Qaqortumi mittarfiup qaqugu ammarnissaa Greenland Airportsip pisortatigoortumik nalunaarutigaa
Tamanna ilimagineqareersimavoq, maannali Qaqortumi apriilip 16-iat pisortatigoortumik ammaanersiorfiussasoq Greenland Airportsip uppernarsarpaa. Ilulissani ammaanersiornissaq kingusinnerusukkuttaaq 2026-mi paasissavarput.
Qaqortumi mittarfik nutaamik 1500 meterisut takitigisumik mittarfeqarluni apriilimi ammassaaq.
Assi: Greenland Airports
Qaqortup mittarfittaarnissaa qanilliartortillugu Greenland Airportsip ulloq ammarfissaq maanna aalajangerpaa: sisamanngorneq apriilip 16-iat 2026.
– Aap, ulloq taannarpiaq anguniagaraarput, pisortaaneq Jens R. Lauritzen Sermitsiamut uppernarsaavoq.
Siusinnerusukkut eqqaaneqartutut Air Greenlandip apriilip 16-ianiit Nuummiit Qaqortumut timmisartuussinissai inniminniiffigineqarsinnaalereerput.
Taamaammat sooq Greenland Airportsip ulluliussap nalunaarutigineqarnissaa taama kingusitsiginersoq pisortaq aperaarput.
– Nuup mittarfiani ajornartorsiuteqarneranit ilikkakkatta ilaattut taaneqarsinnaavoq. Eqquutsissinnaasatsinnik pilersaarusioqqaarluta suut nalunaarutigissanerlugit mianersuutigisariaqarparput. Suut tamarmik suli allanngorsinnaapput, taamaammallu ulloq kinguartittariaqarsinnaavarput, Jens R. Lauridsen akivoq.
Kujataaniit avannaaniillu nutaarsiassat
IIulissat pilersaarutit malillugit oktobarimi 2026-mi Atlantiku qulaallugu timmisartuussinernut mittarfimmik nutaamik 2026-mi oktobarimi ammaassasoq Greenland Airportsip aamma uppernarsarsinnaavaa. Tamanna aamma ilimagineqareerpoq.
Greenland Airportsip oktobarimi qaqugorpiaq ammaanersiortoqarnissaa nalunaarutiginikuunngilaa. Pilersaarutilli malinneqassappata oktobarip aallaqqaataat 29-allu ilimanaateqarsinnaapput. Kinguartitsisoqassagaluarpat novembarip 26-at ammaanersiorfissatut ilimanarsinnaavoq.
Ullut taakku tassaapput AIRAC- ullunik taaneqartartut, ullut 28-kkaarlugit sisamanngornerit. Ulluni taakkunani silaannakkut angallannermut tunngasut nunarsuaq tamakkerlugu nutarterneqartarput. Taamaammat mittarfinnik ammaasarneq ullunut AIRAC-inut naleqqussarneqakkajuppoq.
Qaqortumi 2026-mi apriilip 16-ani ammaanissaq pilersaarutaasoq AIRAC-ittaaq ulluanut inissinneqarpoq, Nuummilu 2024-mi novembarip 28-ani ammaanersiorneq aammattaaq taamaalineqarpoq.
Nuummi mittarfittaap ukiumi ataasinngortorsiorluni nalliuttorsiorneranut atatillugu Sermitsiami Greenland Airportsip pisortaanera apersorneqarsimavoq. Taanna tallimanngorpat atuarneqarsinnaassaaq.
