Qaqortumi mittarfittaassaq ammarpat unnuiffissat amigaataalissasut
Kujataani silaannakkut angallanneq allanngorpat Qaqortumi unnuiffissat amerlanerusut pisariaqalissapput.
Takornariaqarneq ineriartuinnassappat Qaqortumi 2031-mi unnuiffissat 30-60-it amigaatigineqassapput.
Assi: Marco Fisker - Visit Greenland
Qaqortumi mittarfik nutaaq 2026-mi upernaakkut atulissaaq, tamatumalu malitsigisaanik takornariat amerlanerusut unnuiffissat neriffissallu pisariaqartilissavaat.
Innovation South Greenlandip misissuinerani nutaami illoqarfiup takornariaqarnerulernissaanut unnuiffiusinnaasut amerlineqartariaqartut takutippaa.
Innovation South Greenland tusagassiuutitigut nalunaarummi allappoq. Innovation South Greenland tassaavoq Kommune Kujalliup inuussutissarsiornermik siuarsaanermut ingerlatseqatigiiffia.
Qaqortumi ullumikkut 143-nik ineeraqartoq, taakkuali affaasa missaa soorlu ilinniarnertuunngornianut imaluunniit ininik attartortittakkanut atorneqarmata takornarianit unnuiffigineqarsinnaanngitsut, misissuinermi paasineqarpoq.
Takornariaqarneq taama ingerlaannassappat 2031-p tungaanut unnuiffissat 30-60-it amigaatigineqassapput, qanoq sukkatigisumik ineriartortoqarnera apeqqutaalluni. Nuummi unnuiffissaaleqineq misigineqareersoq pinaveersaartinneqassappat akunnittarfinnut, unnuisarfinnut assigisaannilluunnuut allanut aningaasaliisoqartariaqarpoq.
- Sulinerit maanna aallartittariaqarpugut oqallinnermiit iliuuseqartoqartariaqalerpoq, borgmesteri Malene V. Rasmussen oqarpoq.
Takornariat 70 procentiusut
Air Greenlandip Icelandairillu 2026-mi aasakkut Qaqortumut timmisartuussisarnitik amerliniarlugit nalunaarutigaat. Air Greenland takornariaqarnerpaaffiusumi sapaatip-akunneranut 17-eriarluni Nuummiit Qaqortumut timmisartuussisalerniarpoq, Icelandairilu Keflavikkimiit sapaatip-akunneranut sisamariarlutik timmisartuussisalerniarlutik.
Tamatuma kingunerisaanik timmisartut kujataanut tikittartut 15,9 procentimik amerlissapput, taamaalillunilu nunap immikkoortuanut tikeraat amerlanerulersinnaasut Innovation South Greenland allappoq.
Qaqortumi mittarfik suluusalinnut mittarfinngorpat kujataani silaannakkut angallannermi qitiusoq allanngussaaq. Tassa Narsarsuup mittarfia qulimiguulinnut mittarfinngussalluni. Narsarsuarmi misilittakkat takutippaat timmisartumik angalasut 70 procentii takornariaasartut. Taamatut ingerlaannartoqassappat Qaqortumi unnuisartut ukioq manna siullermiilli amerliartupiloornissaat naatsorsuutigineqarsinnaavoq.
- Qaqortumiit takornariat amerlanerusut tikissinnaalernissaat pissusissamisoorpoq, kisiannili nunap immikkoortuani tamarmi periarfissarpassuaqarpoq. Maanna ataatsimoorluta siniffissanik neriffissanillu pilersitsisariaqalerpugut kujataalu tamakkerlugu misigisassaqartitsiffissanik pilersuilluta, ISG-mi pisortaq Miki Jensen oqarpoq.
Qaqortumi mittarfik ammarpat kujataani tamarmi angallannermi nutaamik periuseqalissaaq periarfissanillu nutaanik pilersitsisoqassasoq misissuinerup takutippaa. Takornariaqarnermi periarfissat tamakkiisumik atorluarneqarsinnaassappata ingerlatsisut tamarmik suleqatigiittariaqarput.
