Qallunaat qeqertaannit ujarannguunnerit nunarsuarmioqatigiit kingornussassaannut allattuiffimmut ilanngunneqartut

Arfininngormat Qallunaat Nunaanni pinngortitap ilaa Unescop nunarsuarmioqatigiit kingornussaannut allattuiffianut ilanngunneqarpoq.

Ujarannguunnerit 55-56 millioninik pisoqaassusillit Limfjordip kitaatungaaniittut allattuiffimmut ilanngunneqarnissaat Verdensarvskomitép aalajangerpaa.

Unesco Naalagaaffiit Peqatigiit ilinniartitaanermut, ilisimatusarnermut kulturimullu suliniaqatigiiffigaa.

Ilanngussineq aalisakkanik, timmissanik saanilunnillu ujarannguunnernut, Morsimi Hanklitimiittunut Furimilu Knudeklintenimiittunut immikkut tunngavoq.

Ippiit taakku marluk ingammik timmissanik ujarannguunnernik aserutsaalineqarluartunik peqarnera pissutigalugu ilanngunneqartut, Kulturministeria tusagassiutinut nalunaarummi allappoq.

Ippinni ujarannguunnerit taamaalillutik qangarsuaq nunarsuup issusianik immikkuullarissumik takussutissiipput, kulturimut ministeri Zenia Stampe nalunaarummi allappoq.

- Alutornartorujussuuvoq. Danskit takornariallu amerlanerit sapaatip akunnerata naanera sivisooq feeriarnertilluunniit atorlugit ippiit misigisassarsiorfigiumaaraat neriuutigaara, taanna oqarpoq.

Ujarannguunnerit arfininngormat ullaap tungaani Unescop Verdensarvskomitéa Koreami Kujallermi Busanimi ataatsimeersuarnerani ilanngunneqarput.

Tassani piffiit 30-t, Qallunaat Nunaanni ippiit ilanngullugit, nalilersuiffigineqarput.

Pinngortitamik kulturimillu piffiit innersuunneqartut ataatsimeersuarnermi komitép saavani nalilersorneqarput, kingornalu siulittaasup Korea Kujallermeersup, Lee Byong Hyunip, innersuunneqartut ataasiakkaarlugit kaattamik kaassinermigut ilanngutitertippai.