Qassutikut Ukrainemi droninut illersuutitut atorneqartut

Qassutikut Danmarkimeersut, Sverigemeersut Frankrigimeersullu Ukrainemi droninut illersuinermut ikiuipput.

Tonserpassuit matumani pineqartut, tuluit aviisiat The Guardian allappoq.

Siusinnerusukkut qassutit aalisarluni atorneqartarput, maannali russit droniinik qaartartunik usisunut unitsitsissutitut atorneqarput.

Ukrainemiut qassutit qisunnut ikkullugit qaarusuusaliorput, taamaalillutik akeqqat dronii sarpimmitsinneqartarlutik. Taakku ippernamut aasiaat qassutaani pisarineqartunut assersuunneqarsinnaasut, aviisi allappoq.

Qassutitoqqalli tamarmik droninik unitsitsissutitut atorneqarsinnaanngillat.

Aalajangersimasumik pitsaassuseqartussaapput dronemillu sukkasuumik unitsitsisinnaasariaqarlutik, 70-nik ukiulik Christian Abaziou The Guardianimut oqaluttuarpoq.

Taassuma qassutitoqqat nunamut sorsuffiusumut ikiuiniaqatigiiffik Kernic Solidarités aqqutigalugu nassiussorneqartarnerat suliaraa.

Energiministeri: trumpip atomip sakkussai misilittassavai atomip sakkua atorlugu qaartitsinani

Manna tikillugu ikiuiniaqatigiiffiup qassutit 280 kilometerisut isorartussusillit Ukrainemut tunniuppai.

– Ukiut marluk kingulliit ingerlaneranni sorsuunneq allanngorpoq. Siusinnerusukkut dronit ilisimanngilagut, maannalu dronit atorlugit sorsuunneq ingerlavoq, Christian Abaziou oqarpoq.

Aallaqqaammut dronit sorsuffimmi napparsimavinnut illersuutitut atorneqartut, taassuma oqaluttuaraa. Maannalu aqqusernit, ikaartarfiit napparsimaviillu isaariaasa qulaanni siaartiterneqarput.