Politiit mianersoqqusisut: Inuusuttut akornanni nakuusertarnerit amerliartorput

Kalaallit Nunaanni Politiit inuusuttut akornanni nakuusertoqarneranik, nakuusernernillu immiussisoqarsimariarluni internetikkut attaveqaqatigiittarfinni imaluunniit allaqatigiittarfinni aalajangersimasuni siammarterneqartartunik arlaleriarlutik nalaataqarput.

Pisuni arlalinni kattussinerniit immiussaneersuupput.

Nakuusertunik takusut nalaataqartulluunniit iliuuseqartaqqullugit Kalaallit Nunaanni Politiit tusagassiutitigut nalunaaruteqarlutik kaammattuipput:

- Peqatigiilluta inuusuttut isumannaatsumik avatangiiseqarnissaat pilersissinnaavarput, allappoq politiit.

Nakuusernermi immiussineq siammarterinerluunniit pineqaatissiissutaasinnaasut politiit paasissutissiipput.

- Eqimattani ilaaguit isiginnaarlutillu, unitsitsinngikkuit imaluunniit ikiortissarsiorlutit sianinngikkuit, pisuni peqataanertut Pinerluttulerinermik inatsit malillugut nalilerneqarsinnaavoq, Kalaallit Nunaanni Politiit allapput, nangippullu:

- Nakuusernermik takussagaluaruit ikiortissarsiorlutit sianernissat imaluunniit unitsitsiniarluni iliuuseqarnissat pingaaruteqarpoq.

Nakuusertunik takusimagaanni imaluunniit nakuuserfigineqarsimagaanni politiit oqarasuaammut uunga 70 14 48-mut attaveqarfigineqarsinnaapput.