Kommuninut ukioq qineqqusaartoqaleruttornerani Qeqqata Kommuniani oqallisaasut ilaat kommuninut allanut sanilliullugu allarluinnaavoq.
Kommunimi sulisut sulinermik nalaanni 2022-mi pujortaqqusaajunnaarnerat qineqqusaarnermi initoqaaq.
Kommuninut ukioq qineqqusaartoqaleruttornerani Qeqqata Kommuniani oqallisaasut ilaat kommuninut allanut sanilliullugu allarluinnaavoq.
Kommunimi sulisut sulinermik nalaanni 2022-mi pujortaqqusaajunnaarnerat qineqqusaarnermi initoqaaq.
Malik Berthelsenip - taamani sulinerup nalaani pujortaqqusaajunnaarnermut atuutilersitseqataasup - suliamini ukioq manna naammassinngitsuugaqarsimanerluni aperineqarami siullertut taanna taavaa.
- Uani naammassisaqanngitsoornermut taarsiullugu iluatsinngitsuukkatut isigisara oqaatigerusunneruara. Sulinerup nalaani pujortaqqusinnginnerup atorunnaarsinneqarnera assorujussuaq uggorivara. Tupigusuutigivaralu qineqqusaarnitsinni tupa inuunermi iluaqutissartaqanngitsoq qulequttani initunerpaatinneqarmat, Malik Berthelsen oqarpoq.
Pujortartarnerup oqallisigineqarneratulli sammisat allat taama ilungersuussitigaluni oqallisigineqartarnissaat kissaatigigaluarpaa.
- Nuannissagaluarpoq meeqqat atuarfiata ataqqineqarnerulernissaa imaluunniit inuusuttagut amerlanerusut ilinniakkamik naammassinnittalernissaat aamma taamatulli annertutigisumik oqallisigineqartaraluarpata.
Aqqut kiisami ammarneqartoq
Sisimiuniit Kangerlussuarmut ATV-nut aqqusineq 170 kilometeritut isorartutigisoq aasaq juulip 16-iani ammarneqarnera borgmesterip kommunerisamini ukioq manna eqqaamanerpaavaa.
- ATV-nut aqquserngup kiisami juulimi, innuttaasorpassuit peqatigalugit ammaanersiorneqarnera. Ulloq taanna silagissuaq ATV-erpassut ataatsikkut ingerlaaqatigiipput, Kangerluarsuk Tullerullu qulaani isikkivigilluinnartumi nuannersumik katersuulluta. Aqquserngup innuttaasunit ajornannginnerusumik pinngortitamukarsinnaanissaannut periarfissiinera, atorluarneqarneralu nuannaarutigaara, aamma cykelertunit.
Innuttaasut ileqqui allanngortikkuminaattut suliffissarsiortukinneralu
Borgmesteritut ilinnut suna ukioq manna unammillernarnerpaava?
- Politikkimi sulinermi unammillernarnerpaajuaannarpoq innuttaasut ileqquinik allanngortitsiniarneq. Eqqaamassavarpummi ajornartorsiutit suulluunniit nammineq inuttut ileqqulersuutitsinnit pilersinneqartarmata.
Illit borgmesteritut suna ukioq manna iluatsinnerpaasoriviuk?
- Qeqqata kommuniata oqaluttuarisaanerani suliffissarsiortut aatsaat taamak ikitsiginerat isumaqarpunga immikkut taasariaqartoq. Sulisinnaasummi amerlanerpaat sulinerat pissutigalugu kommunimi aningaasaqarnikkut pitsaasumik inissisimavugut. Taassuma saniatigut kommuni avinneqassanersoq pillugu taasititsinerput aamma taarusuppara. Pissutigalugu ukiuni kingullerni tamatuma oqallisigineqarnera initungaatsiarnikuuvoq. Taamaattumik innuttaasut ersarissumik paatsuugassaanngitsumillu isummernerat isumaqarpunga tamatsinnut pitsaasumik tikkuussisoq.
Naluttarfittaassaq Sisimiuni kulturikkut illorsuup Taseraliup eqqaaniinnissaa pilersaarutaavoq. Nasaasaamut Nalunnguarfimmullu isikkiveqassalluni.
Assi: KHR Architecture
Naluttarfik eqqartorneqartuartoq aalajangiiffigerusuppaa
ATV-nut aqquserngup ukiorpassuarni eqqartorneqarsimariarluni kiisami piviusunngortinneqartorlu, Qeqqata Kommuniani pilersaarut alla - tassa Sisimiuni naluttarfissaq - aalajangiiffigineqassasoq Malik Berthelsenip neriuutigaa.
Kommunerisarni aappaagu 2026-mi suna pingaarnertut suliniutigerusuppiuk?
- Missingersuutit akuerisagut aallaavigalugit sulinerput ingerlatissavarput, qilanaarpungalu taakkua aallartinnissaannut. Ataatsimilli taasaqassaguma isumaqarpunga naluttarfiliornissaq 2026-mi pinngitsoorata aalajangiiffigisariaqaripput. Innuttaasummi utaqqikatappaatigut. Maannamummi 50 mio. kr. immikkoortereerpagut, Malik Berthelsen naggasiivoq.
