Qallunaat quliugaangata sisamat Trumpip sakkutuulersorluni saassussinissaanik isumaqarput

USA Donald Trumpip præsidentiunerani Kalaallit Nunaannik sakkutuulersorluni saassussinermik aallartitsissasoq, qallunaat quliugaangata sisamat isumaqarput.

Taama isumasiusitsisarfiup Voxmeterip Ritzauimut isumasiuisitsinera takutitsivoq.

Isumasiusitsineq piffissap 6. – 9 januaarip akornanni apeqqutit akisassat atorlugit isumasiuinermi suliarineqarpoq.

Katillugit 1005-p apeqqutinut akisassanut akissuteqarput.

USA Donald Trumpip præsidentiunerata nalaani Kalaallit Nunaannik sakkutuulersorluni saassussissanersoq pillugu apeqqummut, 10 procentit oqaatigisamut ”isumaqataasorujussuullutik” akipput.

28,3 procentit oqaatigisamut ”isumaqataallutik” akipput.

Akerlianik 28,6 procentit ”isumaqataanatik” imaluunniit ”Isumaqaanngitsorujussuullutik” akipput.

Amerikamiut præsidentiat Donald Trump piffissami kingullermi Kalaallit Nunaata USA-mut ilanngunnissaanik kissaateqarnini uteqqillugu oqaatigaa.

Kingullermik tallimanngormat Det Hvide Husimi Kalaallit Nunaannik soqutiginninnini tusagassiortunut erseqqissarpaa.

- Isumaqatigiissusiorusuppunga. Tassa iliuusissaq ajornaannerpaaq. Ajornaannerpaamik aaqqissinnaanngikkutsigu sakkortunerpaamik iliuuseqassaagut (tuluttut "If we don't do it the easy way, we're going to do it the hard way", aaqqiss.), nutaarsiassaqartitsivik AFP malillugu Trump oqarpoq.

USA-p Kalaallit Nunaannik nakkutiginnilernera nunap isumannaatsuuneranut pingaaruteqartoq, Amerikamiut præsidentiat arlaleriarluni oqartarpoq.