Ralph Salvini timmisartumik Sermitsiamut nakkarluni toquvoq. Inuunermini qunusuilluni uummatini malittuarpaa

Ralph Salvini annilaanganeq ajorpoq. Aamma meeraagallarami.

Aqqaneq-marlunnik ukioqarluni ataatani Zanzibarimi sulisoq tikeraarpaa. Ralph Salvini ullut ilaanni angutaa ikinngutinilu aqqareerlutik uteqqammertut immap killinganukarpoq.

Ralph Salvini aamma immamut aqqarusussimavoq, angunnilu ilisimatippaa.

Tamanna ajornaatsuinnaanngitsoq angutaata ernini aqqartartut silaannalersuutaannik atuisimanngisaannartoq oqarfigaa. Nukappiararli immamut aqqarusuppoq.

Ataataasup ernimi aqqartartut atortui ti kilonik oqimaassusillit atigunigit piumajunnaassasoq upperalugu atortuni Ralph Salvinimut tunniuppai.

Anersaartuut atillugu nikorfasinnaanngingajappoq. Taamaakkaluartoq Ralph Salvinip anersaartuut ateriarlugu immamut pissippoq. Angutaa immap sinaani nikorfalluni isiginnaartoq ernera immamut itisuumukariartuaarluni ersigunnaariartorpoq.

LÆS OGSÅ

Naalakkersuisut kondolerer pårørende til forulykket pilot

Ralph Salvinip angutaa malinniniaraluarpoq, kisiannili aqqarnissamut atortut oqimaatsut atunnginnamigit aqqartartutut atisaata puttatippaa. Angutaa annilaangaqaaq.

Minutsit tallimat arfinillilluunniit qaangiummata ernera eqqissisimalluni puivoq.

- Kusanaq! Taamaalioqqittariaqarpunga, nukappiaraq nuannaarluni oqarpoq.

Zanzibarimi pisimasumi Ralph Salvinip angajoqqaani aatsaat annilaangatinngilai. Tassami inuunini tamaat aallussilluarluni aarlerinartorsiorsinnaallunilu inuunini ingerlappaa — tamatigut kingunerisinnaasai nukiniluunniit qanoq atuinartiginersut eqqarsaatiginagit.

Nukappiaqqap Italiami inunngorsimasup sapiissuseqarnera sumit aallaaveqarnersoq oqaatigiuminaappoq, piumassuseqarninili pissutigalugu nunanut assigiinngitsorpassuarnut angalasarpoq naggataatigullu timmisartumi ukiut inuuffigisani kingulliit atorlugit aquttarfimmiittarluni.

Ralph Salvini siorna oktobarip 25-anni timmisartumik Cessnamik ataatsimik motoorilimmik Kalaallit Nunaat qulaallugu timmiartorluni ajutoorujussuarpoq.

Saffiugassat ullorissallu

Ralph Salvini Italiami Pisami 1980-imi januaarip 8-ani inunngorpoq. Raffaele Salvini kuissutigaa, inersimasunngoramili Tuluit Nunaannut nooreerluni tuluillu innuttaasuattut akuerineqarami atini allanngortippaa.

Meeraanermini kingusinnerusukkullu inuusuttuaraanermini ukioqatiminik ikinngutitaarnissani sapernartittarpaa. Ikinngutitaarisartagai tassaagajupput inersimasut, taakkualu aatsitassanik qaqutigoortunik saffiugassanillu ujaaseqatigalugulu ulloriarsioqatigalugu angalaaqatigisarpaat.

Sivitsunngitsoq Ralph Salvini aamma ikinngutimi inersimasut soqutigisaannik soqutigisaqalerpoq, piffissamilu sivisuumi taakku kisiisa eqqarsaatigalugillu nuannaralugit aalluppai. Taamaattutoqaavoq.

Ralph Salvinip ilinniagassani naammassigaangamigit ikinngutinilu Pisap eqqaani illoqarfeeqqamut ilaqutariit illuata eqqaanut qaqqamukaasarput.

Ujaqqat assigiinngitsut angerlaallugit takutissortarpai. Ralph Salvinip angajoqqaavinut ujaraaraannaapput, erneranulli taamaanngilaq.

Ralph Salvini arnami angummilu saniatigut ukiunik sisamanik nukarliunerusumik najaqarpoq, Marianna.

Arnaat angerlarsimaannartoq angutaat FN-ip naasorissaanermut suliniutaani assigiinngitsuni sulisarpoq. Angutaalu taamaammat angalakulasarlunilu ilaqutariit nooqattaartarput.

Angutaat ilaannikkut nunanut politikkikkut eqqissiviilliorfiusunut imaluunniit Italiamiutut ilinniartitsisoqarpianngitsunut aallartinneqartarmat Ralph Salvini, najaa arnaallu Italiamiiginnartariaqartarput.

Ataataasoq nalinginnaasumik sumiiffinni assigiinngitsuni ukiuni pingasuni sulisarpoq. Tamanna ilaqutariinnut oqitsuujuaannanngilaq, 1997-imilu Ralph Salvini 17-inik ukioqartoq angajoqqaavi qimallutillu kingusinnerusukkut avipput. Angutaat piffissami tassani Ecuadorimi suligami nuliartaaqqippoq, Ralph Salvinillu najaata aappaa, Chiara, inunngorpoq.

Timmisartortartunngorniarneq

Ralph Salvinip meeraalluni ullorissat saffiugassallu saniatigut qarasaasiakkut pinnguaatit soqutigisarpai.

Pinnguaat ataaseq aalajangersimasoq tiguartiffigaa: timmisartortuusaarneq. Ralph Salvini pikkorilluinnartoq angajoqqaavi isumaqarput. Qarasaasiami tikkuutit atorlugit nunarsuarmi illoqarfinnut tamanut mittarpoq. New York, London, Chicago. Pissutsini ilungersunartuni — soorlu apummi anorlersuullu nalaani — mikkaangami tulluusimaartarpoq.

Qarasaasianik soqutiginninnini atuillaqqinnini pissutigalugit kingusinnerusukkut tamanna suliffigissallugu paasivaa. Ralph Salvini 19-inik ukioqarluni ingeniørinngorniarluni Pisa Universitetimi ilinnialerpoq.

Ilinniarfinili imminut naleqqutinngimmat ilinniarnini ukiut marlussuit qaangiummata unitsippaa. Inussiatut akissarsiaqarniaannarluni ukiorpassuarni ilinniarusunnani aalajangersimavoq, Ralph Salvini aalajangereerluni ataataminut oqarasuaatikkut oqarpoq.

Ralph Salvini ukiualuit peqqinnissamut nerisanullu tapiutit pillugit nunarsuaq tamakkerlugu suliffeqarfik Herbalife — ataatami paasisimanngisaannagaa — sinnerlugu nittarsaassillunilu tuniniaanermi kingorna Egyptenimut aallarpoq. Tassani Sharm el-Sheikimi feriartarfimmi sulilerpoq.

Aallaqqaammut takornarianik ilaqutariinnillu feriartarfimmiittunik aliikkusersuisarpoq. Kingusinnerusukkut aqqarnermik ilinniartitsisunngorpoq takornariallu Immami Aappalaartumi aqqartittarpai.

Akissarsiarissaanngilaq, taamali sivisutigisumik immap naqqaniissinnaanini pinngortitamiittuarsinnaaninilu nuannaarutigingaarpaa. Eqalussuit aalisakkallu immamut aqqaraangami assilisartakkani ilaquttaminut nassiussortarpai. Piffissami tamatumani paleqqajuarlunilu nujai qaamasuujuarput.

Egyptenimiinnaq immamut aqqarneq ajorpoq. Kanariap qeqertaasa avataani immamut aqqartilluni nuliani siulleq naapippaa. Taanna Madridimit takornariarpoq. Pisami 2007-imi katikkamik 2011-mi Martina panissaaraat.

Ralph Salvini panimmi inunngornissaa sioqqullugu nuliani ilagalugu Tuluit Nunaannut nuuppoq, tassanilu tuluit timmisartortitseqatigiiffianni Ryan Airimi timmisartumi inuttatut marluullutik ilinniarput.

Tassani Ralph Salvini timmisartortartunngornissamik takorluugaqalerpoq. Allamik periarfissaqalerami qarasaasiamik pinngortitamillu soqutigisaqarnini ataatsimut atorsinnaavai.

Ralph Salvini arnaminit aningaasatigut ikiorneqarluni timmisartortartutut ilinniarpoq, 2011-milu timmisartortartutut imminut taasinnaalerpoq.

‘Timmisartunik sumiiffissamukaassisartoq’

2011-mi Europap ilarujussuani aningaasaqarnikkut ajornartorsiortoqarpoq - aamma Tuluit Nunaanni, tassanilu timmisartortartutut atorfiit pitsaasut pilerngunneqartorujussuupput. Ingammik timmisartortartunngorlaalluni suliffissarsinissaq ajornakusoorpoq.

Ralph Salvinili silaannakkut angallannermut, timmisartunut mittarfinnullu tunngasunik tamanik nuannarisaqartuarpoq, suliffissatullu aalajangersimasani aallutiinnarpaa.

Timmisartut qanikkumallugit biilinik attartortitsisarfimmi Londonimi Stanstedip mittarfiata eqqaaniittumi ukiuni sisamani tallimaniluunniit sulivoq.

Kiisami 2015-imi aasakkut timmisartortitseqatigiiffimmi Dea Aviationimi timmisartortartutut atorfittaarpoq. Aallaqqaammut suliassat pingaarnerit tassaapput pingaarutilinnik assartuineq – assersuutigalugu uummatinik napparsimmavinnut assigiinngitsunut nassiussuineq. Kingusinnerusukkut suliffeqarfiup suliassani annertusivai, ilaatigut Immap Akullersuup eqqaani qimaasunik nakkutilliinermik suliaqarluni. Ralph Salvini ineriartornermi qitiusumik inissisimagami sivitsunngitsoq qaffasinnerusumik atorfinitsinneqarpoq.

Ralph Salvini 2015-imi Dea Aviationimi sulilernermi kingorna Martinap arnaanit avippoq. Kingorna allamik nuliarpoq aveqqillunilu.

Ralph Salvinip arnaq Phoebe illoqarfimmi Belperimi Manchesterip eqqaaniittumi, panini Martina ilagalugu najugaqarfigisamini, 2022-p missaani naapippaa. Asaqatigiilluinnarput, Phoebellu Martina asagamiuk Ralph Salvini suliartortilluni aallaraangat isumagisarpaa.

Timmisartortartutut sulinerup ajoqutaasa ilaat tassaavoq piffissami sivisuumi aallaqqasarneq. Ralph Salvini Dea Aviationimi timmisartuussinertaqanngitsumik atorfittaarniarluni piffissap ilaani aalajangerpoq. Taamaalillunilu paninilu piffissaqarfiginerusinnaavaa.

Ralph Salvinilli timmisartorneq nuannaraa. Taamaattumillu suliffini ingerlatiinnarsinnaajumallugu suliffimmi saniatigut timmisartunik assartuutinik ingerlatsisartutut namminersortutut sulilerpoq.

Timmisartuaqqanik USA-mut, Europami sumiiffinnut assigiinngitsunut allaallu Indiamut assartuisarpoq. Timmisartumik assartuineq amerlanertigut ullunik pingasunik sisamanilluunniit sivisussuseqartarpoq.

Timmisartorluni Atlantikoq qulaallugu angalagaangami Kalaallit Nunaat qulaallugu timmisartortarpoq. Angunnilu WhatsAppikkut allaqatigiittarnerat qimerlooraanni arsarnerit, sermersuaq Islandimilu innermik anitsisartut pillugit assinik ulikkaarpoq. Tamanna ulorianartoq angutaa Ilaannikkut isumaqartarpoq.

Tamanna ulorianartuusoq aammattaaq paasivara.

Ralph Salvini timmisartumik USA-mit Europamut 2021-mi assartuivoq. Canadap kangiatungaani ingerlaartillugu motoori uneriataarpoq. Nunap assinganik sumi ajornartoortilluni miffigisinnaasaanik takutitsisumik nassataqanngilaq. Nunamut qanilliallakkami tatsimik qerisumik takusaqalerpoq, taannalu miffiginialerpaa.

Timmisartoq tatsimut nakkarlunilu aseruatiterpoq — Ralph Salvinili ajoqusinngilaq. Ilaquttani Tuluit Nunaanniittut, arni Pisamiittoq angunnilu piffissami tassani Bangkokimiittoq sianerfigai.

- Ajunngilanga, taanna oqarpoq.

Nipaa ajunngitsoq nalinginnaasorlu angutaa isumaqarpoq.

Timmisartoq teknikkikkut ajoquteqartoq motoorilu orsussamik pilersorneqarsinnaasimanngitsoq kingusinnerusukkut paasineqarpoq.

Ralph ajutoornerminit ingerlariaqqipallaannarpoq, timmisartunillu assartuisartutut sulinini ingerlatiinnarlugu eqqissisimasutut toqqissisimasutullu isikkoqarpoq. Ajutoornermi kingorna ullut marlussuit qaangiutiinnartut Dea Aviationimi suliffimminut uteqqereerpoq.

Timmisartumik ajutoornerup kingunerisaanik toqusoq

Ralph Salvini Dea Aviationimi suliffimminit 2025-p aallartinnerani soraarniuteqareerlunitimmisartunik assartuisartutut sulinini aallunniarlugu aalajangerpoq. Suliffeqarfeeqqamik aallartitsivoq, piffissallu ingerlanerani marlussunnik sulisoqalernissani takorloorpaa.

Ralph Salvini timmisartortartutut pikkorissutut tusaamaneqarlualersimavoq, taamaalillunilu inuit suliffeqarfiillu timmisartunik assartuisitsiniartut tunniussiniartullu arlallit isumaqatigiissuteqarfigisimavai. Qaammammulli assartuinerit marluk pingasulluunniit taamaallaat timmisartuussisarniarsarivoq.

Siorna ukiakkut timmisartumik suluusalimmik nutaamik Textron Aviation Cessna T182-imik USA-mi Kansasimiit Polenimi Warszawamut assartuisartussatut atorfinitsinneqarluni akuersivoq. Assartuinermini aasit Kalaallit Nunaat qulaattussaavaa.

USA-mit Canada aqqusaarlugu Kujataanut aallarpoq, kingorna Island aqqusaarlugu Europaliassalluni. Arfininngornermili oktobarip 25-ani Davis Strædet ikaarlugu Narsarsuarmut ingerlaartillugu Kujataani silarluppoq. Ralph Salvinip pissutsit ulorianartut pissutigalugit timmisartoq assartukkani Nuummut mitsittariaqalerpaa. Aammali tassani silarluppoq.

LÆS OGSÅ

Nu skal forklaringen findes

Ulloq taannarpiaq Ralph Salvini radiokkut akissaartoq ilaqutai nalunaarfigineqarsimapput. Oqarasuaatikkut sianerfigigaanni aamma akineq ajortoq ilaqutariit paasivaat. Timmisartoq Nuup eqqaani qeqertami Sermitsiami nassaarineqarsimasoq ullut marluk qaangiummata marsip 27-anni nalunaarfigineqarput. Timmisartoq 1 kilometerimik qutsitsigisumiilluni qaqqamut aporsimavoq.

Timmisartoq ajutoormat toqusimasoq ilaqutariit paasitinneqarput.

Silarlulluni nuiarpassuaqarmat timaa sapaatit akunneri marlungajaat qaangiummata aatsaat qaqqamit aqqarneqarpoq. Tamatuma kingorna piffissami sivisuumi Ralph Salvinip timaa Københavnimut ikuallanneqartussatut apuunneqarniarsarivoq. Arsai ullumikkut tassaniipput, ilaqutariillu naggammik inuulluaqqusiartorlutik Danmarkimut tikinnissaat utaqqisaaginnarpoq.

Ralph Salvinip toqunera malunnartinniarlugu ikinngutigilluagai ilaqutaalu Belperimi Manchesterip avataaniittumi angerlarsimaffiani eqqaaniaasinneqarput.

Ralph Salvinip angutaa katuuliusoq timmisartup nakkarneraniilli ernini eqqaaniarlugu qaammatit tamaasa katuullitut naalagiartitsisarpoq.

Apriilip 25-ani Ralph Salvinip toquneranit ukiup affaa qaangiutissaaq. 45-nik qaammatinillu qulinik ukioqarluni toquvoq. Panini, aappani, arni, angunni qatanngutinilu marluk qimappai.