Pinerluttulerinermi inatsit Naalakkersuisut angerlaanniarpaat

Pinerluttulerinermi inatsisinik angerlaassinissamut Naalakkersuisut piareersarlutik aallartipput.

Taama Meeqqanut, Inuusuttunut, Inatsisinik Atuutsitsinermut Naligiissitaanermullu Naalakkersuisoqarfik pingasunngornermi tusagassiutitigut nalunaarummi allappoq.

Naalakkersuisut siammasissumik politikkikkut taperserneqarnermik kingorna suliaq aallartikkaat, tusagassiutitigut nalunaarummi allassimavoq.

Immikkut ilisimasalinnik suleqatigiisitaliortoqarpoq, pinerluttulerinermi eqqartuussinerup nunatsinnut eqqunniarnissaanut tapersersuisussanik.

Immikkut ilisimasallit suleqatigiissitaasa sulinerat peqatigalugu Naalakkersuisut Danmarkimi oqartussaasut tunniussinissamik isumaqatigiissut pillugu isumaqatiginninniassapput.

Immikkut ilisimasalinnittaaq pinerluttulerinermut inatsimmi allannguutigineqarsinnaasut qanoq ilillutik aaqqiissutigineqarsinnaanissaat nalilersoneqassaaq.

Pinerlunnerit aalajangersimasut qanoq pillaatisiassaqartinneqartassanersut, ilaatigut aalajangerneqassaaq.

Kalaallit Nunaanni pinerluttulerinermi inatsimmi maanna atuuttumi pillaatisiassaq eqqaaneqarneq ajorpoq, taarsiulluguli paarnaasussaassanersut allassimapput.

Aamma pinerluttulerinermut inatsimmi pillaatit aalajangersimasumik sinaakkuserneqanngillat. Pillaanermut sinaakkutat, pillaatisiassanut aalajangersimasunut sinaakkusiisarput.

Assersuutigalugu Danmarkimi pinerluttulerinermi inatsimmi toqutsineq ukiunit tallimaniit inuunerup sinneranut parnaarussaanermik kinguneqarsinnaasoq allassimavoq.

Kalaallit Nunaanni eqqartuussisut pillaammik aalajangersaaginnaratik, aammali pineqaatissinneqartup pinerluuteqaqqinnginnissaanut pitsaanerpaamik aaqqiissutissamik aalajangiisarput.

Namminersornermut inatsit naapertorlugu Kalaallit Nunaat suliassaqarfinnik arlalinnik tigusiniarluni aalajangersinnaatitaavoq.

Politiit, eqqartuussiviit, Kalaallit Nunaanni parnaarussiviit pinerluttulerinermilu inatsisit Folketingimit maannamut aqunneqarput.

Inatsisinut Atuutsitsinermut Naalakkersuisoq Mariane Paviasen Jensen, tusagassiuutinut nalunaarummi oqarpoq, inatsisit inunnillu pinerluuteqartunik iliuuseqarneq kalaallit ileqquinik naleqartitaannillu tunngaveqartassasut.

- Taamaattumik inuiaqatigiinni inatsisini maleruagassat, innuttaasullu eqqartuussiveqarnermut tatiginninnerannut pinerlunnerit assigiinngitsut qanoq ilungersunartiginerat, pillaatisiassallu aalajangerneqartartut imminnut ataqatigiinnissaat pingaaruteqarpoq.

- Pinerluttulerinermi inatsisinik suliaqarneq nunatsinnut nuunneqarpat, tamatumani namminerisatsinnik inatsisiliorsinnaanngussaagut, taamaalillutalu qulakkeersinnaavarput inatsisit inuiaqatigiinni kissaatigisanut pisariaqartitanullu naleqqussarsinnaanissai, inatsisitigut isumannaatsuunissaq innuttaasullu eqqartuussiveqarnermut tatiginninnerannut iluaqutaasumik, oqarpoq.

Kalaallit Nunaat akisussaaffinnik angerlaassinerani, Namminersorlutik Oqartussat suliassaqarfimmi tamatumani aningaasalersuisussaapput.

RITZAU