Paasissutissanik nakkutilliisoqarfik taamaammat Nuummi allaffittaartoq

Anna Schmidt Obdrup Nuummi Industrivejimi illorsuarmi tungujortumik qalipaatilimmi suliffittaarsimavoq.

Inatsisilerisutut sulillunilu Paasissutissanik nakkutilliisoqarfiup satellitsikkut allaffiani nutaami, septembarip aallaqqaataani Nuummi ammartussami, pisortaavoq.

Taanna AG-mit sapaatit-akunneri marluk matuma siorna naapikkatsigu suli inissilluarsimanngillat.

Matumi silarlermi allassimasut ullualuit matuma siornatigut aatsaat ikkunneqartut tunisassiaallu ilisarnaatillit suli Blue Waterimiittut Anna Schmidt Obdrupip oqaatigaa. Taava Inuussutissalerinermut, Nunalerinermut Aalisarnermullu Naalakkersuisoqarfiup, igaffeqatigalugulu ataatsimiittarfeqaqatigisamik, kaffisorfiinut kaffimik kuisivoq.

- Kalaallit Nunaanni paasissutissanik nakkutilliisut qaninnerulerniarlugit maani ammaavugut, Anna Schmidt Obdrup oqarpoq.

Paasissutissanik nakkutilliineq nunatta inatsisitigut oqartussaaffiginngimmagu Kalaallit Nunaanni inatsisit malinneqarnersut Danmarkimi paasissutissanik nakkutilliisoqarfiup qulakkeertarpaa.

Taamaammat Kalaallit Nunaanni paasissutissanik nakkutilliineq pillugu siunnersuinerup oqaloqatigiinnerullu nukittorsarnissaat satellitsikkut allaffiup suliassaraa.

- Kalaallit Nunaanni oqartussaasut suliffeqarfiillu sunik unammillernartitaqarnersut paasiniartussaavarput. Tamannalu maaniinnitsigut paasilluarnerusinnaavarput, taanna oqarpoq.

Nakkutilliisuullunilu siuttuusoq

Paasissutissanik Nakkutilliisoqarfik naalagaaffimmi oqartussaaffeqarfiuvoq attuumassuteqanngitsuusoq, paasissutissanik illersuinermut inatsisit malinneqarnerannik nakkutilliisartoq, taamaaliornerlu pinngikkaangat naammagittaalliuutinik suliaqartartoq.

- Nakkutilliisuuvugut, kisianni aamma siuttuuvugut, Christina Angela Gulisano, Danmarkimi paasissutissanik nakkutilliisoqarfimmi pisortaq Københavnimi allaffimminit oqarasuaatikkut oqarpoq.

- Siunnersuineq ilitsersuinerlu suliassaasa pingaarnersaraat, taanna nassuiaavoq.

- Maleruagassat eqqunngitsuliorfigineqartinnagit ilisimaneqalernissaat pingaaruteqartoq isumaqarpugut, Cristina Angela Gulisano oqarpoq.

Peqquserluttuliornerit pinngitsoortinniarlugit suliniuteqarneq innuttaasunut, pisortanut suliffeqarfinnullu atuuppoq.

Nunarsuarmi politikkikkut pissutsit taamaannerata nalaani Nuummi ammaanerput nalaatsornerinnaavoq, Cristina Angela Gulisano nassuiaavoq.

- Paasissutissanik illersuinermut tunngatillugu ilitsersorneqarnerunissamik kalaallit oqartussaasuisa kissaateqarnerat pissutigalugu Kalaallit Nunaanni Satellitsikkut allaffik ammarneqarpoq, taanna oqarpoq.

Digitalimik Sullissinermut Aqutsisoqarfimmit 2024-miit 2028-mut periusissiaq Digitalinngortitsinermut Aqutsisoqarfimmit saqqummersinneqartoq naapertorlugu Kalaallit Nunaanni inuttut paasissutissat illersorneqarnissaannut EU-mi najoqqutassianik malinninnissaq anguniarneqarpoq.

Kalaallit Nunaat ullumikkut nunatut EU-p avataaniittutut nalorninartoqarfiusutut taaneqarpoq, tamannalu nunatsinni suliffeqarfinnut oqartussaasunnullu ilaatigut paasissutissanik Europami suleqatiminnut pilersuisuminnullu avitseqatiginninnissaq pisariaqartinneqaraangat unammilligassarujussuuvoq.

- Anguniakkat taakkua angunissaat takorluugaavoq, Cristina Angela Gulisano oqarpoq.

Tatiginninneq pingaaruteqartoq

- Inuttut paasissutissanik nakkutilliineq EU-milu malittarisassat immaqa nalinginnaavallaanngillat. Kisianni paasissutissat nakkutigineqarnissaat tamatsinnut attuumassuteqarluinnarpoq, Anna Schmidt Obdrup oqarpoq. Paasissutissammi ulluinnarni inuunermut ilaapput. Paasissutissammi uagutsinnut tunngasut nakorsiaraangatta, suliartoraangatta nittartakkatigulluunniit pisiniaraangatta allanut ingerlateqqittarpagut.

Taamaammat suliffeqarfiit oqartussaasullu paasissutissanik qanoq atuinissamik ilisimasaqarluarlutik uppernarsaatissanillu tunngaveqartumik aalajangiisarnissaat qulakkeerniarlugu inatsisiliortoqarsimavoq.

Sillimmasiissagaanni Netfliximillu atuisunngussagaanni inatsisit naapertorlugit oqartussaasut suliffeqarfiillu paasissutissat pisariaqartitaannaminnut katersorsimasaminnulluunniit taamaallaat atorsinnaallugillu allanut saqqummiuteqqusaanngilaat.

Aammattaaq paasissutissat inuttut ataasiakkaatut pigisavut pillugit innuttaasutut pisinnaatitaaffeqarpugut.

Oqartussaasut suliffeqarfiilluunniit uagut pilluta paasissutissanik sunik pigisaqarnersut paasisinnaasariaqarparput; paasissutissat taakkua (immikkut pisinnaatitaaffiit ilaat minillugit) toqqorneqarnissaannut tunngavissaqanngikkaangat peerneqarnissaat pisinnaatitaaffigaarput, aamma naqqiinissamut pisinnaatitaaffeqarpugut:

- Tassa ’allassimasaat eqqunngitsoq,’ oqarsinnaallutalu naqqiisinnaatitaavugut, Anna Schmidt Obdrup oqarpoq.

Tamanna soqutaanngitsoq immaqa eqqarsarputit.

- Ajutooruilli taama eqqarsarunnaassaatit, Anna Schmidt Obdrup oqarpoq.

Takorlooriaruk nakorsavit nakorsiarninnik allattukkat allanut takuneqarsinnaatillugit saqqumisikkai, imaluunniit Sermitsiaq.AG-mi atuisuuffinnut isesrnissamut paasissutissatit nakkutigisimanngikkutsigit isertaatit atornerlunneqarpat.

Anna Schmidt Obdrupili annilaanganatitsiinnarnianngilaq. Akerlerluinnaali anguniarpaa.

- Inuttut ataasiakkaatut paasissutissat pillugit nakkutilliineq eqqissisimanissamut uannut tunngassuteqarpoq, Anna Schmidt-Obdrup oqarpoq.

- Nunarsuarmi pitsaanerpaami paasissutissatta nakkutigineqarnerat qulakkeerneqartartussaammat tamakku isumakuluutigisussaanngilagut.

Savalimmiunit Islandimiillu isumassarsineq

Anna Schmidt Obdrupip oqartussanik suliffeqarfinnillu qanimut oqaloqateqarnikkut Kalaallit pisariaqartitaat ilisimalluarnerusinnaallugit pitsaanerutippaa.

Danmarkimi Paasissutissanik Nakkutilliisoqarfik paasissutissanik illersuinermut inatsisinik unioqqutitsinerit pillugit maalaarutinik amerlasuunik tigusaqartarpoq. Maalaarutit ilisimasaqalersitsisaramik suut unammillernartuunersut Paasissutissanik Nakkutilliisoqarfimmut paasisitsisarput.

Piffissami aggersumi Kalaallit Nunaanni paasissutissanik akisussaaffeqartut ajornartorsiutit suunersut paasiniartussaagamikkut taama amerlatigisunik maalaaruteqarnavianngitsoq ilimagaat.

- Savalimmiuni Islandimilu pissutsinut assingupput, taamaammat nakkutilliisut Danmarkimit uagutsinnut assingunerusut isumassarsiorfigerusuppagut; inuiaqatigiit ikinnerusut imminnullu ilisarisimanerusut, immaqalu allaanerusumik maalaaruteqariaaseqartut, Anna Schmidt Obdrup oqarpoq.

- Isumaliuutaavoq, paasissutissalli pitsaanerpaamik illersorniarlugit qanoq iliuuseqarsinnaanerluta paasisaqarusuppugut.

Piffissaq tulliuttoq qilanaaraa.

Anna Schmidt-Obdrup oqarpoq: Paasissutissanik illersuineq pillugu tusaamasaalluarnissamut periarfissaqarpugut.

Paasissutissanik inunnut tunngasunik nakkutilliineq tunngaviusumik pisinnaatitaaffiuvoq, pitsaasuusorlu inuit amerlanersaasa isumaqataaffigaat. Tamannalu qulakkeerniarlugu inatsisit pilersinneqarput.

Paasissutissanik Nakkutilliisoqarfiup allaffittaavata ammarneqarnera septembarip aallaqqaataani tamanut ammasumik ilasseqatigiinnikkut malunnartinneqassaaq. Industrivej 31-mi Nuummiittumi, nalunaaqutaq 11.00-imiit 14.00-imut ammaanersiortoqassaaq.