernittuullu pilersaarusiortoqareerpat uterfigeqqikkumaarpakkit."
Tamatuma kingorna kigutileriffimmi sullivimmi avatangiisit pillugit sinniisoq aamma saaffiginnippoq. Taanna sanasunik pissarsiniarneq ajornakusoortoq paasisinnaallugu, kisianni erseqqinnerusumik nalunaaruteqartoqarnissaa pilersaarusiortoqarnissaalu pisariaqartinneqartoq, allappoq.
Nutarsaanissamut pilersaarusiortoqareersoq suliarinninnerlu aallartitsinnagu akigitinneqartoq kingulleq utaqqineqartoq illuutinut sanaartornermullu immikkoortortami pisortaq akivoq.
Sulisut ersiuteqartut
Nalunaarusiami siunnersuutigineqartut naapertorlugit nutarsaasoqassaaq, silaannarissarfiit salinneqassapput kiisalu silaannarissarluarsinnaajumallugu silaannarissarfiit taarserneqanngikkunik nutaanngortinneqassapput.
"Ajortittoqartilluguli nalunaarutiginninnissaq atuisut pisussaaffigaat erseqqissartariaqarpara. Aammattaaq silaannarissarfiit assigisaasalu ataavartumik aserfallatsaaliorneqartarnissaat taakkua akisussaaffigaat. Ajoraluartumik taamaaliortoqarsimanngitsoq nalunaarusiamit paasivara,“ suliniummik aqutsisoq allappoq.
Sabina Gabrielsen Eugenius piffissaliussaq pillugu oktobarip 13-iani apeqquteqaqqikkami ima allappoq: „Sulisut arlallit oqoqarneranut attuumassuteqartumik ersiuteqarput, suliffiullu isumannaatsuunissaa uagutsinnut pingaaruteqarpoq.“
Allaqatigiinneq tamaanga killeqarpoq.
Qitiusumik kigutileriffik Kalaallit Nunaanni Sulinermik Nakkutilliisoqarfimmit oktobarip naanerani takuniarneqarpoq, tamatumalu kingorna kigutileriffik sulisut inigisaanni isugutammut imermullu ajoqusiisinnaasumut qulakkeerinnissasoq, inillu eqqortumik kiffiarneqassasut peqquneqarpoq. Peqqussut kingusinnerpaamik 2026-mi februaarip aappaani iluarsiivigineqarsimassaaq.
