Politiit: Ilulissani ikuallanneq Nuummilu qaqqami tigusarinninneq

Ilulissat Kangerluani, Imiliup timaani nuna ippassaq ikuallappoq. Tamannali maanna qaminneqarsimalereertoq, Kalaallit Nunaanni Politiit pigaartuisa pisortaat, Karsten Højrup Kristensen, Sermitsiamut oqarpoq.

- Ippassaq nal. 14.26 Ilulissat Kangerluani, aqqutip tungujortumik taaneqartartup qanittuani,  pinngortitami ikuallattoqarneranik nalunaarutiginnittoqarpoq. Ikuallanneq nunaminertami mikinerusumi 10 x 15 meterisut angissusilimmi, pisimavoq.

- Ikuallattoqarsimanera pissusissamisoortumik pisimasorineqarpoq, immaqa seqernup igalaamineq imaluunniit atortussiat allat ikumasitsilersinnaasut kissatsissimanerisa kingunerisaanik. Qatserisartut sukkasuumik ornigullutik ikuallanneq qamippaat. Ikuallanneq nal. 23.00 missaani tamakkiisumik qaminneqarpoq. Maannakkut sumiiffimmi ikuallattoqarunnaarsimavoq, pigaartut pisortaat oqaluttuarpoq.

Inuit aqqut taanna aqqutigeqqissinnaalereeraat pigaartut pisortaat aamma oqarpoq. 

Qaqqami tigusarinninneq

Kalaallit Nunaanni Politiit marlunngornermi unnukkut nal. 20.34 Nuummi illoqarfiup immikkoortuani, Qinngorpumi, bilertoq pillugu nalunaarfigineqarput. Bilimik ingerlatitsisoq sangusajaarluni ingerlasoq takuneqarpoq. Aquttoq najukkamut iseriarluni anillaqqikkami qaqqamut majuarluni aallarpoq. Politiit sumiiffimmukaramik angut tigusaraat. Bilimi aquttoq imigassartorsimasoq paasineqarpoq.

- Angut taanna tigusarineqarpoq napparsimmavimmukaanneqarlunilu. Tassani aaversippoq. Suliaq pillugu inaarutaasumik aalajangiisoqassaaq aaversinnermi misissuinerup inernera tiguneqareerpat, pigaartut pisortaat oqarpoq.