Politikerit takkutinngittarnerat akeqassaaq – aamma Qeqqata Kommuniani
Qeqqata Kommuniani kommunalbestyrelsimi ilaasortat ataatsimeeqataanngitsut aningaasarsiaannik ilanngaavigineqartalissapput. Rachel Ingemann (D) siunnersuuteqareersorlu kommunalbestyrelsimi ilaasortat tamanna aalajangerpaat.
Kommunimi politikerit ataatsimiigianngitsoortarnerat akissarsiaannut ilanngaataasalissasoq Qeqqata Kommuniani kommunalbestyrelsimi ilaasortap Rachel Ingemannip (D) siunnersutigaa.
Assi: Tôrtia Reimer-Johansen
Illoqarfiit pingaarnersaanni politikerit ataatsimiigiarneq ajortut peqataasinnaannginnerminnillu nalunaarutiginninngitsut aningaasarsiaatigut kinguneqartarlernerat eqquteqqaarneqarpoq.
Maanna Qeqqata Kommuniani assingusunik malittarisassaliortoqalerpoq. Kommunalbestyrelsimut ilaasortap Rachel Ingemannip (D) siunnersuuteqarneratigut tamanna pivoq:
- Tassunga tunngavilersuutigaara nalinginnaavallaaqimmat peqataanngitsoortoqartarnera, naatsumik oqaatigalugu ajornanngippallaaqaaq akissarsiaqaatigalugu “sulinngitsoorneq”, politikeri allappoq. Peqquteqarlunili ataatsimeeqataasinnaannginnerit allaasut ilanngullugu naqissuserpaa.
Quleriarluni nalunaarani ataatsimeeqataanngitsoqartoq
Kommunimi ingerlatsivimmit siunnersuut misissorneqarpoq, politikkerillu qanoq amerlatigisut ataatsimiigianngitsoortarnersut naatsorsorneqarluni.
2025-mi nalunaaruteqarani ataatsimiinnerni peqataannginnerit quliupput. Piffissami pineqartumi 25-riarluni ataatsimiittoqarpoq.
Aningaasarsianit ilanngaasoqartalerpat sinaakkuteqarnerulerluni pisariaqanngitsumik peqanngittarnernik pinaveersaartitsisinnaavoq, kiisalu allat piffissaannik ataqqinninnerulertoqarsinnaasoq ingerlatsivik naliliivoq.
Kommuneqarfik Sermersooq assigalugu ataatsimiinnerni peqataannginnerit akissarsianit 569,70 koruuninik ilanngaatigineqartarnissaat, kommunalbestyrelsimi ilaasortat novembarip 27-ani ataatsimiinnerminmi akuersissutigaat.
