Pinartunut aningaasaliissutiniit Nuummi timmisartunik aqutsisoqalernissamut ajornartoornermilu innaallagissiuuteqalernissamut illikartitsisoqartoq
Kalaallit Nunaanni pinartunik siunissami pisoqartillugu upalungaarsimanerulernissamut Danmark 180 millionit koruuninik immikkoortitsivoq. Aningaasat taakku Nuummi silaannakkut angallannermik aqutsisunut, ajornartoornermi innaallagissiuutinut kalerrisaarummullu S!RENEN-imut atorneqassapput.
- Qujamasuutigaara suli nukittunerusumik inissisimalernissarput piareersimanerunissarpullu angussagatsigu, Peter Borg oqarpoq.
Assi: Oscar Scott Carl
S!RENEN:
S!RENEN tassaavoq oqarasuaatit angallattakkatigut kalerrisaarut, ajornartoortoqartillugu toqqaannartumik kalerriisartoq.
- Suua? Mianersoqqussut SMS-init allagarsinernillu nalinginnaasuniit allaanermik nipeqarlunilu sajuttarpoq.
- Qanoq atorneqartarpa? Ajornartoortoqarnerani oqarasuaatinut angallattakkanut nutaanerusunut tamanut kalerrisaarisarpoq.
- App-iunngilaq. Aaneqarluni ikkunneqartussaanngilat.
- S!RENEN kalerrisaarutinik pioreersunik taartaanngilaq, sillimaniarnermilu ilaliussatut atortorissaarutaalluni.
S!RENEN appippat ima iliorit:
- UNIGIT: Isumagisat unitsiguk.
- ATUARUK: Ilitsersuut nalunaarutigineqartoq atuaruk.
- QISUARIARIT: Ilitsersuutit ingerlaannaq malikkit.
- Upalungaarsimanermut aqutsisoqarfik
Danmarkimi naalakkersuisut Kalaallit Nunaanni upalungaarsimanerup nukittorsarnissaanut 2026-mi 180 millionit koruuninik immikkoortitsipput.
Aningaasat Inuiaqatigiinni Isumannaallisaanermut Upalungaarsimanermullu ministerip Naalakkersuisullu suleqatigiinnerisigut pissarsiarineqarput. Aningaasat kalerrisaarummut, ajornartoornermi innaallagissiuummut, silaannakkut angallannermik aqutsisunut ilaatigut atorneqassasut, Naalakkersuisut tusagasiuutitigut nalunaarummi allapput.
Pinartunut aningaasaliissutit agguatarneqarnerat
Aningaasat Kalaallit Nunaanni innuttaasut isumannaatsuunerulernissaannik suliniutinut pingaarutilinnut arlalinnut agguaanneqarput:
- 45 mio. koruunit missaat ajornartoornermi attaveqaqatigiinnikkut periusissiornermut immikkut ilisimasaqarneq, aamma upalungaarsimanermilu immikkut ilisimasallit Naalakkersuisunut ikiuunnissaat, nunatsinnilu oqartussanut, kommuninilu upalungaarsimanikkut sullissisut ikiorneqarnissaat aamma naalakkersuisoqarfiup qitiusumik allaffiinut kommunillu sullissiviinut ajornartoornermi sarfalersuinermut aaqqiissutissat.
- Nuummi silaannakkut angallannermik aqutsisunut pilersitsinissamut 60 mio. koruunit.
- Kalaallit Nunaanni imarsiortunut isumannaallisaanermut 15 mio. koruunit.
- Ajornartoornermi innaallagissiuutinik pisinissamut 50 mio. koruunit.
- Oqarasuaatitigut angallattakkatigut kalerrisaarutip S!RENEN-ip Kalaallit Nunaanni atorneqalernissaanut 10 mio. koruunit.
Naalakkersuisoq qujamasuttoq
Isumaqatigiissut suleqatigiinnerulernissamik imaqartoq januaarimi 2026-mi isumaqatigiissutigineqarpoq. Innuttaasut ajornartoortoqartillugu ulluni tallimani imminut napatissinnaasariaqarnerannik kaammattuuteqarnerup kingorna naammassineqarluni.
Naalakkersuisoq Peter Borg (D) isumaqatigiissut pillugu ima oqarpoq:
- Qujamasuutigaara suli nukittunerusumik inissisimalernissarput piareersimanerunissarpullu angussagatsigu, assersuutigalugu sarfaaruttoqassappat, imaluunniit pinartumik pisoqassagaluarpat suliniutit nutaat danskit inuiaqatigiinni isumannaatsuunissamut upalungaarsimanermullu ministeriannik oqaloqateqarternerni pitsaasumit tunngavissinneqarpoq, oqarpoq.
