Politiit toqusoqarsimaneranik paasiniaanermi innuttaasunit ikioqqusut

Qaqortumi pasinartumik toqusoqarneranut paasiniaanermi politiit innuttaasunit ikioqqupput.

Suliaq Poul Tittussenimut 63-inik ukiulimmut, Qaqortumi Nakkartarfik 1174-imi inimini toqungasoq sapaammi oktobarip 26-ani 2025-mi nassaarineqartumut tunngavoq.

- Politiit ilaquttaasut akuersineratigut Poul Tittussenip toqukkut qimagussup assinga maanna siammarterpaat, politiillu innuttaasut paasiniaanerup ingerlateqqinnissaanut ikioqqullutik qinnuigaat, Kalaallit Nunaanni Politiit allapput.

Ilisimannittunik ujaasisut

Politiit uku pillugit ikioqqupput:

• Politiit inuit Qaqortumi Nakkartarfik 1174-ip eqqaani pasinartumik eqqumiitsumilluunniit oktobarip 26-ani 2025-mi nal. 00.00-miit 17.00-ip tungaanut takunnissimasinnaasut politiinut normumut 70 14 48-mut saaffiginneqqullugit kaammattorpaat.
• Politiit taxartartoq ullormi tassani nalunaaqutaq 07.00-miit 17.00-ip tungaanut Kamikoorfik blok B-mit Nakkartarfik 1174-imut inummik ataatsimik arlalinnilluunniit ingerlatsisimasoq attaveqarfiginiarlugu ujartorpaat.

21-nik ukiulik tigummigallarneqartoq

Politiit suliaq pasinartumik toqusoqarsimasutut misissuiffigaat, nalunaarutigineqarneraniillu annertuumik misissuisoqarsimalluni.

Politiit angut 21-nik ukiulik decembarip naalernerani 2025-mi tigusarineqartoq suliamullu atatillugu unnerluutigineqartoq paasissutissiissutigaat, eqqartuussivimmut sassartinneqareerlunilu Eqqartuussisoqarfik Kujallermi ulluni 28-ni tigummigallarneqarpoq.