Royal Greenland aningaasaqarnermut pisortartaarpoq

Casper Villadsen, Royal Greenlandimi aningaasaqarnermut aggustimili pisortaagallartutut issiasoq, atorfimmi tassani maanna atorfinitsinneqavippoq.

Tamatuma saniatigut Royal Greenlandip qullersaqarfiani, Executive Management Teamsimi (EMT), ilaasortanngussaaq.

Taama Royal Greenland tusagassiutitigut nalunaarummi allappoq.

Casper Villadsenip Royal Greenland ilisarisimalluareerpa, aningaasaqarnermut pisortaagallartutut aggustimi akisussaaffeqalerpoq. Suliffeqarfissuarmilu aningaasaqarnermut pisortap tulliatut aamma siusinnerusukkut atorfeqarluni.

Aningaasaqarnermut pisortaagallartutut qaammatini kingullerni atuutereersorlu, aalajangerneqarpoq atorfimmi tassani ataavartumik atorfinitsinneqassasoq.

– Casper aningaasaqarnermut pisortap tulliatut ingerlalluarpoq. Taassumalu takutippaa akisussaasuugallartutut aggustimi ingerlanermini, aningaasaqarnermut pisortatut akisussaaffik nammassinnaagaa. Niuernermik ilisimasaqarluarpoq, inunnik ataatsisoortitsisinnaalluni, Royal Greenlandimilu anguniagaqartarnitsinni tapersersueqataasarluni. Taamaattumik EMT-miit tamanit tapersersorneqarpoq, pisortaaneq Toke Binzer oqarpoq.

Nunat niuernermilu immikkoortortat assigiinngitsut akornanni Royal Greenlandimi aningaasaqarnerup ataqatigiinnerulernissaa suleqatigiinnillu nukittorsaanissaq, Casper Villadsenip aningaasaqarnermut pisortatut ilaatigut akisussaaffigai.

Pisortaaneq Toke Binzer aamma sulisoqarnermut attaveqaqatigiinnermullu pisortaq Bodil Marie Damgaard Royal Greenlandimi inatsisilerinermut ingerlatsisuupput.