Psykoterapeauti imigassamik inerteqquteqalernerup kingorna kingunerluutit pillugit: Aalakoornartutorusussuseq sakkortoorujussuusinnaavoq

Inuit imigassamik pinngitsuuisinnaanngitsut, soorlu Kommune Kujallermi pisutut ittumi, tassanngaannaq imigassartorsinnaajunnaaraangamik, peruluttutut ajornartorsiorlutik aqqusaagaqarsinnaasarput, tamannalu inuiaqatigiit iliuuseqarfigissallugu tamarmik akisussaaffigaat, psykoterapeuti aamma naalliuutinik katsorsaasartoq Andrie Sørensen, ukiuni 26-ni imigassartorsimanngitsoq, oqarpoq.

- Timip imigassagulluni "nillianera" sakkortoorujussuusinnaavoq.

- Pisariaqartitamik soorlu kaannerujussuarmik matussuserneqartumikh qisuariarnermut assersuunneqarsinnaavoq. Timikkut pinngitsuuisinnaajunnaarneq piumassutsimut nukittussutsimullu kisimik attumassuteqanngillat, timikkulli qisuariarnerupput katsorsarneqartariaqartut, oqarpoq innersuussillunilu Patienthåndbogi naapertorlugu imigassamik pinngitsuuisinnaajunnaarnerup malitsigisinnaasai tassaasut sajunneq, kiagunneq, isumakulunneq, paatsiveerusimaarneq, takusuusinerit noqarnerillu, pinasuartumik nakorsamit ikiorserneqartariaqartut.

Imigassamik inerteqquteqarneq ilaqutariinnut assigiinngitsunik marlunnik kinguneqarsinnaavoq. Angerlarsimaffiit ilaanni eqqissiviilliornerit sumiginnaanerillu unikkallarnissaat pisariaqartinneqavissoq misigineqarsinnaavoq, meeqqanillu toqqissisimatitsilluni, angerlarsimaffinnili allani iliuusissaaleqinermik eqqissiviilliornermik aaqqiagiinnginnernik ilaannilu tarnikkut timikkullu nakuusernermik kinguneqarsinnaasartoq nassuiaavoq.

Misigissutsit artornartut aalakoornartup oqinnerulersittarpai

Aamma aalakoornartoq misigissutsinik atornartunik, ilukkut eqqissiviilliornermut, avatangiisinit tatineqarnermut naalliuutinilluunniit oqinnerulersitsinermut pinngitsuuisinnaajunnaarsimasunit atorneqarsinnaavoq, aalakoornartuerukkaangalli malunnarnerulertartoq Andie Sørensen nassuiaavoq.

Ukiuni 30-ni ilinniartitsisutut misilittagaqarami meeqqanik imigassamik ajornartorsiuteqartunik angajoqqaalinnik naapitsisarnini pissutigalugu misilittagaqarpoq, namminerli aamma uniinnarsinnaannginnini pissutigalugu katsorsarneqarsimanini iluaqusiullugu ukiuni 26-ni aalakoornartulimmik imigassartorsimanngilaq. ukiorpassuarnilu inuuneq aalakorfiunngitsoq attatiinnarniarlugu AA iluaqitigisimavaa.

Taassuma psykoterapeautitut erseqqissarpaa imigassaq inummut ataasiakkaanut qanoq sunniuteqartarnera paasissallugu pingaaruteqartoq:

- Misigissutsit ilungersunartut qamuunaluunniit eqqissiviilliornerit anigorniarlugit atortaraanni, taava pingaaruteqarpoq allatut anigorniarnissaanut ikiorneqarnissaq, oqarpoq erseqqissarlugulu pinngitsuuisinnaajunnaarsimasoq ilaqutaalu tapersersorneqartariaqarlutillu ataatsimoortinneqartariaqarlutillu toqqissisimasariaqartut:

- Imigassaq aangajaarniutillu allat kisiisa qimaaffissaanngimmata, eqqissinissamut imminullu aqunnissamut allarpassuarnik aamma periarfissaqarpoq.

Inerteqquteqarneq kisiat atornagu ersarissumik iliuusissatut pilersaaruteqartariaqarnera, pinasuartumik ikiorserneqarnissamik aamma sivisunerusumik katsorsarneqarnissamik aamma periarfissaqartariaqarnera oqartussaasunit eqqumaffigineqartariaqartoq taassuma aamma tikkuarpaa:

- Unillatsiarneq eqqarsaatissiisinnaavoq, pisup ilungersunassusaanik uisitsillunilu tusagaqarfiusinnaavoq. Imigassamik inerteqquteqarneq imigassarsinissamut killilersuutaasinnaavoq, kisianni pinngitsuuisinnaajunnaarnermut ikiorneqarnissaq ajornartorsiutillu sorlaat pillugit ikiorserneqarnissaq pisariaqarpoq. Qanigisaasut kisimiillutik akisussaaffimmik tigusinnginniassammata. Tamatta akisussaaffeqarpugut: aalajangiisartut, politiit, kommunit, peqqinnissaqarfik, katsorsaanermik suliaqartut inuiaqatigiillu sinneri aamma, taanna nassuiaavoq.