Qaqortumiit eertaaneq: Innuttaasut atugarliortut ikiorneqarneq ajorput

Matu ammaraangatsigu tikkaarissumik nalaanneqarpugut. Cigarettit kimmivikui natermiipput. Nerisassat pisoqalisimasut ammaannarput, igaffimmilu errugassat qaammatini arlalinni uninngasimarpasittut, kuuffimmiipput. Natermi igalaamernit aseqqukut ipput, inimilu sofa nerriveerarlu kisartaapput. Iikkat tupap pujuinit kajorajuttuinnaapput. Johanne Høeghip nerisassanik pajuttartup pajuttagaasa ilaat pulaarparput. Taannalu pulaanngikkaangat allanik isertussaqarneq ajorpoq.

Pulaareerluta anigatta Johanne Høeghip inissiaq qummut tikkuarpaa imalu oqarluni:

- Tassa pissutsinut taama ittunut iluarunnaangajattarpunga. Taanna angut pulaagarput piniartukkormiunit kingoqqisuuvoq.

Oqaatsinilu nangitsinnagit, tupittuusivoq.

– Aliasuutigisarpara Kalaallit Nunaat taama allanngorsimatigisimammat, inuit illuni quleriiaani maannakkut najugaqarput, piniartuunatik, Kristine Johanne Høegh oqarpoq inissiamiillu aninitsinni inissiaq tikkuarlugu.

Timersortarfiup tunuatigut qummut ingerlaarpugut avanneq assoralisimaarlugu, ulussatsinnullu pussutsinnarpoq.

- Kulturimitsinni naalliuuteqarneq paquminartuuvoq, Johanne Høegh oqarpoq nangillunilu:

- Inuit taakku kommunimiinnaq isiginngitsuusaarneqarneq ajorput, aammali innuttaasunit. Kajumissutsiminnik ikiuukkusuttut amerlanerujussuusariaqarput, kisianni nassaariniarnissai ajornaqaat.

Kommunimma atugarliortut isiginngitsuusaarpai

Johanne Høeghip eqqaamalluinnarpaa. Misigisaq Qaqortumi angerlarsimaffeqanngitsunut atugarliortunullu nerisassanik agguaanissamut kajumilersitsisoq. Qaqortumilu pisuttuartilluta ikuallaavik tikkuarpaa.

- Ikuallaavimmut eqqakkanik tunniussiartorlunga angut anillappoq. Eqqarsarpunga sooq tassanngaanniit anillannersoq.

Isumaliulerpoq. Sooruna tassanngaanniit taanna anillattoq? Paasinarsivorlu nerisassarsiorluni taqqamaniissimasoq.

- Angerlarama eqqarsaatigiunnaarneq ajulerpara. Kingorna ujartorpara, nerisassanillu pissarsinissaanik ikiorlugu, aalassassimaarpasilluni oqaluttuarpoq.

Misigisaq tamanna ukiualuit matuma siorna pivoq, Johanne Høeghilli inuuneranik tamanna allannguilluinnarpoq. Taanna arnaavoq immikkuullarissoq. Qaqortumi isumaginninnikkut annertuumik suliniuteqarnera pillugu PiSiu-p nersornaasiuttagaanik 2026-mi nersornaaserneqarpoq. Iffianik nerisassanillu nassarluni sapaatip akunneranut arlaleriarluni angalasarpoq, innuttaasullu atugarliortut arlallit nakkutigisarpai. Ilaat angerlarsimaffeqanngitsut. Allat allatigut atugarliortut. Tamarmik aaqqissuussaanerup iluani unittooqqasut.

- Kommunimma Kommune Kujalliup atugarliortut isiginngitsuusaarpai. Tamanit (innuttaasut atugarliortut) isiginngitsuusaarneqarput. Kommunimi sulisut taakkua iluamilluunniit ilassisinnaanngilaannga toqqarlugit amigartumik iliuuseqartarnerat oqaatigisinnaasarakku, oqaluttuarpoq.

Johanne Høegh Qaqortumi atugarliortut atugaat eqqartoraangamigit ilaannikkut nipituumik oqaluttarpoq, qularnanngitsumillu kamassimassaaq. Naalakkersuisut Kommune Kujalliullu annerusumik iliuuseqannginneri kammatigaa. Taanna naapertorlugu aningaasanik tamanut agguaassisoqartaraluarluni pisariaqartitsinerpaat iliuuseqarfigineqanngillat. Johanne Høegh naapertorlugu ajornartorsiummut nassuiaat tassaavoq pisuut piitsullu assigiinngissutaat.

- Assigiinngissuseq annertuvoq. Aningaasat agguataarneqarneranni tamanna ajornartorsiutaavoq, oqarpoq.

Johanne Høegh inunnik inuiaqatigiinni ajornartorsiuteqartunik ukiorpassuarni pulaartarpoq, maluginiagaalu erseqqippoq.

- Innuttaasut atugarliortut ikiorneqartariaqartut amerligaluttuinnarput. Tamanna qularutissaanngilaq, oqarpoq.

Ikiorneqartariaqartut ilarpassui meeraasimapput angerlarsimaffinni najugaqartut 18-iliigaangamik initaartartut, allatigulli kingusinnerusukkut ikiorneqarneq ajortut. Johanne Høegh Qaqortumi inuinnaat najugaqarfianik taasani alapernaarsuiartorluni oqaluttuarpoq.

- Ilaquttaminniit peersinneqartarput paaqqinnittarfinnullu inissinneqartarlutik, taamaasineranilu ilaquttaminnut attaveqarnerat isaminneqartarpoq. Taamaasillutik ilaqutaminnit ikiorneqarsinnaajunnaartarput, nammineertariaqalersarlutillu.

Johanne Høegh nammineq aningaasaatiminik nerisassanik pisisarpoq. Ilaannikkut ataasiaannarluni tunissuteqartoqartarpoq imaluunniit tunissutisiassamik allagartamik tunissuteqartoqartarluni. Ilisarisimaneqarluarpoq, politikkerillu tamanut ammasuni aaqqissuussani ilassiortarpaat.

- Taamaakkaluartoq atugarliortunut aningaasanik amerlanerusunik atorsinnaasannik iluaqutissinneqartanngilanga, naqissusiilluni oqarpoq.

Inerteqquteqarnerup kingunerisaanik aanngajaarniummut hashimut ikaarsaartoqarpoq

Kommune Kujallermi imigassaq tallimanngornermi oktobarip aappaanni inerteqqutigineqalerallarpoq, ilaatigut piffissami kingullermi sakkortuumik, nakuusertoqarnerata kingorna taama pisoqarpoq.

Johanne Høegh isumaqarpoq imigassamik inerteqquteqalernissaq qangali atuutilersinneqarsimasariaqaraluartoq. Imigassamik inerteqquteqarneq ilaannut iluaqutaasoq takusinnaavaa, kisiannili aamma paasivaa imigassamik inerteqquteqarnerup kingunerisaanik atornerluineq allamut saatsinneqartoq.

- Inuit ajunngitsut amerlasuut imigassamik inerteqquteqalerneq nuannaarutigaat, festertarnerillu kingorna unipput. Hashimilli tuniniaasartut aamma nuannaarput. Imigassamimmi atuineq allamut saatsinneqarpoq.

Taanna isumaqarpoq siunissamut aaqqiissutissat, pitsaanerpaartaat tassaasoq amerlanerusut peqataanissaat.

- Tamatumunnga tunngatillugu aaqqissuussinissaq pingaaruteqarpoq. Islandimisut imigassamik nioqquteqarneq ulluinnarni pisiarisartakkanit immikkoortinneqarpat pitsaassaaq. Aamma suliffissaaleqineq akiorneqassaaq. Suliffissat amerlajunnaarput. Innuttaasut atugarliortut pillugit aaqqitassarpassuaqarpoq.

Qaqortumi angerlarsimaffeqanngitsut unnuisarfissaanik takorluugaq

Johanne Høegh toqqaannartuuvoq. Nuannarineqarsinnaallunilu nuanniigineqarsinnaavoq imminut pilluni taama oqarpoq. Illoqarfimmi pisuttuareerluta inaanut majuarpugut.

Toqqaannaraluaqaluni, inuit atugarliortut pillugit uummateqarfigai. Taassuma takorluugaraa inuit atugarliortut toqqissisimanngikkaangamik angerlarfigisinnaasaannik pilersitsinissaq.

Qaqortumi angerlarsimaffeqanngitsut unnuiffissaqanngillat, taamaattumillu innuttaasut ajornartorsiortut ilarpassui maannakkut sumiginnarneqarput.

- Unnuisarfimmik (angerlarsimaffeqanngitsut unnuisarfiat aaqq.) ammaaguma, pinnguaatinik unammiuaarnermik unnukkut aaqqissuisoqartassaaq, oqaluttuarpoq, inissiannguaminilu siniffiup ataa takutippaa tassanilu qarasaasiat amerlasuut takuneqarsinnaapput.

Angerlarsimaffeqanngitsut unnuisarfiinik pilersitsinissap ilaanni umiarsuit takornariartaatsit suleqatigineqarnissaat aamma pilersaarutaavoq.

- Qularnanngilaq taakku nerisassaataanik igiinnagassaannik pissarsisinnaanerput. Nerisassanik pitsassuarnik amerlasoorpassuarnik tunineqarpugut. Taakku tusarsimavaat nerisassanik illoqarfimmi agguaassisartunga, taava aqqusaarput nerisassarpassuarnillu tunissuteqarlutik.

Inuttut namminermut kingunerisai

Johanne Høegh aperaara innuttaasunik atugarliortunik ikiuiniarnermini misigisarpassui qanoq misigisaqarfigisimanerai. Isikka issarnerit tallimat isigitsiarpai. Taattuanilu takuneqarsinnaavoq akissutiginiagaa ajornakusoortoq.

- Sungiussassaavoq, aallaqqaammut isumaalliorluni oqarpoq nangillunilu:

- Ilaanni angut pigisaqanngilluinnartoq aperaara sumik pisissutissaneriga. Nammineq sumik pisineqassanerluni aalajangissavaa. Nammineerlunilu akivaanga: "iffiaq". Matumiik anillakkama isavunga. Inukkuluit taakkua PIGISAQANNGIVIPPUT, oqaluttuarpoq.

Johanne Høeghip pisimaneratut nikorfalluni anorimut torlulagaanni, inuit ilaat isumaqarsinnaasarput allat akornanni issiasoqartariaqartoq nipangersaasussanik.Johanne Høeghip aamma innuttaasunik atugarliortunik ikiuisarnermini kinguniperluutit misigai, imigassap inerteqqutaalernera sioqquterujussuarlugu.

- Amerlasuut nuannarinngilaannga isumaqaramik malugeqqusaarlunga taamaaliortarlunga, oqarpoq.

- Kikkut tamarmik immikkut suliassaqarput, amerlappullu suliassaminnik nassaarsinnaanngitsut. Taakkualu ikiussavagut, oqarpoq.