Royal Greenland qullersaqarfimmut nutaamut ima akissaqalerpoq

2023 Royal Greenland A/S-imut aningaasaqarnikkut ajorluinnarpoq, akileraarutit suli ilanngaatiginagit 255 millionit koruuninik amigartooruteqartoqarluni.

Akiitsoqarneq ingerlatseqatigiiffimmut ima ilungersunartigaaq, aalisarnermik ingerlatseqatigiiffiup inissiaatileqatigiiffik Qeqertat A/S, soraarnerussutisiaqalernissamut aningaasaateqarfik SISA (49%), Niras Greenland (2%) aamma Royal Greenland A/S (49%) maajimi 2023-mi 15 millionit koruuninik aktiaateqarfigalugu pilersitaat, aqqutigalugu qullersaqarfimmik nutaamik pisaarnissamut aningaasaliinissaq angujuminaassasoq ukiup aallartinnerani paasinarsigaluarluni.

Politikkerit ukiorpassuarni Namminersorlutik Oqartussat suliffeqarfiutaat angingaartoq Danmarkimi pisortaqarfeqartoq tuniniaanermillu ingerlatsivippassuaqartoq isumakuluutigaat. Ukioq amigartoorfiungaartoq pissutigalugu sulisut aqutsisullu Kalaallit Nunaanni ataatsimoortitsinissamik pilersaarut taamaatinneqassanngilaq.

Illuut A/S pingaarutilimmik inissisimasoq

Royal Greenland A/S-ip aningaasaqarnikkut ingerlalluaqqilernissamut pilersaarutini “Back to Black”-imik taaguutilik ingerlannerani Siulittaasup Naalakkersuisoqarfiata Siulersuisunut Allattoqarfik Namminersorlutik Oqartussat inissiaatileqatigiiffiannut Illuut A/S-imut attaveqaqqullugu qinnuigaa. Taakkua qullersaqarfimmik nutaamik qanoq pilersitsisoqarsinnaaneranik misissuissapput.

AAMMA ATUARUK

Royal Greenlandip qullersaqarfissaata sananeqarnera aallartippoq

Sanaartornermut isumaqatigiissuteqarnissaq suliareqqaarneqareerpoq, taamaalilluni sanasut qullersaqarfimmik 5.600 kvadratmeterinik angissusilimmik sanaartornermik aallartitsisinnaaniassammata. Qullersaqarfik laboratorialik, kantiinalik ataatsimiittarfeqarlunilu allaffeqarfiusoq. Sanaartorneq Royal Greenlandip inissaminik pisariaqartitsineranit annerusoq, kvadratmeterilli sinneruttut assersuutigalugu Royal Arctic Linemut, sanaartorfiup eqqaaniittumut, attartorneqarsinnaassasutut takorluugaasut.

Sanaartorneq taama angitigisoq 180 millionit koruunit missaannik aningaasartuuteqarfiussaaq, Illuut A/S-ip pilersaarut pillugu nassuiaataani Naalakkersuisunut nassiunneqartumi tamanna atuarneqarsinnaavoq. Tassanilu sukumiisumik allaaserineqarpoq kikkut taarsigassarsisitsisuussanersut aamma piginnittut attartortullu kikkuussanersut.

- SISA 45 mio. kr.-nik, Nykredit 80 mio. kr.-nik aamma BankNordik 25 mio. kr.-nik aningaasaliinissamut neriorsuisimavoq, suliniummut nassuiaammi Naalakkersuisunit akuerineqartumi Inatsisartullu akileraartarnermut aningaasaqarnermullu ataatsimiititaliaannut saqqummiunneqartumi tamanna allassimavoq.

30 millionit koruunit amigaataapput

Taamaalilluni suliniummut missingersuutigineqartut 180 millionit koruunit angunissaannut 30 millionit koruunit taarsigassiissutiginissaannut amigaataalerput.

Illuut A/S-illi aningaasaateqarfiup aningaasanik taarsigassarsisitsisartup atukkiussaminik ilaseqqikkusunngippat millioninik sinneruttunik tapiiumaarluni neriorsuutigaa.

Torben Pauls, Illuut A/S-imi pisortaasoq, Sermitsiamut ullumi oqarpoq:

- Aningaasaliisartut aningaasaliissutiminnik annertusiinissaat isumaqatiginninniutigineqarpoq, taamaalilluni suliniut tamakkiisumik aningaasalersorneqarnissaa qallissalluni. Taamaaliornikkut Illuut A/S-ip suliniummut aningaasaleeqataanissaa annikinnerpaassaaq. (Qeqert A/S-imi, aaqq.) piginneqataassutit Illuut A/S-imut tunniunneqareerpata, Qeqertat A/S aqqutigalugu isumaqatigiissut aningaasaliissuteqartuarnissarlu isumaqatiginninniutigineqassapput.

Ineqarnermut akiliutip naatsorsornera

Taamatut aaqqiinerup Royal Greenland inissiaatileqatigiiffimmi piginneqataaffimmini nutaamik akiitsoqalernissaa pinngitsoortinneqassaaq. Akeqanngissanngilarli, tamanna qullersaqarfimmik atuilernermi attartornermut aningaasartuutit Royal Greenlandimut akiligassanngortinneqartut naatsorsorneqarnerannit paasinarsivoq.

Isumaqatigiissummi allassimavoq Royal Greenland ineqarnermut akiliummik akiliisassasoq, taannalu inissiap nalikilliartorneranut ernianullu akiliutigineqartunut sanilliullugu naatsorsorneqartassaaq.

- Tamanna ingerlatseqatigiiffimmut (Qeqertat A/S-imut) akiitsunut sullissinermut aningaasartuutit tamakkerlugit matussusiinngilaq. Taamaattumik Illuut ukiut tamaasa ingerlatseqatigiiffimmut taarsigassarsisitsisariaqarpoq, taarsigassaq akilerneqarnissaannut tapiissutitut, suliniummut nassuiaammi ilisimatitsissutigineqarpoq. Piffissap ingerlanerani attartornermut akiliutit allanngorartarumaartut aamma allassimavoq.

- Aallaqqaammut m2-mut attartornermut akiliut 2.200 koruuniussaaq. Piffissap ingerlanerani akiitsut akilersorneranni attartornermut akiliut appariartussaaq, taamatulli aamma taarsigassarsiat, akiligassat akilerneqarnissaannut taarsigassarsiat, qaffassapput, ilisimatitsissutigineqarpoq.

Royal Greenlandip ukiumut attartornermut aningaasartuutai 12,3 millionit koruunit missaanniissasut missingerneqarsimavoq. Illulli ilaa assersuutigalugu RAL-imut attartortinneqarpat 1-2 millionit koruunit akornanni isertitaqartoqarsinnaassaaq.

Illuut A/S-imut iluanaarutaasoq

Illuut A/S-ip pingaartippaa sanaartorneq Namminersorlutik Oqartussat inissiaatileqatigiiffiutaannut aningaasatigut artukkiissanngitsoq. "Suliniut taanna piffissap ingerlanerani Illuup isertitaqarnerulernissaanik ingerlatseqatigiiffiullu nalingata qaffannissaanik naatsorsuutigineqartoq“ allassimavoq.

AAMMA ATUARUK

Royal Greenlandip inissiaatileqatigiiffik tuniniarpaa

Suliniummut Illuut A/S-ip aningaasaliissutigisinnaasaanut 30 millionit koruunit amigaataanerat suli ajornartorsiutaavoq. Suliniut inissiaatileqatigiiffimmit Qeqertat A/S-imit inatsisitigut pigineqarmat.

- Qeqertat A/S-imut ukiumut atukkiussanut ernianut akilersukkat annikilliartorneri ilutigalugit taarsigassarsianut akiliutit qaffakkiartussapput. Ukiuni tallimani siullerni ukiumut 3-4 mio. kr.-nik taarsigassarsititsisoqartassaaq. Taakku Illuup akiligassaanut ilanngunneqassapput, akiitsullu sinnerinut erniaqartinneqarlutik, suliniummut nassuiaammi allassimavoq, nangillunilu:

- Taarsigassarsiat taakku Illuup aningaasaqarnera tamaat eqqarsaatigalugu annertunavianngillat, kisianni piffissap ingerlanerani taarsigassarsiat pisariaqartinneqartut annertusiartornerani siunissami pisussanik tamakkiisumik oqaatiginnissinnaannginneq pissutigalugu, Royal Greenlandip ukiut pingasut tallimalluunniit iluanni piginneqataassutinik pisinissaa pitsaallunilu pisariaqartuuvoq. Illuummut pingaaruteqarpoq ukiumut taarsigassarsiat ukiut pingasut tallimalluunniit sinnerlugit sivisussuseqassanngitsut. Isumaqatigiissutigineqarpoq Royal Greenlandimut piginneqataassutinik tunniussinermut atatillugu 30 mio. kr.-it ukiumullu taarsigassarsiat Illuup tunniuttagai utertinneqarnissaat isumaqatigiissutigineqassasut.

Piginnittuunissamik isumaqatigiissut allamik pilersaarusiornissamik akimmiffiussoq

Royal Greenlandip attartornermut akiliut "tamakkiisumik" akilertarsinnaagaa, taamaalilluni inissiaatileqatigiiffiup suliffeqarfiup akiitsui akilertarlugit periarfissatut allatut pisinnaasoq aamma paasissutissiissutigineqarpoq. Tamannali piginnittuunissamik isumaqatigiissummit akimmiffilerneqarpoq.

Soraarnerussutisiaqalernissamut aningaasaateqarfiup SISA-p illunik piginneqatigiiffimmi piginneqataassutit 7,3 millionit koruuniusut 6 procentimik ernialersortarpai. Sanaartornermut 45 millionit koruuninik taarsigassarsiaq 6,5 procentimik erniaqarpoq.

Suliniut pillugu nassuiaat Naalakkersuisunut aningaasaqarnermut akileraartarnermullu ataatsimiititaliamut saqqummiunneqarmalli Niras Greenland A/S 2 procentinik piginneqataassuteqartoq piginneqataassutsini Permagreen A/S-imut tuneriarlugit inissiaatileqatigiiffimmit anivoq.

Illuummi pisortaq Torben Pauls ilisimatitsivoq Sikuki A/S attartortitsisunngorniarluni piginneqataassutit 2 procentii pisiarisinnaagai.

Aarlerinaatinik nalilersuineq

Suliniummut tunngatillugu nassuiaammi aarlerinartut nalilersorneqarput, "ilaat naaperiarneqarsinnaapput allallu akuerineqarsinnaallutik“. Sanaartornermi ajutoortoqassagaluarpat atugassamik "navianaatit tamaasa“ pillugit sillimmasiisoqassasoq paasissutissiissutigineqarpoq.

- Qeqertat A/S-ip navianarsinnaasut sanaartornermik arlaatigut akisunerulersitsisut amerlanersaat Royal Greenlandimit akilerneqassapput, tassami ineqarnermut akiliutit sanaartornerup nalinga tunngavigalugu naatsorsorneqartarput, ilisimatitsissutigineqarpoq.

Royal Greenland akiliisinnaajunnaassappat inissiaatileqatigiiffik allanik attartortitsisariaqalissaaq - immaqa ineqarnermut akiliut annikillisillugu.

- Pissutsilli inuiaqatigiinnut allanut sunniuteqarsinnaasut matumani pineqarput, paasissutissiissutigineqarpoq.

- Ataatsimut isigalugu aarlerinaataasinnaasut taakkuupput suliniummut akisunerulersitsisussat, taakkullu ineqarnermut akiliutip naatsorsorneqarneranut aallaaviussammata Illuummut iluanaarutissatut annertusaataassapput, naqissuserneqarpoq.