Qimmit qimuttut tuniluuttumik nappaateqarsorineqartut

Uumasunut Nakorsaqarfik Inuussutissalerinermullu Oqartussaaffik (UNIO) apriilip qulingiluaani ilisimatinneqarpoq Kuummiuni qimmit qimuttut tuniluutiasumik napparsimalersimasinnaasut.

Tamanna UNIO-p tusagassiuutinut nalunaarutaani allassimavoq.

Qimmit pingasut qimmilivinnit assigiinngitsunit marlunneersut tunillatsissimasutut ersiuteqartut nalunaarutigineqarsimapput.

UNIO naapertorlugu nappaatip suunera suli qulakkeerneqanngilaq, parvovirusimilli tunillatsissimasinnaassasut ilimagineqarpoq. Nappaat taanna qimminut toqqutaasinnaavoq. Nappaat inunnut tunillaaneq ajorpoq.

UNIO ilisimatitsivoq Kuummiuni kapuuinerit qanittukkut ingerlanneqarsimasut, kapuuinissamullu maleruagassat Tasiilami oqartussat Kuummiunilu kapuuisartoq suleqatigalugit piffissap ilaanni sukateriffigineqarsimasut.

UNIO-p aarleqqutiginngilaa qimmit akornanni tuniluuttoqaleratarsinnaanera, oqartussalli eqqaasitsissutigaat nunatsinni qimmit akiuussutissamik kapitinneqartussaanerannut qimminik piginnittut inatsisitigut pisussaaffeqartut.

Qimmit qimuttoqarfinniittut akiuussutissalersorneqartarnerat akeqanngilaq.