Royal Greenland tunisassiornermi pisortartaartoq
Tom Kaster Royal Greenlandimi tunisassiornermi pisortanngussaaq, Nuummi najugaqassallunilu juunip aallaqqaataani atorfinilissaaq.
Tom Kaster Royal Greenlandimi siornatigut aqutsisuni qitiusumik ilaasortaasimavoq. Kalaallit Nunaanni nunami tunisassiorneq ukiuni arlalinni siuttuuffigisimavaa.
Assi: Royal Greenland
Royal Greenland tunisassiornermi pisortamik nutaamik atorfinitsitsivoq.
Tom Kaster, ukioq manna juunip aallaqqaataani atorfinittussaq, Nuummi najugaqalissallunilu Royal Greenlandip illoqarfimmi qullersaqarfiani sulilissaaq.
Royal Greenland tusagassiutitigut nalunaarummi taama allappoq.
Tunisassiornermi pisortatut Royal Greenlandip nunami tunisassiorfiisa tunitsiviisalu Kalaallit Nunaanni nunanilu allani ingerlanneqarnerannut akisussaasuussaaq.
Ilisimaneqareersoq
Tom Kaster Royal Greenlandimi aqutsisunut qitiusumik siornatigut inissisimasimavoq. Kalaallit Nunaanni nunami tunisassiornermi ukiuni arlalinni siuttuusimavoq.
Tom Kaster taamaalilluni Royal Greenland naapertorlugu tunisassiorneq pillugu ilisimasaqarluarpoq.
Ukiualuit nunani tamalaani inuussutissalerinermi pisortaareerluni Royal Greenlandimut uterpoq. Suliffeqarfik naapertorlugu nunarsuaq tamakkerlugu pilersuinermik tunisassiornermillu aqutsinermik misilittagaqarpoq, tassanilu tunisassiorfeqarnermut, pisiortornermut, assartuinermut, pitsaassutsimut, sulisut atugarissaarnissaannut digitaliseerinermullu akisussaasimallunilu periusissiorneq aningaasaliinerillu pillugit suliaqarsimavoq.
Pisortaaneq: - Nuannaarpugut
Tom Royal Greenlandimut uteqqimmat nuannaarutigeqaarput. Suliffeqarfipput, sulisugut nunatsinnilu pissutsit nalunngilai.
- Tamatumalu saniatigut ingerlatseqatigiiffiup
ineriartortinneqarnerani iluaqutaasinnaasunik piffissami kingullermi misilittagaqarluarsimavoq.
- Suleqatigiinneq, ataqqinninneq nunamilu pissutsinik paasinnin-
nissaq aqqutigalugit angusaqarluartoqarsinnaalluni takutissimavaa, tamannalu uagutsinnut pingaaruteqarpoq, Royal Greenlandimi pisortaaneq Toke Binzer oqarpoq.
Lars Nielsen siorna februaarip naanerani soraarmalli Royal Greenland aalajangersimasumik tunisassiornermi pisortaqarsimanngilaq.
Eqqaaneqareersutut Tom Kaster tunisassiornermi pisortatut Royal Greenlandimi tamarmi tunisassiorfinnut nunamilu tunitsivinnut akisussaasuussaaq.
Inuussutissat isumannaatsuunissaat, pilersuinerup aalaakkaajuarnissaa ingerlatsinerullu pitsaasuunissaa anguniarneqarpoq.
- Royal Greenlandimut uterneq assut nuannaarutigeqaara. Suliffeqarfik nunatsinnut immikkut pingaaruteqarpoq,
suleqatigisimasakka, sulisut nutaallu suleqatigalugit tunisassiornerup nukittorsarnissaanut Kalaallit Nunaannullu
nunarsuarmilu tamarmi sullitatsinnut naleqarnerulersitsinissamut qilanaarpunga, Tom Kaster oqarpoq.
Tom Kasterip atorfinitsinneqarneratigut suliffeqarfissuarmi aqutsisoqatigiinni arfiniliusuni tallimat juunip aallaqqaataaniit Kalaallit Nunaanni najugaqartuulissapput.
