RAL: Iranimut sorsunneq akit qaffannerannik kinguneqassaaq
Iranimi sorsunnerup kinguneranik uuliap akitsorujussuarnera nunatsinni aamma akisunerulersitsissaaq. Royal Arctic Linep uuliap kinertup akisunerulernera atuisunut ingerlateqqissavaa, naggataatigullu kalaallit atuisut akit qaffannerannik eqqugaassallutik.
Uulia 50 procentimik akitsorpoq, taamaasillunilu umiarsuarnik assartuineq RAL-imut akisunerujussuanngorluni. Akit qaffannerat atuisunut tuttussanngorpoq.
Toqqorsivimmit: Jesper Hansen
Umiarsuaatileqatigiiffiup uuliap akiata aningaasallu nalinganut tapiliuttagat (BAF/CAF, aaqq.) qanittukkut qaffanneqarnissaat pinngitsoorneqarsinnaanngitsoq, RAL-ip pisortaanera Niels Clemensen oqarpoq.
- USA-p Israelillu Iranimut sorsulernerisa kingorna nunani tamalaani uuliap akiata ullut 14-it kingulliit ingerlaneranni allanngornera eqqarsaatigalugu, siunissaq ungasinnerusoq isigalugu BAF/CAF-imik tapiissutisitsinnut inuiaqatigiinnullu sunniuteqassaaq, Niels Clemensen Sermitsiamut oqarpoq.
BAF/CAF-imut tapiliussaq qaammatip siuliani uuliamik atuineq umiarsuaatileqatigiiffiullu uuliamik pisinermi akia tunngavigalugit nalimmassarneqartartoq, nassuiaavoq.
Maajimi sunniuteqalissaaq
- Uuliap akitsornera maannakkut pisoq aatsaat maajip aallaqqaataani nalimmassaanitsinni tamakkiisumik sunniuteqassasut, pisortaq oqarpoq.
Umiarsuaatileqatigiiffik qanoq annertutigisumik nalimmassaassanersoq suli naluaa, tamannalu Kalaallit Nunaannut nunatsinnulluunniit assartuisartunut tamanut sunniuteqassaaq, naggataatigullu assersuutigalugu inuussutissat akitsorneranik kinguneqarsinnaassalluni.
- Ullunili 14-ini kingullerni nunarsuarmi niuerfinni uuliap akiisa 50 procentinik qaffassimanerat malugisimavarput, tamannalu uuliamut akiliutigisartakkatsinnut sunniuteqartussaavoq. Tassa Hormusimit Kangiani qiterlermit pilersuinerup qulakkeerneqarnissaanut patajaallisinneqarnissaata tungaanut, Niels Clemensen oqarpoq.
Nalimmassaanerit kingulliit
Uuliamut aningaasallu nalinginut tapiliuttagaq marsip aallaqqaataani kingullermik nalimmassarneqarpoq, maanna 13 procentiuvoq. Uuliamut aningaasallu nalinginut tapiliuttagaq siorna 2 procentpointimik appasinneruvoq.
RAL-ip akiligassamik nassiussigaangat BAF/FAC-imik ilassutitut akiligassaq takuneqarsinnaasarpoq, taannalu imaatigut assartuinermi, umiarsualivimmut nassiussivimmi suliarineqarnerani umiarsualivimmullu tikiffimmi suliarineqarnerani procentinngorlugu akilerneqartartoq.
Royal Arctic Line tapiissutinit taakkunannga iluanaaruteqarneq ajorpoq, uuliap aningaasallu nalingata allanngoriartorneranut ingerlatseqatigiiffiup isumannaarnissaanut taamaallaat atorneqartarput.
