Pisortaq sakkortuumik isornartorsiorneqarneq pillugu: Ajornaatsumik aaqqiissutissaqanngilaq
Innarluutilinnut tunngasunik ingerlatsinermut isornartorsiuinerit pimoorullugit tiguneqartut, Avannaata Kommuniani pisortaq oqarpoq.
Nakkutilliiartortitat angalareernerisa kingorna Avannaata Kommunia arlalitsigut peqqussutinik innersuussutinillu tunineqarsimavoq. Nakkutilliisut nalunaarusiaat kommunip pimoorussassatut tigugaa, pisortaq nassuiaavoq.
Noah Silliman/Tilioq
Avannaata Kommunianut nakkutilliiartorluni angalaneq, meeqqanut inunnullu innarluutilinnut tapersersuinermut inatsimmi sinaakkutissanik kommunip malinninngilluinnarnera pissutigalugu arlalitsigut inassuteqaatinik peqqussutinillu kinguneqartoq, sapaatip-akunnerani matumani Sermitsiap allaaseraa.
Nakkutilliinerup nalunaarusiaa pimoorullugu tiguneqartoq, aammali kommuni arlalitsigut iliuuseqareersimasoq, Ilaqutariinnermut Ingerlatsivimmi pisortaq Aviâja Madsen Sermitsiamut oqarpoq:
- Avannaata Kommuniani nalunaarusiap imarisai pimoorullugit tiguavut.
- Kommunimi assigiinngitsunik suliniuteqartoqareersoq siullertut eqqaarusuppara, taakkuli nalunaarusiami naatsuinnarmik eqqaaneqarput, pisortaq allakkatigut akivoq.
Suleqatigiissitaliorsimasoq
Inuit innarluutillit Avannaata Kommuniani najugallit pisinnaatitaaffigisaminnik sullinneqarnissaat, ikiorneqarnissaat aammalu ikiorsiissutinik allanillu pissarsinissaat qulakkeerniarlugu kommuni suleqatigiissitaliorsimasoq, Avâja Madsen nangilluni oqaluttuarpoq:
- Aalajangigassaqarasuarniarnata aaqqiissutissat assigiinngitsut qanoq kinguneqarsinnaaneri eqqarsaatigeqqissaartarpavut, inatsisinut naapertuuttumik tamanullu iluaqutaasumik aaqqiissutissarsiumalluta, pisortaq oqarpoq.
Ilaatigut sulisussarsiorneq ajornakusoortarmat Kalaallit Nunaanni innarluuteqartut pillugit suliaqarneq ajornakusoortuusoq, taanna oqarpoq:
- Inatsisit amerlasuut paasiuminaatsut, Kalaallit Nunaanni pissutsinut naleqquttuaannanngitsut, tamatumunnga pissutaasut ilagaat.
Ajornaatsumik aaqqinneqarsinnaanatillu aaqqipallanneqarsinnaanngillat
-Pissutaasoq alla – tusagassiuutitigut aamma eqqaaneqareersoq – tassaavoq sulisussanik piukkunnaatilinnik pissarsiniarnerup attassiinnarnissallu ajornakusoornera. Sulisuttali piginnaanngorsarnissaannik iliuuseqarluarpugut, nammineq ilinniartitsisaratta pikkorissarnissamullu kajumissaarisarluta, assersuutigalugu Isumaginninnermut aqutsisoqarfimmit ingerlanneqartunut, Aviâja Madsen oqarpoq.
Nuna tamakkerlugu aaqqiissutissanik siunnersuutinut kommuni ammasoq erseqqissarpaa, ilaatigut inuit innarluutillit illersuisuanit, Pissassarfimmit allanillu suliassaqarfimmik ilisimasalinnit:
- Ajornartorsiutit taakku ajornaatsumik aaqqinneqarsinnaanatillu aaqqipallanneqarsinnaanngillat, kisianni oqaatigineqareersutulli sulissutigaarput, soorluttaaq kommunini allani suleqatikka oqaloqatigikulasarikka, pisortaq oqarpoq.
