Peqqinnissaqarfik aningaasalersorniarlugu allannguinersuaq – aningaasaqarnerup aqunneqarnissaa misissoqqissaarneqassasoq

Aningaasaqarnermut Akileraartarnermullu Ataatsimiititaliap peqqinnissaqarfimmut 66 million koruuninik amerlanerusunik aningaasaliisoqarnissaanik pilersaarut annertooq 2025-mi akueraa. Peqqinnissaqarfimmi aningaasanik aqutsineq pillugu misissuisoqarnissaanut aningaasanik aamma immikkoortitsisoqassaaq.

Peqqinnissaqarfiup aningaasaliissutigineqartut sinnerlugit aningaasanik pisariaqartitsisarnera ilaatigut taartaasunik atorfinitsitsinermut aningaasartuutit pissutigalugit ajornartorsiutaajuartoq Aningaasaqarnermut Akileraartarnermullu Ataatsimiititaliap erseqqissarpaa.

Assi: Oscar Scott Carl

Thomas Munk Veirum Thomas Munk Veirum Thomas Munk Veirum tusagassiortoq

Saqqummersinneqarpoq 25. Novembari 2025 - 16:19

Annonse

Peqqinnissaqarfimmi aningaasat pilersaarutigineqartumit amerlanerusut aammaartumik atorneqarput, taamaammallu Naalakkersuisut aningaasaliissutinik annertuumik nutaanik immikkoortitsinissamut akuersissuteqarniarlutik Inatsisartut Aningaasaqarnermut Akileraartarnermullu Ataatsimiititaliaat qinnuigisimavaat.

Tassa imaappoq 2025-mut aningaasanut inatsisissami kontot suliniutillu arlallit ikilisinneqarumaarllutillu aningaasat peqqinnissaqarfimmut nuunneqarumaarput.

ATUARUK AAMMA

peqqinnissamut siunnersuisoqatigiit siullermeerlutik nalunaarusiaq saqqummersippaat: vikarinut aningaasartuutit tallimariarlutik qaffariarput

Peqqinnissaqarfimmut katillugit 66 millionit koruunit nuunneqarumaartut Aningaasaqarnermut Akileraartarnermullu Ataatsimiititaliap allagaani saqqummiunneqaqqammersumi takuneqarsinnaavoq.

Kommuninut ataatsimut tapiissutit 12,8 mio. kr.-nik ikilineqarnissaat, Kullorsuarmi meeqqanut inuusuttunullu sammisassaqartitsivimmik suliniummut aningaasaliissutit 9 mio. kr.-nik ikilineqarnissaat timersortarfinnillu nutarterinermut tapiissutit 5,7 mio. kr.-nik ikilineqarnissaat sipaarniutit annertuut ilagaat.

Aamma Nuummi sulisunut inissialiornissamik suliniutip annikillisinneqarneranit 21,8 millionit koruunit immikkoortinneqarput.

Aningaasanik aqutsineq misissorneqassasoq

66 million koruunit saniatigut peqqinnissaqarfimmi aningaasaqarnerup qanoq ingerlanneqarneranik misissuinissamut 2,5 million koruunit immikkoortinneqarput.

Aningaasaqarnermut Akileraartarnermullu Ataatsimiititaliap peqqinnissaqarfiup aningaasaqarneranik aqutsinerup kukkunersiuinikkut misissuiffigineqarnerata inernera pissarsiarineqarpat piumallugulu nalunaarusiap Kukkunersiuinermut Ataatsimiititaliamut ingerlateqqinneqarnissaata innersuussutiginissaa siunnersuutigaa.

Aammattaaq peqqinnissaqarfik ilaatigut sulisussanik taarsigassarsisitsisarnermut aningaasartuutit pissutigalugit aningaasat immikkoortinneqarsimasut sinnerlugit pisariaqartitsilertarnermik ajornartorsiuteqaleraluttuinnartoq ataatsimiititaliap maluginiarpaa.