Partiit ataatsimoorlutik oqariartuuteqarput: Nunatta siunissaa nammineq aalajangigassaraarput

USA-p Kalaallit Nunaat pillugu nalunaarutaa ulluni arlalinni assigiinngitsunik politikkikkut oqaaseqarfigineqareersoq, Inatsisartuni partiit tallimat tamarmik atsiorsimasaat ataatsimoorluni nalunaarut saqqummiunneqarpoq.

Ataatsimoorluni nalunaaruteqarneq USA-mik ataatsimeeqateqarnissaq sapaatip akunnerata tulliani pisussaq sioqqullugu pivoq.

Partiini siuttut tallimat nunatta USA-mit nikagineqarunnaarnissaa kissaatigaat:

- Ameerikkamiuunianngilagut, qallunaajunianngilagut, Kalaaliuniarpugut, uteqqiillutik allapput.

Ilanngullugu erseqqissarneqarpoq Kalaallit Nunaat nunaasoq namminersorneq pillugu inatsit aamma tamat oqartussaanerat tunngavigalugit aqunneqartoq:

- Kalaallit Nunaanni naalakkersuisut inatsisartuilu kalaallit innuttaasunit qinerneqartarput, taamaalillutillu USA-mik nunanillu killernik suleqateqarput siunissamilu taamatut suleqateqassallutik, nalunaarummi allassimavoq.

Politikerit aamma uteqattaarpaat Kalaallit Nunaata siunissaa kalaallit namminneq aalajangissagaat, nunallu allat akuliutissanngitsut:

- Nunatta siunissaa Inuiaat Kalaallit namminneq aalajangigassaraat. Nunat tamalaanit inatsisit naapertorlugit aammalu Namminersorneq pillugu inatsit aallaavigalugu aqqut tamanna suliaraarput innuttaasullu peqatigalugit tunngavissiortussaallugu. Nunat kikkuugaluartulluunniit tamanna akuleruffissarinngilaat. Nammineerluta nunatta siunissaa qanoq iluseqassanersoq allaniit nukingisaarneqarata, kinguarsarneqarata akuleruffigineqaratalu aalajangissavarput.

Partiit siuttui kajumissaaripput ataqqeqatigiinnermik tunngavilimmik, pisortatigoortumik nunallu tamalaat akunnerminni periusaat atorlugit oqaloqatigiinnerit ingerlanneqarnissasut.

- Iligiittut ikinngutigiittullu tamanna aqqutissaavoq.

Partiit siuttui sisamanik ataatsimoorfeqarput - ilaatigut Inatsisartut ataatsimiinnissaat siuartikkumallugu:

• Nunat iligisavut suleqativullu qanimut sakkortusisamillu oqaloqatigineqarlutillu paaseqatigineqarnissaat suliarineqassasoq.
• Inatsisartut ataatsimiinnissaat siuartinneqajallassasoq. Nunatta politikkikkut torersumik ataatsimoorfissarsiorfiusumillu oqallittoqarnissaa tunngavissikkumallugu.
• Pisuni imaannaanngitsuni Inuiaat Kalaallit ajugaasussanngortinnissarput qulakkeerneqassasoq.
• Sineriapput tamakkerlugu nunatta iluaqutigisaanik toqqissisimanissaannillu anguniagaqartuassasugut

Nalunaarut ukunannga atsiorneqarsimavoq: Jens Frederik Nielsen, Demokraatit, Pele Broberg, Naleraq, Múte B. Egede, Inuit Ataqatigiit, Aleqa Hammond, Siumut, Aqqalu C. Jeremiassen, Atassut.