Donald Trumpip oqaatigisaqattaarpaa USA-p isumannaallisaanermut tunngatillugu Kalaallit Nunaat pisariaqartikkaa.
Amerlasuulli oqaaseqaatit taakku paasiuminaatsippaat, USA-mi illersorniarluni Kalaallit Nunaanni sakkutooqarnissamut annertuumik pisinnaatitaaffeqareermat.
Donald Trumpip oqaatigisaqattaarpaa USA-p isumannaallisaanermut tunngatillugu Kalaallit Nunaat pisariaqartikkaa.
Amerlasuulli oqaaseqaatit taakku paasiuminaatsippaat, USA-mi illersorniarluni Kalaallit Nunaanni sakkutooqarnissamut annertuumik pisinnaatitaaffeqareermat.
Københavnip Universitetiani nunat tamalaat akornanni politikkimik professori Ole Wæver Sermitsiamut oqarpoq Trumpip Kalaallit Nunaat sammilermagu pissutaasimagunartoq USA-mi ukiuni amerlasuuni præsidentitut siullerpaamik nunap annertusarnissaanik takorluugaqarnera:
- Kalaallit Nunaanni Danmarkimilu isumaqartoqarpoq isumannaallisaanissaq imaluunniit pisuussutinik tiguaaniarneq pissutaanerpaasut. Tamannali paasinarsinngilaq. Taamaattumik nassuiaat eqqumiinnerusoq tikkuarpara, tassa USA-p anginerulernissaa siunertaasoq, Ole Wæver Sermitsiamut oqarpoq.
- Canadamut tiguaaniarneq iluaqutaanngilaq
Tamannalu pissutigalugu Kalaallit Nunaat ajoraluartumik ilungersunartumik inissisimalerpoq:
- Ajoraluartumik Kalaallit Nunaat ajornartorsiuteqarpoq, Donald Trumpip nunaminik alliliinissamik takorluugaanut ilaatinneqarami.
- Kalaallit Nunaat periarfissatuaavoq, Ole Wæver oqarpoq.
Taanna nassuiaavoq USA Venezuelami præsidentimik sakkutuulersorluni peersitsigaluartoq Trumpillu nunat allat arlallit, ilaatigut Canada Panamalu, sioorasaarsimagaluarai, taamaattoq Kalaallit Nunaat immikkut inissisimaffeqartoq:
- Venezuela ilanngussimanngilaa Canadalu ilanngussinnaanagu, taamaattumik annertunerusumik oqartussaassuseqarniarluni aalajangeruni Kalaallit Nunaat periarfissatuaassaaq, taamaattumillu tatineqarneq tamanna annikilleriaannanngilaq.
Ilisimasaqarneq imaannaanngitsumik killeqartoq
Ole Wæver naliliivoq Donald Trumpip Kalaallit Nunaat pillugu oqaasii tunngavissaqarpianngitsut, taamaattumillu isumaqarpoq Kalaallit Nunaanni uippallernissatsinnut pissutissaqanngitsoq:
- USA-mi tamanna ajornartorsiutaanngilaq, taamaattumik utaqqisariaqanngikkaluarput.
Ole Wæver isumaqarpoq Kalaallit Nunaat Danmarkilu sioorasaarinermut qisuariarnermikkut eqqortumik iliuuseqarsimasut, ilaatigut nunat iligisat Kunngeqarfimmik tapersersuinissaannut kajumissaarillutik aamma Trumpimut takutinniarlugu Kalaallit Nunaata ilanngunneqarnera Nato-mut akisoorujussuullunilu aseruisinnaasoq.
Ole Wæverip Kalaallit Nunaata inissisimaffia pillugu ima oqarpoq:
- Isumaqarpunga Kalaallit Nunaannut pingaaruteqarluinnartoq erseqqissaatigineqartuartariaqartorlu kalaallit USA-mi innuttaasunngorusunngitsut.
- USA-mi tamanna pillugu ilisimasaqanngilluinnartoqarpoq, tassa imaappoq Amerikamiut assigiinngitsorpassuarnik upperisaqarput, paatsiveerusimaarnermilu Kalaallit Nunaanni kisimi namminiilivinnissamik kissaateqarneq oqaatigineqarsinnaavoq – Danmarkilu tamanna pillugu attaveqarfigisariaqarlugu.
- Amerikamiorpassuit isumaqarput nunarsuarmi kikkut tamarmik Amerikamiunngornissartik kissaatiginerpaagaat. Taamaattumik oqaaseq "qujaannarpunga" nipituuliutigineqartariaqarpoq.
USA-mik isumaqatiginninniartoqannginnissaa innersuutigingaa
Naalakkersuisut aamma kalaallit politikerit allat Trumpip oqaasii pillugit Amerikamiut oqaloqatigerusuppaat.
Ole Wæver isumaqarpoq Amerikamiut sunik kissaateqarnerannik paasiniaanissaq pitsaasuussasoq, kisianni Kalaallit Nunaata nammineerluni imaluunniit Danmarkip Kalaallillu Nunaata ataatsimoorlutik USA-mik isumaqatiginninniarnissaanik sakkortuumik kaammattuutiginngilaa:
- Nunat tamalaat akornanni politikki nunallu avannarliit mikinerit nunanut allanut politikkimi misilittagaat naapertorlugit maleruagassaq atoruminartuaannartoq tassaavoq nunat mikisut angisuullu isumaqatigiinniarnerni kisimiillutik peqataaffigisassanngikkaat.
- Taama assigiinngitsigaluni isumaqatigiinniarnissamut piareersannginnermi eqqarsarluaqqaartariaqarpoq. Kalaallit Nunaat Danmarkillu iluaqutiginerussavaat nunat allat peqataatillugit isumaqatigiissuteqartoqarpat, Ole Wæver oqarpoq, Amerikamiut paasilluarnerorusunneqarnerat paasisinnaalluarpaa – tassa nalunaarutaat paatsiveerusimaarnarmata isumaliutersuutaallu tunngavissaqaratik.
Ole Wæver aamma mianersoqqusivoq isumaqassagutta USA-p Kalaallit Nunaata namminiilivinnissaanut aqqut sukkasuumik ingerlaviusoq tikkuarsinnaagaa:
- Maannakkut inatsisitta uppernarsarpaa kalaallit inuiaqatigiittut namminneq aalajangiisinnaatitaasut, taamaaliornissarlu piumaneqarpat erngertumik iliuuseqartussaasugut, Ole Wæver oqarpoq nangillunilu:
- USA-mut ilaasortanngorsimagaanni aneqqittoqarsinnaanngilaq.
