Politiit sapaatip akunnerata naanera ulapaarfiuneraraat

Sapaatip akunnerata naanera politiinut suliassarpassuaqarluni ulapaarfiuvoq.

Pigaartut pisortaata Aqqalu Petersenip sapaatip akunnerata naanera pisut misissorpai, tassanilu ilaatigut persuttaanermik sulianik 13-nik aallartitsisoqarsimanera oqaatigaa.

Taamattaaq pinngitsaaliinernik sulianik sisamanik aallartitsisoqarpoq. Suliat marluk arfininngornermi nalunaarutigineqarput. Ataaseq nunaqarfimmi aappaalu Qaqortumi. Pisuni taakkunani arnat pinerluffigineqarput, pisunilu tamani pasineqartut tigusarineqarput.

Pasineqartut tamarmik iperagaapput, unnerluutigineqarneralli attanneqarpoq, pigaartullu pisortaata suliat misissuiffigineqarnerisa nanginneqarnera oqaluttuaraa.

Politiit aamma 25-eriarlutik angerlarsimaffimmi eqqissiviilliornernut ornigupput. Suliat ilaanni meeqqanik angerlarsimaffimmiittoqarpoq.

Politiittaaq aamma aalakoortut qulit inuillu qulit missaat kissaatigineqanngitsut ornigullutik iliuuseqarfigaat. Tamatuma saniatigut politiit aamma imminornissamik siorasaarisunik nalunaarfigineqarput, politiillu marluk sulianik isumaginninnerminni persuttarneqarput.

Pigaartut pisortat malillugu suliat nuna tamakkerlugu agguataarsimapput.

Politiit Aasiaat eqqaani annaassiniarnernik suliaqarnerat pigaartut pisortaata naggasiullugu oqaatigaa. Aqqalu Petersenili suliaq pillugu maannakkut erseqqinnerusumik oqaaseqarsinnaanngilaq.