Partii Naleraq spiralilersuisimaneq pillugu nalunaarusiat pillugit Inatsisartuni immikkut ataatsimiittoqarnissaanik kissaateqartoq

Ilisimatuut spiralilersuisimanermut suliamut tunngatillugu nalunaarusiaat Inatsisartuni saqqummiunneqassallunilu oqaluuserineqassaaq.

Illuatungiliuttut partiiat Naleraq, partiinut allanut saaffiginnilluni siunnersuuteqarluni Inatsisartut ukiaanerani ataatsimiinnissaat septembarip 18-ani aallartittussaq sioqqullugu ullormik ataatsimik immikkut ataatsimiittoqarnissaanik kissaateqartoq taama isumaqarpoq.

- Takorluugarput tassaavoq nunasiaataanerup nalaaniit maannamut iliuuserineqarsimasut sammineqarnissaat, kiisalu Inatsisartuni partiit qanoq ingerlariaqqikkusunnertik pillugu isummersornissaat, siulittaasoq Pele Broberg tusagassiorfinnut nalunaarummi allappoq nangillunilu:

- Sammisaq siunissatsinnut pingaaruteqarmat, siunnersuutigaarput Naalakkersuisut nalunaarusiamik saqqummiussereerpata Inatsisartuni partiit oqaaseqartartui piffissamik killiligaanatik oqaaseqarsinnaassasut. 

Naalakkersuisut spiralilersuisimanermut tunngatillugu inuit pisinnaatitaaffiinut tunngasunik immikkut ilisimasallit nalunaarusiaat sapaatip-akunnerani kingullermi tallimanngornermi saqqummiuppaat.

Immikkut ilisimasallit sulinermi nalaanni isumaqatigiissuteqarput, immikkullu suliaqartut immikkut nalunaarusiamik tunniussinissaat akuerineqarpoq. Nalunaarusiaq taanna suliakkiissutigineqartumut naapertuutinngitsutut nalilerneqarluni kingorna Naalakkersuisunit itigartitsissutigineqarpoq.

Nalunaarusiat saqqummiunneqarnerannut atatillugu illuatungiliuttut Naleraq aamma Siumut spiralilersuisimaneq pillugu Danmark eqqartuussivimmut suliassanngortinniarlugu siunnersuuteqarput.