Qinersinermut ataatsimiititaliaq: Pisut marluk isornartut inummullu ataatsimut suliaq
Inatsisartunut 2025-mi marsip aqqarnani qinersisoqarneranit ukioq ataaseq qaangiuttoq, Qinersinermut Ataatsimiititaliaq qinersineq akuerineqarsinnaasoq, pisimasulli isornartut marluk inummullu ataatsimut suliaq immikkut maluginiagarisimallugit nalunaarpoq.
Qinersinermut ataatsimiititaliaq naapertorlugu marsip aqqarngani 2025-mi qinersinerup kingorna sumiiffinni marlunni karsit taasinernik imallit katanneqarsimapput.
Assi: Oscar Scott Carl
Qinersinermut Ataatsimiititaliap, Inatsisartunut qinersinerup eqqortumik ingerlanneqarneranik qulakkeerinnittussaq, qinersinermi allattaavik akuerisaq saqqummersippaa. Tassani pisut marluk inummullu ataatsimut tunngasoq immikkut maluginiarneqarput.
Ilulissani Aasiannilu qinersereernerup kingorna karsinik pappiaqqanik imalimmik assartuinermi ajutoortoqarpoq.
- Pisoq ataaseq Ilulissani pivoq, karsi allanneqanngittunik aamma atorsinnaanngitsunik imalik kommunip allaffianukaanneqarnermini katanneqarsimavoq. Karsi innuttaasumiit nanineqarsimavoq, kommunimullu tunniunneqarluni. Tassunga tunngatillugu karsip imarisat misissorneqarput, paasineqarlunilu qinigaassanngortittoq Anthon Frederiksen marlunnik qinerneqarsimasoq.
- Qinersinerup inerneranut taakku marluk allanngortitsinngillat.
Aasianni pisoq
Aasianni qinersivimmiit kommunip allaffianut assartuinermi aamma taama pisoqarpoq.
- Anorsaarneratalu patsisigisaanik pappiaqqat siaruaassimallutik. Pappiaqqat nassaariortorneqarput, pingasut minillugit. Taakkuuppullu Aki-Matilda Høegh-Dam-imut taasinerit, kisianni tamarmik kisinneqareerlutik.
- Pappiaqqat pingasut amingaataagaluarpataluunniit qinersinerup inernera allanngunngilaq.
Taamaakkaluartoq qinersinermut ataatsimiititaliap "taamatut angallassisimaneq isornartutut isigivaa, taamaammallu Qinersinermi Siulersuisut aamma taasititsinermi aqutsisup akisussaaffii erseqqissarlugit".
Qinigaasinnaanngitsoq
Qinersinermut ataatsimiititaliap Vittus Jerimiassen qinigaasinnaanngitsoq ilisimatitsissutigaa. Qinersinissamut ullorititamiit ukiup affarinngisaa sioqqullugu Danmarkimi najugaqarpoq, malittarisassanullu tamanna naapertuunnani.
- Taamaammat sinniisussatut aggersarneqarsinnaanngilaq, qinersiserisimasaalu partiimut qinersinertut aaqqinneqarlutik, Qinersinermut ataatsimiititaliaq naqissusiivoq, taannalu arfinillinnit qinerneqarsimasoq ilanngullugu paasissutissiissutigalugu.
Naammagittaalliuutit sisamat itigartinneqartut
Qinersisinnaasut allattorsimaffiannut ilanngunnissamut piffissarititap qaangiunnerata kingorna inuit Kalaallit Nunaata avataani najugaqarallarsimasut sisamat naammagittaalliuuteqarput.
- Tamarmik piffissarititaasoq qaangiutereersoq qinnuteqarsimapput Kommuneqarfik Sermersuumiilu qinersinermut siulersuisuniit aalajangerneqarluni qinnuteqaataat itigartitsitaassasut, Qinersinermut Ataatsimiititaliaq allappoq, erseqqissarlugulu:
- Kommunilu inatsit malillugu aalajangiisimanera eqqortuummat, Qinersinermut Ataatsimiititaliamit aalajangiineq ilalerneqarpoq.
