Politiit avataanit suliartortitat sineriammi amerlanerussuteqarluartut

Kalaallit Nunaanni Politiit naatsorsuinerata nutaap polititjenstemandit nunatsinneersut avataanillu suliartortitat nunatsinni agguarsimanerat takutippaa. 

Polititjenestemandit politiiupput politiitut ilinniarsimasut. Naatsorsuinermi uani politiit ikiortaat, kommunefogedit allallu politiini atorfeqartut ilanngunneqanngillat.

Naatsorsuinermi takussutissiami nunarput tamakkerlugu polititjenestemandit assigiikannersumik agguarsimanerat takutippaa – nunatsinneersut 91-t avataanillu suliartortitat 103-t. 

Suliffigisalli ataasiakkaat qiviaraanni  assigiiaartumik agguarsimanngillat. Polititjenestemandit nunatsinneersut amerlanerpaartaat Nuummi atorneqarput, taakkulu tamangammik illoqarfinni anginerusuni politeeqarfinnut attuumassuteqarput.

Akerlianik suliffigisanit 18-nit qulini ataasiinnarluunniit nunatsinniinngilaq. Taakkununnga illoqarfiit Maniitsoq, Uummannaq Tasiilarlu ilaapput. 

Folketingimut ilaasortap Naaja H. Nathanielsenip illoqarfinnut agguarlugu politiit oqaatsitigut piginnaasaat pillugu inatsiseqarnermut ministerimut apeqquteqarnerata kingorna naatsorsugaq suliarineqarpoq.

Kalaallit Nunaanni Politiit sulisumik qanoq oqaaseqartuunerat nalunaarsorneq ajorpaa. Nunatsinneersulli avataanillu suliartortitat sulisorisat naatsorsornerat pissutsinik tikkuussisinnaasoq, politiit nalilerpaat.

Nunatsinneersut ilaasa kalaallisut oqalussinnaannginnerat, avataanillu suliartortitat ilaat kalaallisut oqalussinnaanerat sillimmartaarutigalugu, politiit taama oqarput. 

Juunip naanerani naatsorsukkap suliarineqarfianit pissutsit aamma allanngorsimasinnaapput.