Nivi Rosingip Inuit Ataqatigiinneersup Inatsisartunilu ilaasortaasup siunissami piniakkat killilersugaasut pillugit pisassiissuteqarnermi najukkani ilisimasat pingaartinneqarnerulissanersut paragraf 37 naapertorlugu Naalakkersuisunut apeqquteqarluni paaserusuppaa. Aalisarnermut, Piniarnermut, Imminut Pilersornermut Avatangiisinullu Naalakkersuisoq Peter Borg Demokraatineersoq naapertorlugu ilaatigut kattuffiit pingaarnerit attuumassuteqartut kiisalu Piniarnermut Siunnersuisoqatigiit aqqutigalugit piniartut atuisartuillu ilisimasaat pingaartinneqassasut Inatsisartut piniarnermut inatsisaanni ilaatigut allassimavoq.
Nivi Rosing naapertorlugu Canadami Nunavummi pisassiissutit agguaanneqarneranni najukkami ilisimasat ilanngunneqartarnerisigut oqartussaasut qilalukkanik qaqortanik qernertannillu amerlanerusunik pisassiisalersimapput, namminerlu piniarnermik inatsimmi assingusumik iliuuseqartoqarnissaa siunissami sulissutiginiarpaa.
Nivi Rosingip Inuit Ataqatigiinneersup Inatsisartunilu ilaasortaasup siunissami piniakkat killilersugaasut pillugit pisassiissuteqarnermi najukkani ilisimasat pingaartinneqarnerulissanersut paragraf 37 naapertorlugu Naalakkersuisunut apeqquteqarluni paaserusuppaa. Aalisarnermut, Piniarnermut, Imminut Pilersornermut Avatangiisinullu Naalakkersuisoq Peter Borg Demokraatineersoq naapertorlugu ilaatigut kattuffiit pingaarnerit attuumassuteqartut kiisalu Piniarnermut Siunnersuisoqatigiit aqqutigalugit piniartut atuisartuillu ilisimasaat pingaartinneqassasut Inatsisartut piniarnermut inatsisaanni ilaatigut allassimavoq.
Nivi Rosing naapertorlugu Canadami Nunavummi pisassiissutit agguaanneqarneranni najukkami ilisimasat ilanngunneqartarnerisigut oqartussaasut qilalukkanik qaqortanik qernertannillu amerlanerusunik pisassiisalersimapput, namminerlu piniarnermik inatsimmi assingusumik iliuuseqartoqarnissaa siunissami sulissutiginiarpaa.
Inatsisit nutarsarneqartut
Naalakkersuisut piniarnermut piniarnermullu Inatsisartut inatsisaat kingulleq 2023-meersoq, kingullermillu 2024-mi allanngortinneqarsimasoq, malikkaat Nivi Rosingimut akissummi allassimavoq, tassani akuersissutit allagartallu ilaatigut kommunit inuillu innuttaasunik nalunaarsuisarfimmi nalunaarsorneqarsimasut pisassiissutinik aqutsinermut peqataatinnissaannut periarfissiipput. Kalaallit Nunaanni nunap inoqqaajuneq inuiaqataanerluunniit immikkoortinneqarneq ajorpoq, innuttaasut tamarmik innuttaasunik nalunaarsuisarfimmi nalunaarsorneqarsimasut assigiimmik pineqartarput – kisiannili uumasut pisassiissutaasartut pillugit aalajangersagaqartoqarpoq, tassani ukiut marluk najugaqarsimanissaq piumasaqaataavoq, Peter Borg ilisimatitsivoq.
- Piniarnermut inatsisit nutarterneqarnikuugami uumasut pillugit nalunaarutit Naalakkersuisullu aalajangiineri aqqutigalugit atuutsinneqalissaaq. Pisassat agguaanneqarnerannut malittarisassat piumasaqaatillu aamma kommunit innuttaasullu peqataatinneqarnerat eqqarsaatigalugu ersarilluinnarput.
- Naalakkersuisut pisassiissutit qanoq agguaanneqartarnerat kommuninut innuttaasunullu ataasiakkaanut allagartanik akuersissutinillu pissarsinissamut pisariillisaanissaq ajornannginnerulersinniarlugu malinnaaffigiuassavaat.
- Naalakkersuisut tamanna piniarnermut allagartalersuinerup digitalinngortinneratigut, kiisalu pisassiissutitut uumasut soorlu tuttut umimmannillu qinnuteqartarnerit pisarinerillu pillugit nalunaarusiortarnertigut ilaatigut anguniagaraat. Aammattaaq piniagassassatut pisassiissutigineqartut allat digitalimik ineriartortinneqarput, taakkulu ukiuni aggersuni atuutsinneqalissapput, Peter Borg allappoq.
Piumasaqaatit malikkaat
Naalakkersuisut inatsisit pisassiissutillu allanngortinneqarneri pillugit tamanut tusarniaanissamik piumasaqaat malikkaat Peter Borg ilisimatitsivoq.
- Naalakkersuisut inatsisissatut nalunaarutinillu siunnersuuteqaraangata taakku ilaatigut Naalakkersuisunut Piniarnermut Siunnersuisoqatigiinnit, Kalaallit Nunaanni Aalisartut Piniartullu Kattuffianniit, KNAPK-mit aamma sunngiffimmi piniartut kattuffiannit, Tapertaralugu Piniartartut Aalisartartullu Kattuffianniit, TPAK-mit kiisalu kommuninit sinniisunit arlaqanngitsunit innuttaasunut pisortatigoortumik tusarniaassutigineqartarput.
- Taamaaliornikkut Kalaallit Nunaanni innuttaasut apeqqutinut akissuteqaateqarnissamut Naalakkersuisullu aalajangiinerannut sunniuteqarnissamut periarfissaqartarput, Naalakkersuisoq Nivi Rosingimut ilisimatitsivoq.
Uumasoqarnikkut isumannaatsumik piniarneq
Piniakkat uumasoqarnikkut isumannaatsumik illersorneqarsinnaasumillu atorluarneqarnissaat inatsimmi siunertarineqartoq Inatsisartut piniarnermut inatsisaanni ilaatigut allassimavoq.
- Uumasorsiuut siunnersuinerat nalinginnaasoq aamma piniartut atuisullu ilisimasaat naapertorlugit piniakkanut naapertuuttumik ukiullu qanoq ilinerani atorluaaneq, nalilersuinermi naligiissinneqartartut Inatsisartut inatsisaata aqunneqarnerani pingaartinneqassapput.
Innuttaasut asiarsinnaanermik kulturikkullu pisariaqartitaat siunertaq pillugu paragraffimi aamma allassimavoq. Piniartut piniartullu ilisimasaat, ilaatigut kattuffiit pingaarnerit aamma Piniarnermut Siunnersuisoqatigiit aqqutigalugit pissarsiarineqartut, ilanngunneqarnissaat pingaartinneqassasoq, Peter Borg allappoq.
Pinngortitaleriffiup piniakkat pillugit biologii tunngavigalugu misissuinerit pilersaarusiorneranni suliarineqarnerannilu najukkami innuttaasut peqataatittarai, tamatumalu saniatigut piniartut piniakkat taakkualu najugaqarfigisaasa qanoq innerat pillugu ilisimasaat pillugit apersorneqartartut piniartullu kisitsinermut peqataanissaannut qaaqquneqartartut akissummi aamma allassimavoq. Tamatuma kingorna Naalakkersuisut pisassiissutit kommuninut ataasiakkaanut pisassiissutigineqartussat pillugit aalajangiitinnagit uumassusililerisut innersuussillutik nalunaarusiaat pisortatigoortumik tusarniaassutigineqartarput.
Piniartut peqataatinneqartut
Kalaallit Nunaat nunap immikkoortuini nunallu tamalaat akornanni kattuffinnut arlalinnut ilaasortaasoq Peter Borgip ilisimatitsissutigaa.
- Assersuutigalugu KNAPK nakkutilliisuugami ataatsimiinnerni peqataasinnaavoq. Atlantikup Avannaani Immami Miluumasut pillugit Ataatsimiititaliarsuup, NAMMCO-p, piniartut peqataatikulasarpai, taakkualu piniarnermut atortut periutsitillu pillugit ilisimasatik saqqummiuttarpaat.
- Kingullermik 2025-mi taama pisoqarpoq, tassani NAMMCO-p aaqqissuussaanik, ilaatigut piniariaaseq pillugu nunanit tamalaanit peqataaffigineqartumik isumasioqatigiittoqarpoq. Tassunga atatillugu Kalaallit Nunaanni piniartut pisarineqartartut atortorissaarutillu ullumikkut siornatigullu atorneqartartut assigiinngitsut pillugit powerpointit atorlugit saqqummiussipput.
Piniartut arferit angisuut mikisullu pillugit NAMMCO-mit ilitsersuutigineqartunut, kommuninut KNAPK-llu immikkoortortaqarfiinut agguaanneqartunut, aamma peqataalluarsimapput, taama Aalisarnermut, Piniarnermut, Avatangiisinut Imminut Pilersornermullu Naalakkersuisoq ilisimatitsivoq.
Suliaq ingerlateqqikkaa
Nivi Rosing Canadami suliniummi Marralik-Ungunniavik Projectimi, ilaatigut nunap inoqqaavisa piujuartitsilluni piniarnermik illersuisinnaatitaaffiinik illersuinemrik siunertaqartumi, aasaq manna peqataavoq.
Taanna naapertorlugu pisassiissuteqartilluni piniarnermut uumasullu pisarineqartarnerannut tunngatillugu najukkani ilisimasat pingaaruteqarluinnartut suliniummi misilittakkat takutippaat.
- Nunavummi sumiiffimmi aalajangersimasumi ukiut 40-t missaanni qilalukkanik qernertanik qaqortannillu pisassiisoqarneq ajorpoq. Pissuseqatigiiaalli taakkorpiaat pillugit najukkani ilisimasat ilanngunneqareersut pisassiisoqassasoq inerniliisoqarpoq, taamaalillunilu piniartoqaqqissinnaalerpoq, taanna oqarpoq.
Nivi Rosingip piniarnermik inatsimmi assingusumik iliuuseqartoqarnissaanik anguniagaa KNAPK-mit taperserserneqarpoq.
