Qulimiguulik naajamut aporeernermi kingorna utertariaqalersoq

Air Greenlandip ilaasui arfininngormat Tasiilamit Kulusummukartillutik naatsorsuutiginngisaminnik misigisaqariasaarput.

Qulimiguulik Tasiilamiit qangattaqqammiinnartoq naajarpaaluit ataatsikkut tingisut qulimiguulimmi aquttup takuai. Naajat ataatsimoortut aporumanagit aquttoq sanguvoq. Naajarli ataaseq naajaqatini allamut sangummata kinguleruppoq.

- Taannalu qulimiguullip qulimiguuanut aporpoq toqullunilu, Air Greenlandip piujuartitsinermut attaveqaqatigiinnermullu pisortaa Inga Dóra G. Markussen Sermitsiamut oqarpoq.

Timmisartut timmissallu aporaangata "bird strike"-mik taaneqartarpoq. Naajaq qulimiguulillu aporeersullu qulimiguulik aarasassimavoq.

- Eqqiarneqartariaqarsimavoq, taannalu imminermini susoqarsimaneranik oqaluttuarpoq, Inga Dóra G. Markussen oqarpoq.

Aportoqarnerani qulimiguulik ilaasulluunniit ajoqusersimanngillat.

Suleriaaseq malinneqarpoq

Assingusumik pisoqartillugu aalajangersimaqqinnaartumik suleriaaseqartoqartarpoq, aportoqarneranilu taanna malinneqarpoq.

- Taama pisoqarmat qulimiguulimmi aquttup soorunami misissorneqarnissaa pisussaaffigaa. Helikopteri imannak aalariarsimanngilaq. Qangattaqqammeriarami qulimiguulinnullu mekanikeri Tasiilamiimmat heliportimut uteqqippoq. Taavalu qulimiguullip misissorneqarnera aallartippoq, Inga Dóra G. Markussen oqarpoq.

Qulimiguulillu misissorneqarmat qujanartumik ajoqusersimanngitsoq paasineqarpoq.

- Qulimiguulik salinneqarsinnarluni misissorneqarpoq, qulimiguui ninngusuut akornusersimanngillat. Ingerlaannapajaarlu aallaqqissinnaanngorluni, taanna oqarpoq.

Timmisartut timmissallu aportarnerat pisinnaavoq, kisiannili qaqutigoortuusoq pisortap oqaatigaa.

- Pisinnaavoq, kisianni qaqutigoortuuvoq. Air Greenlandimiinninni nunatsinni qulimiguulimmik taamatut apugaqartumik nalaassinikuunngilanga, Inga Dóra G. Markussen oqarpoq.

Taassuma erseqqissaatigaa aportoqarnerani annilaarnartumik pisoqarsimanngitsoq, aamma ilaasut qulimiguulillu ajoqusersimanngitsut. Annertunerusumik pisoqarsimasuuppat sillimaniarnermi suleriuserineqartartut aallartinneqarsimassagaluartut aamma ilanngullugu oqaatigaa.