Qallunaat timmisartui sorsuutit Kalaallit Nunaanni sungiusartut

Qallunaat timmisartui sorsuutit F-35 marluk franskillu timmisartuat orsussamik assartuut nunatta kujataata kangiani tallimanngornermi pilersaarutit malillugit sungiusarput.

Illersornissaqarfiup tusagassiuutinut nalunaarutaani taama allassimavoq.

Timmisartortartut timmisartuminnut orsussamik ikkussuinerat, ungasissumut timmisartornerat issittumilu pissutsini ilungersunartuni isumannaatsuunissaq sungiusaataasutut oqaatigineqarpoq.

Qallunaat timmisartui sorsuutit Jyllandip kujasinnerusortaani Skrydstrupimiit Nunatta kangiata sineriaani Kulusummut toqqaannartumik ingerlaarput.

Timmisartoq franskit sakkutuuisa timmisartoqarfiannit Frankrigip kujataaniittumit sungiusariarluni ingerlaarpoq, sungiusarnerlu naammassimmat ingerlaannaq uterluni.

Sakkutuut sungiusarnerminni Savalimmiut aamma qanillisimagaat, Illersornissaqarfik ilisimatitsivoq.

Danmark Frankrigilu siorna assingusumik sungiusarput, sungiusarnermi danskit timmisartui F-16 atorneqarlutik.

Sungiusarnerit Issittumi silaannarmi suliaqarnerup annertusarneqarneratut isigineqassapput.

Illersornissaqarfik naapertorlugu issinnerusumi ilungersunarnerusumilu ingerlatsisinnaanermut misilittakkat annertusarneqarput.

Sakkutuut Issittumi nunakkut, imaatigut silaannakkullu sungiusarnitik ingerlatissavaat.

Timmisartut sorsuutit F-35-t timmisartullu orsussamik assartuutit suli takussaasarallassasut aamma nalunaarutigineqarpoq.

Tallimanngornermi sungiusarnerit ingerlanneqarput Danmarkip Natomilu nunat arlallit Kalaallit Nunaannut sakkutuuminnik tikisitsiortornerisa nalaanni.

DR naapertorlugu timmisartut assartuutit Danmarkimeersut, Frankrigimeersut Tysklandimeersullu qallunaat europamiullu sakkutuuinik Kalaallit Nunaannut tikisitsipput.

- Suliaq annertusivoq sakkutuullu maannamut misilittagaat killeqarlutik, kinaassutsiminik ilisimatitsinngitsoq DR-imut oqarpoq.

Tusagassiorfik allappoq sakkutuut malersuutit nunatsinnut tallimanngornermi tikissimasut.

Timmisartut sorsuutit F-35 marluk Kalaallit Nunaannut aamma aallartinneqarput, timmisartorlu ilaasartaat Boeing sakkutuunik „amerlanerusunik“ ilaasoqarluni Nuummut mippoq.

Illersornissamut ministeriaqarfik aamma Kalaallit Nunaata naalakkersuisui pingasunngornermi tusagassiortunik katersortitsinermi sakkutooqarnerulernissaq pillugu nalunaaruteqarput.

Sakkutuut Nato-mi ilaasortaasut arlallit qallunaat sungiusarnerannut „Operation Arctic Endurance“-mut peqataassapput.

Siunertaavoq Natop Issittumi sunniuteqarnerunissaa Europami Atlantikullu illuatungaani isumannaallisaanermut iluaqutaasumik.

Norge, Sverige Tysklandilu illersornissamut sakkutuunik qeqertamut aallartitsipput, USA-lli naalakkersuisuisa Kalaallit Nunaat suli tigurusuppaat.