Piukkunnartunik ilinniartitsinerup tusagassiutilerineq nukittorsassavaa

Kalaallisut tusagassiornerup pitsaanerulernissaa siunertaralugu, KNR-imi sulisut arlallit piginnaanngorsarlutik ullumikkut aallartissapput.

Kalaallit tusagassiortui TP, Dansk Journalistforbund, UNESCO Danmark, International Media Support (IMS) aamma kalaallit tusagassiorfii suleqatigiilluarneratigut tamanna piusunngortinneqartoq, Kalaallit Nunaanni Tusagassiortut Kattuffiat (TP) ilisimatitsivoq.

Politiken Fondenimit aamma Oak Foundationimit aningaasat iluaqutigalugit tamanna piviusunngortinneqartoq, TP-mi siulittaasoq, Arnaq Nielsen, oqaluttuarpoq:

– Aningaasanik ilinniartitsigasuarnissamut atugassanik aningaasaateqarfinnut qinnuteqarnivut iluatsilluarmata suliniut aallartissinnaalerparput, taamaalillutalu tusagassiortunik kalaallinik amigaateqarneq ukiuni arlaqalersuni tikkuartortarsimasarput iliuuseqarfigisinnaalerparput, Arnaq Nielsen oqarpoq.

Danmarkimi tusagassiornermik ilinniarfik piginnaanillit pikkorissarnissaannik aaqqissuussisinnaanera taamatullu kalaallimik tusagassiortumik ilinniartitsisoqartussaanera, taassuma nuannaarutigaa.

– Tamanna kalaallit oqaasiinik apeqqusiillunilu tusagassiornermik nukittorsaassaaq, oqarpoq.

Suliniut nutaaq KNR-imit aamma nuannaarutigineqarpoq:

– KNR-imiit nuannaarutigaarput sulisutta tusagassiuinermi sakkussanik pikkorissarnissamut periarfissaqarnerat. Tamanna tusagassiuinerup silarsuaani ineriartuutaasussatut isigaarput, radiomi pisortaq nutaarsiassalerinermullu pisortaagallartoq Aminnguaq Dahl Petrussen oqarpoq.

Piukkunnartunik ilinniartitsinerup saniatigut, Sermitsiap KNR-illu illoqarfinnut nunaqarfinnullu, illoqarfiit annersaasa tallimat avataaniittunut amerlanerusunik aallakaatitassiornissamut angalanissaannut aningaasat atorneqarsinnaasut aamma nassaarineqarput.

Nutaarsiassat paasissutissallu allat kalaallisut pissarsiarineqarsinnaanerat pingaaruteqartoq, tamallu oqartussaaqataaneranut tamanna tapersiisoq, TP-p erseqqissarpaa.