Pele Broberg Trumpimik pisut pillugit: Naalakkersuisut pullutik toqqorsimaarnerat iluaqutissaqarnavianngilaq

Naalakkersuisut siulittaasuata, Jens-Frederik Nielsenip (D), USA-p Facebookimut ivertitaanik atuarumaarnera naatsorsuutigisinnaanngikkaa, illuatungiliuttut siulittaasuat Naleqqameersoq Pele Broberg oqarpoq:

- Computerip saavanut ingillunilu sapiitsorujussuanngorsinnarluni kingorna pulluni toqqorluni susoqaqqinnginnissaanik neriunnikkut nuna iluamik aqunneqarsinnaanngilaq. Oqaatsit uteqattaakkat ukiup ataatsip missaani tusaareerpagut, Pele Broberg oqarpoq, taassumalu Naalakkersuisut periusaat pulluni toqqorsimanertut taavaa:

- Taakkunannga oqaloqatiginnitsinnata (USA-mik, aaqqiss.) ingerlaqqissinnaannginnerput ajornartorsiutaavoq. Silatusaartumik naalakkersuinermik ingerlatsisoqannginnera maanna isiginnaarparput, Pele Broberg oqarpoq.

- Ajunngitsumik isumaqarluni ivertitaq

Naalakkersuisut Siulittaasuata ilaatigut Trumpip Kalaallit Nunaat pillugu oqaaseqaataanik ataqqinninnginneraaneraalluni, Jens-Frederik Nielsenip oqaaseqarneranik tapersersuinersoq Sermitsiap Pele Broberg aperaa.

Jens-Frederik Nielsenip Kalaallit Nunaata tuniniagaannginneranik, nunallu kalaallinik pigineqartussaaneranik tunngasumik oqaasii, Pele Brobergip isumaqatigai, taassumalu Kalaallit Nunaata USA-mut ilaalernissaanik Naleqqap sukkulluunniit soqutiginninnginnera erseqqissarpaa.

Taakkulu saniatigut Jens-Frederik Nielsenip periusai tapersingaanngilai.

- Ajunngitsumik isumaqarluni ivertitsigunarpoq, tamatumali sapiiserluni Amerikamiunik suli oqaloqatiginnissimannginnera ajoraluartumik ersersippaa.

Pele: Jens-Frederik USA-mukartariaqarpoq

Donald Trumpip naalaartinnissaa ajornakusoorsinnaasoq, Pele Brobergip nassuerutigaa, taassumali Jens-Frederik Nielsenip piaartumik USA-mukarluni kalaallit isumannik tusarliinissaa siunnersuutigaa:

- Jens-Frederiusuuguma qanorluunniit appasitsigisumik inissisimagaluaruma USA-mukarlunga oqaloqatiginnikkiartornissara isumagissagaluarpara, Pele Broberg oqarpoq, imalu nangilluni:

- Unneqqarissumik oqarlanga; qanoq amerlatigisunik Trumpi Europamiut siuttui pillugit oqaaseqartarpa, taamaakkaluartorli nunap siuttui taakku USA-mukarlutik præsidenti naapittarpaat.

Pele Brobergip ilaatigut Jens-Frederik Nielsenip qineqqusaarnermi Donald Trump pillugu isorinnittumik oqaaseqarnera innersuussutigaa, taamaammallu Amerikamiut oqaloqatiginiarneri ajornakusoorsinnaasoq ilimagineqassanerarpaa:

- Allatut ajornartumik tasamunngarlutit oqaloqatigiinnerit aallartittariaqarpatit.