Perngaamik atuakkiortoq Nunat Avannarliit Siunnersuisoqatigiivisa atuakkiortunut nersornaasiuttagaannut innersuunneqartoq
Nunat Avannarliit Siunnersuisoqatigiivisa atuakkiortoq Debora H. Kleistip atuakkiortumut nersornaasiuttakkamut innersuuppaat: Sarsuatitat, Livets strøm.
Debora H. Kleistip atuakkiaa siulleq 2024-meersoq “Sarsuatitat, Livets strøm” Nunat Avannarliit Siunnersuisoqatigiivisa atuakkiortunut nersornaasiuttagaannut 2026-mut innersuunneqarpoq, taannalu Helsingforsimi oktobarip 27-ani tunniunneqassaaq.
Toqqorsivimmiit assi: Leiff Josefsen
Nunani avannarlerni atuakkiortut 13-it Nunani Avannarlerni Siunnersuisoqatigiit atuakkiortunut nersornaasiuttagaanut innersuunneqarput, Kalaallit Nunaanniillu Debora H. Kleist 300.000 koruuninik nalilimmik nersornaaserneqarnissaminut periarfissaqarpoq.
Atuakkiaq
Sarsuatitat 2024-meersoq pillugu nersornaasiinermut
ataatsimiititaliaq atuakkiortoq kalaaleq “allaaserisaq
kusanartoq, oqaatsit eqqoqqissaartut taalliortorpalaartorlu atorlugit
inuup pinngortitamut, piffissamut ataatsimoornermullu
attaveqarneranik misissuisoq” pilersissimagaa allappoq.
- Kleistip oqaatsit malugineqarsinnaasut erseqqissullu atorlugit inuuneq ingerlaannartutut saqqummiuppaa – sarfaq inuit ataasiakkaat misigisimasaannik, ataatsimut oqaluttuanik kinguaariillu nipaat imminnut attuumassuteqartut. Allakkat qamannga pisumik silarsuarmiullu akornanni oqimaaqatigiissaaripput, nipaannermut sakkortussutsimullu inissaqartitsillutik. Oqaatsit ammasut atorlugit atuartartoq imminut tarrarsorfiginissaminut akuersaarnissaminullu paasissutissat annerusut atunngikkaluarlugit periarfissinneqarpoq.
Debora H. Kleistip oqaluttualiorluni atuakkiaa siulleq pineqarpoq. Siornatigut Olieeventyret 2015-imi atuakkiaraa, oqaluttualianullu katersanut 2016-imi White Raven Awardimik toqqagaanut ilaalluni.
Debora H. Kleist, ujarassiuutut ilinniarsimasoq, Qaqortumi 1989-imi inunngorpoq.
Atuakkiortumut nersornaammik pissarsisoq oktobarip 20-ani nalunaarutigineqassaaq, nersornaallu Nunat Avannarliit Siunnersuisoqatigiivisa Helsinkimi ataatsimiinneranni oktobarip 27-ani tunniunneqassalluni.
