Pipaluk Lyngep folketingi aamma danskit naalakkersuisui peqataatitsinnginnerat pillugu isornartorsiorpai

Inatsisartuni ilaasortaq, Pipaluk Lynge (IA) aamma inatsisartut nunanut allanut sillimaniarnermullu ataatsimiititaliaani siulittaasuusoq, assut narrujuummivoq ataatsimiititaliap pisuni ilaatinneqannginnera pillugu.

- Danmarkimi politikerit nunasiaatilittut pissusilersornerat akuersaarsinnaanngilara! 

Tusagassiuutinut nalunaarutini taamak qulequtsersimavaa, folketingimi nunanut allanut ataatsimiititaliaq marlunngornermi USA-mut tunngasumik immikkut ittumik ataatsimiigiaqquneqarmat, nangipporlu:

- Tamanna akuersaanngilara erserporlu suleqatigiinnerup qanoq suleqatiginiakkatsinnik ilusilersorneqarniarnersoq. 

- Naammaqaaq, taama ingerlaannartoqarsinnaanngilaq. Nunatta naalakkersuisui kaammattorpakka sukkanerpaamik danskit naalakersuisui ingeqatigissagaat iliuusissanillu isumaqatigiissuteqarfigalugit. 

Itigartinneqarpoq folketingimi kalaallit ilaasortat marluk peqataasussaammata

Pipaluk Lyngep paasigamiuk danskit naalakkersuisuinit ataatsimiigiaqqusisoqarsimasoq, ataatsimiinnermi peqataaniarluni sulissutigisimagaluarpaa. 

- Itigartinneqarpunga, folketingip ataatsimiititaliaa ataatsimiigiaqqusinermi pineqarmanngooq, tassanilu kalaallit sinniisaat marluk issiammata. Kisianni taakku folketingimi ilaasortaapput, inatsisartut nunanut allanut sillimaniarnermullu ataatsimiititaliaat sinnerlugu tassaniinngillat, inatsisartut sapinngisamik ilanngunneqassappata, tamanna Inatsisartut nunanut allanut sillimaniarnermullu ataatsimiititaliaat aqqutigalugu pisariaqarpoq, taanna oqarpoq.

- Ataatsimiinneq oqaluttuarisaanermi pingaarutilittut taaneqarpoq, kisianni uagut, pisami pineqartugut, peqataatinneqanngilagut, tamannalu isumaqarpunga nunasiaatilittut pissusilersornerusoq. Aamma utoqqatsissutigineqarsinnaanngilaq isumannaallisaanermut piumasaqaatit sakkortunerat pissutaasoq, tassami aamma Inatsisartuni isumannaallisakkamik aamma millionilikkaanik akilimmik ataatsimiittarfeqarpugut, oqaatigaa.

Naalakkersuisut iliuuseqarnissaat piumasaraa

Pipaluk Lynge siunissami qulakkeerniarpaa, Inatsisartut nunanut allanut sillimaniarnermullu ataatsimiititaliaat peqataatinneqartassasoq:

- Naalakkersuisut kajumissaarpakka piaarnerpaamik danskit naalakkersuisuinut saaffiginnissasut iliuusissatut pilersaarusiorlutik.

Pipaluk Lynge-p piumasaraa, iliuusissatut pilersaarutit taakku qulakkiissagaat, Inatsisartut minnerpaamik ataatsimiititaliaq aqqutigalugu peqataatinneqarnissaat.

Naalakkersuisut oqaaseqartinniarlugit Sermitsiaq sulissuteqarpoq.