Qeqqata Kommuniani pisortaqatigiit sisamanik ilasut

Qeqqata Kommunia pisortanik marlunnik aamma sammisanut aalajangersimasunut pisortanik marlunnik atorfinititseqqammerpoq. Kommuni nittartakkamini allaaserisaqarpoq.

Avannaata Kommuniani aningaasaqarnermut inuussutissarsiornermullu pisortaq, Dorthe Løvstrøm Mathiesen, Qeqqata Kommuniata atorfinitsippaa.

- Nuannaarutigingaarparput Aningaasaqarnermut Ilinniartitaanermullu pisortaanertut nutaatut Dorthe Løvstrøm Mathiesen, ulloq 1. august 2026 atorfinittussaq, tikilluaqqusinnaagatsigu. 

- Kommunimi aningaasanik aqutsinermi nunamilu aningaasaqarnermut aqutsinermi suleriutsinik ilisimasaqarluarnermigut, ukiorpassuarnilu aqutsinermi sulinikkut misilittagaqarnermigut, kommunimi aqutsisut qullersaannut piginnaasanik nukittorsaaqataassaaq, Qeqqata Kommunia allappoq.

Kommuni taassuma saniatigut atugarissaarnermut pisortamik aamma atorfinititsivoq. Atugarissaarnermut maanna pisortaasoq, Paneeraq Olsen, taarserneqartussanngortoq, kommuni nalunaarpoq. Charlothe Petersen Mørkhøj atugarissaarnermut septembarip aallaqqaataanit pisortanngussaaq.  

- Charlothe Petersen Mørkhøj nuna tamakkerlugu isumaginninnermut suliassaqarfimmik ilisimasaqarluarpoq. Ilisimatusarfimmi adjunktiuvoq, isumaginninnermi siunnersortitut ilinniartunut atuartitsisarluni. Isumaginninnikkut suliassaqarfimmut tunniusimalluinnarpoq sulisunullu suliatigut siunnersoqatigiinnissamut pisarialimmut tunniusseqataarusulluni.

Atuakkit aamma

Avannaata Kommuniani pisortaq atorfimminit tunuarpoq

Sammisanut aalajangersimasunut pisortat aamma marluk

Qeqqata Kommunia pisortaanerup Hans Christian Sværd-ip qanimut suleqatissaanik marlunnik atorfinititsinermi saniatigut sammisanut aalajangersimasunut pisortanik marlunnik aamma atorfinititsivoq. 

Laasi Kristiansen Sisimiuni teknikkimut avatangiisinullu pisortatut juunip qiteqqunnerani atorfinitsinneqarpoq.

- Laasi Kristiansen teknikkimut avatangiisinullu suliassaqarfimmut ilisimasaqarluarpoq. Siusinnerusukkut sanaartugassanik suliaqarnikuuvoq siunnersortitullu sulinermi misilittagaqarlualersimalluni, kingullertigut sanaartornermut pisortatut. Suliamut ilisimasaqarluarnermigut misilittagaqarnermigullu suliassaqarfiup ineriartortittuarnissaanut pingaarutilimmik tunniusseqataassaaq, kommuni allappoq.

Taassuma saniatigut Ole Thorleifsen Maniitsumi ilinniartitaanermut pisortatut aggustsip aqqarnanni atorfinissaaq.

- Ole Thorleifsen ilinniartitsisutut ilinniarnikuuvoq Tuluit Nunaanniillu International Studies in Education-imi Mastereqarluni. Massakkut Atuarfik Kilaaseeqqami ilinniartitsisutut atorfeqarpoq, aqutsinermi ilinniartitaanermullu suliassaqarfimmi ukiorpassuarni misilittagaqarnermigut perorsaanikkut piginnaasarpassuarnik nunarsuarmilu atuartitsinermi isiginnittariaaseq atorfimmut nassassallugit, Qeqqata Kommunia allappoq.