Pisortaq NiiK-p nersornaasiuttagaanik tunineqartoq
Ane B. Jensen ukiuni 40-ni inuit innarluutillit pillugit qasusuilluni sulisimanera pillugu ukioq manna kisiartaalluni NiiK-mit nersornaaserneqarpoq.
Ane B. Jensen inuit innarluuteqartut pillugit sulinini pillugu nersornaaserneqarpoq.
Assiliisoq: Oscar Scott Carl
NiiK-p nersornaasiuttagaa Nuummi katersortarfimmi aaqqissussami ullumi tunniunneqarpoq.
Nersornaat inunnut, peqatigiiffinnut, suliffeqarfinnut namminersortunut pisortalluunniit ingerlatsiviinut inuit innarluutillit taakkualu ilaqutaasa atugaasa pitsanngorsarnissaannut immikkut ittumik iliuuseqarsimasunut tunniunneqartarpoq.
Nersornaasiisoqarnerani Nuummi katersortarfik inunnik ulikkaarpoq.
Assiliisoq: Oscar Scott Carl
Ukioq manna Ane B. Jensen, Maniitsumi inersimasunut tarnikkut innarluutilinnut ulloq unnuarlu paaqqinnittarfimmi Najugaqarfik Elisibannguami pisortaq, akissarsitinneqarpoq.
Taanna suliani ukiuni 40-ni uummateqarfigalugit, isumassuingaarluni nukissaqangaarlunilu inunnut innarluutilinnut sulisimanera pillugu nersornaaserneqarpoq.
- Minnerunngitsumik inuit innarluutillit ataqqineqarnissaannik sorsuuteqarnermut qujanaq – aamma suliniutit ataqqineqarnissamik asanninnermik, inussiarnernermik quiasaarnermillu tunngaveqartinneqarnissaata aalajangiusimanerannut, NiiK-p nersornaasiineranut tunngavilersuutigineqarpoq.
Inuiaqatigiinnut sunniuteqartorujussuaq
Taanna allaniit sivisunerusumik suliuarsimanera aamma eqqaaneqarpoq. Suliffik sakkortuunik atugassaqarfiusinnaasoq qimmaannarnagu sukataarluni sulisimanera inuiaqatigiinnut sunniuteqarluartoq, NiiK-mit aamma erseqqissarneqarpoq.
- Uummatigitsuunininnut qujanaq, najugaqartunut qamannga pisumik nukissaqarlutit tunniussimanerit takutittarpat. Meeqqatta, qatanngutitta, angajoqqaatta ilaquttattaluunniit ilaat angerlarsimaffiup avataanut inissinneqaraangata qanoq isumakulunnarsinnaatigisoq, NiiK-mi nalunngilarput. Ilaannikkut ungasissumiittarput. Inunnut innarluutilinnut asaqisatsinnut qanigisaasutut inuit ilittut ittut uagutsinnut qanoq pingaaruteqartiginerat qamanngaanniit qujaniarfigaarput.
- Ukiut ingerlanerani tunniusimanerit pillugu NiiK-mi oqaluttuunneqaraangatta qullilisinnaasarpugut. Illit ilimagisanniit annertunerujussuuvoq, NiiK-miit oqaatigineqarpoq.
Ukioq manna kisimi nersornaaserneqarpoq.
