Piffissap aalajangersarneqarnera kinguarteqqinneqarpoq

Piffissap aalajangersarneqarnera UTC-3-mut allanngortinneqartariaqarnerpa, aasaaneranilu nalunaaqutaq atorunnaarsinneqarluni?

Siumup Naleqqallu siunnersuutaat pingajussaaneerneqarnerani, tamanna Inatsisartut ullumi aalajangiiffiginiartussaagaluarpaat.

Inatsisartunut ilaasortat Siumup oqaluuserisassanngortitaata ullormut allamut kinguartinnissaa, Inatsisinut Atuutsitsinermut Ataatisimiisitaliamit piumasarineqartoq, ataatsimiinnerup aallartinnerani Inatsisartut siulittaasuata Kim Kielsenip (Attaviittoq) oqaatigaa.

Taamaattumik Naleqqap siunnersuutaa kisiat maannakkut suliarissavaat.

Aappassaaneerneqarneranili paasinarsivoq IA-p, Atassutip Demokraatillu naalakkersuisooqatigiit Siumup inatsisissatut siunnersuutaanut allannguutissaq tapersersoraat. Allannguutissaq naapertorlugu aasaanerani nalunaaqutaq 2027-mi januaarip aallaqqaataani atorunnaarsinneqassaaq, piffissarlu 2028-mi allanngortinneqarluni.

Naleqqalli siunnersuutaa itigartinneqarmat ullumikkut piffissamut aalajangersaaneq pillugu inaarutaasumik aalajangiisoqassanngilaq.

S aamma N oqallipput

Naleqqamiit Aki-Matilda Høegh-Dam aamma Pele Broberg Siumumiit Erik Jensen kisimik siunnersuutip pingajussaaneerneqarnerani oqaaseqarusupput.

Siunnersuutit assigiinngissutaat oqallisigineqarput, tassa sumiiffinni nalunaaqutaq allanngortinneqartinnagu Qaanaami, Tasiilami Ittoqqortoormiunilu innuttaasut tusarniaaffigineqassasut, Naleqqap piumasaqarnera oqallisigineqarpoq.

Pele Broberg Erik Jensenimut apeqquteqarpoq, tassanilu isummerluni partiit isumartik allanngortissimassagaat ataatsimiititaliap siunnersuut kinguarterusummagu.

Erik Jensenili oqarpoq ataatsimiititaliap pingajussaaneerneqartussaq kinguartikkaa misissuaqqissaarusukkamik. Siumup siunnersuutip isumaa allanngortinnianngilaa, oqarpoq.

Nutarterneqarpoq.