Ukiut 73-it matuma siorna Qaanaaq pilersinneqarmat illut napparneqarsimasut ataasiinnarmik initaqartut, toqqaannarlu imermut attaveqanngitsut suli najugarineqarput.
Illuni pisoqqani mikisunnguanilu najugaqartut ilaat, ilaquttani, kammalaatini nalunngisaniluunniit inissiaminniit anisitaasimasut imaluunniit sumiffissaaruttut inisimasorisarlugit, angut kinaassutsimik isertuusserusuttoq, uanilu allaaserisami ”Poul”-imik taagugassarput Sermitsiamut oqaluttuarpoq (angutip kinaassusaa aaqqissuisoqarfimmit ilisimaneqarpoq).
Ukiut 73-it matuma siorna Qaanaaq pilersinneqarmat illut napparneqarsimasut ataasiinnarmik initaqartut, toqqaannarlu imermut attaveqanngitsut suli najugarineqarput.
Illuni pisoqqani mikisunnguanilu najugaqartut ilaat, ilaquttani, kammalaatini nalunngisaniluunniit inissiaminniit anisitaasimasut imaluunniit sumiffissaaruttut inisimasorisarlugit, angut kinaassutsimik isertuusserusuttoq, uanilu allaaserisami ”Poul”-imik taagugassarput Sermitsiamut oqaluttuarpoq (angutip kinaassusaa aaqqissuisoqarfimmit ilisimaneqarpoq).
- Inigisannut adresseqartinngikkaluarlugit, ikiorniarlugit ajunngitsuliorniarlungalu, anisitaasimallutik sumiiffissaarullutilluunniit uanniikkusullutik saaffiginnikkaangata inoqatikka tikilluaqqusarpakka, Poul oqarpoq.
Peqqissutsimut navianaateqartoq
Ullutsinnullu naleqqukkunnaarsimasuni najugaqarneq peqqissutsimut akornutaasinnaasoq, Steven Arnfjord Ilisimatusarfimmi angerlarsimaffeqanngitsuuneq pillugu ilisimatusartoq oqarpoq.
Angerlarsimaffimmi adresseqartitsinani inisimasoqarneq - takuneqarsinnaanngitsumik angerlarsimaffeqanngitsuunermik oqaatigisariaqartoq, Steven Arnfjord aamma oqarpoq.
- Pisoqalisimasuni ullutsinnullu tulluarunnaarsimasuni najugaqarneq inuup atugarissaarnissaanut peqqissusaanullu kingunerlussinnaavoq, Steven Arnfjord, nassuiaavoq.
Steven Arnfjord, angerlarsimaffeqanngitsuuneq pillugu Ilisimatusarfimmiit ilisimatusartoq, saamerleq. Sofie Thomassen, ilisimatusarfimmi socialrådgiveritut atuaatigaluni ilisimatusarnermut ikiorti, qiterleq. Nannga Kleist-Johansen, ilisimatusarfimmi socialrådgiveritut atuaatigaluni ilisimatusarnermut ikiorti, talerperleq.
Assi: Masauna Peary
Illut pisoqalisimasut ukiukkut nillertaqisut, kiassarnissaallu akisusartoq, Steven Arnfjord aamma oqarpoq.
- Illut pisoqalisimasut suertuusarput, ukiuunerani igalaakkut nilleq isaasarluni. Artornarsimassaaq akisullunilu illumi pisoqqami najugaqarneq, illunilu pisoqqani najugaqarneq pitsaasuujuaannanngilaq, Steven Arnfjord oqarpoq.
Qinikkap misissuinissaq pisariaqartikkaa
Illut 1953-imi sananeqarsimasut qassit suli najugaqarfigineqarnersut misissuiffigineqartariaqartoq, Avannaata kommuniani qinigaasoq, teknikkimullu ataatsimiititaliami siulittaasoq, Sakio Fleischer (S) isumaqarpoq.
- Misissuisoqassappat aningaasaliisoqartussaassaaq. Torrutiinnarlugu oqaatigisinnaanngilara misissuisoqassanersoq imaluunniit ukiormanna aningaasaliissutaareersut iluini misissuisitsineq ingerlanneqarsinnaanersoq, Sakio Fleischer oqarpoq.
Illut 1953-imi Uummannatoqqamiit Qaanaamut nuutsitsisoqarnerata kinguninngua sananeqarsimasut, suli qassit najugaqarfigineqarnersut misissuiffigineqartariaqartoq, Sakio Fleicher (S), assimi saamerleq, Avannaata Kommuniani teknikkimut ataatsimiitialiami siulittaasuusoq oqarpoq.
Ass: Leiff Josefsen
Illullu 1953-minngaanneersut peqqissuseq eqqarsaatigalugu najugaqarfigineqarsinnaanersut nammineq pigilerneqarsimappata piginnittuisa namminneerlutik misissortittariaqaraat, Sakio Fleischer oqarpoq.
- Soorunami kommunip inissiat 1953-minngaanneersut akisussaaffigippagit, illut najorneqarsinnaanerinut peqqinnarnersut misissuiffigineqassappata, kommunimut tamanna aningaasartuutaasussaassaaq, Sakio Flescher oqarpoq.
Inissiat nutaaliaasut akikitsullu
Avannaata Kommuniani kommunalbestyrelsemut ilaasortaq, Ujuut Olsenip (S) Qaanaami Kullorsuarmilu inuusuttunut inissianik pilersitsinissamik siunnersuutaa, kommunip sanaartornissamut kissaatigisaanut ilanngunneqassasoq, ukiarulu ukiumoortumik missingersuutinut isumaqatigiinniarnernut atatillugu suliarineqartussanngorlugu, Avannaata kommuniani kommunalbestyrelsip 27. Marts 2026 ataatsimiinnermini akuersissutigaa.
Avannaata kommuniani kikkut tamarmik innuttaasut pitsaasumik atugaqarnissaat politikkikkut pingaartinneqartoq, Sakio Fleischer oqarpoq.
- Ullutsinni naleqquttunik najugaqartitsinissaq assut soorunami uagut aamma Avannaata kommuniani politikkikkut suliniarnitsinni pingaartipparput. Qinigaaffiullu uumap (2025-2029) ingerlanerani inuusuttunut inissialiortoqarsinnaanissaa neriuutigaara, Sakio Fleischer oqarpoq.
Inissiat akikitsut nutaaliaasullu
Illumi ullutsinnut naleqqutinngitsumi najuaqaraluarluni, Avannaata Kommuniata Qaanaami inuusuttunut inissialiornissamik takorluugaqartoqarnera ajoriffissaqartinnagu, Poulip 40-rut sinnerlugit ukioqartup oqaatigaa.
- Inuusuttunnguit meerartaarsimasut sulili angajoqqaaminni najugaqartut, inissialiorfigineqassappata qutsannassagaluarput, Poul oqarpoq.
Inuusuttut kisimik inissaaleqinngitsut, tamanillu najorneqarsinnaasunik akikitsunnguanik nutaaliaasunillu inissialiortoqartariaqartoq, Poul oqariartuuteqarpoq.
- Soorlu siusinaartumik pisartagalinnut imaluunniit tamanut atugassanik, akikitsumik attartorneqarsinnaasunik nutaaliaasunillu inissialiortoqarnissaa kissaatigaara. Illutoqqat pisoqalisimasut isateriarlugit, nutaanik taarsersorneqarsinnaagaluarput, Poul oqarpoq.
Illu 1953-ip kingorna sananeqarsimasoq nammineq pigisarilersimallugu, siusinaartumillu pisartagaqarnini tunngavigalugu nutarterneqarnissaanut nammineerluni akissaqarnani, Poulip oqaatigaa.
- Ukiut marluk pingasulluunniit matuma siorna kommunimut saaffiginnissimagaluarpunga nutarterinissara pillugu, kisianni ullormanna tikillugu akissutisinngisaannarpunga, Poul oqarpoq.
