Sakkutooqarfiugallartussat marluk pilersinneqartut

Illersornissaqarfiup atortussaminik Kangerlussuarmi tallimanngornermi toqqorsivigisassaa sumiiffik sakkutuunut atorneqarallartussaq pilersinneqarpoq.

Kalaallit Nunaanni Politiit tusagassiorfinnut taama nalunaaruteqarput.

Tusagassiuutinut nalunaarummi allassimanngilaq atortorissaarutit suut pineqarnersut.

- Sumiiffik tamatigut nakkutigineqassaaq, susassaqanngitsuniillu pallinneqaqqusaassanani. Sumiiffimmi sillimaniarneq isumannaarneqarsimavoq, angallattunullu nalunaarsuutit aamma inissinneqarsimallutik, politiit allapput.

Kangerlussuarmi sakkutuut sumiiffissaat vagtskurip Jytte Hyttenip eqqaaniissaaq, Kangerlussuarmit 3,5 kilometerit missaanni ungasitsigisumiittumiittumi..

Nuummi umiarsuaq akunnittarfik ataasinngorpat taliffissami 55-imi inissinneqassaaq, taamaalillunilu aamma taanna sakkutuut sumiiffigisassatut atorallalissavaat.

Sumiiffinni taakkunani allagartalersuisoqarlunilu nakkutilliisoqassaaq.

Sapaatip-akunnerani kingullermi Nuummi sakkutooqarfiugallartoq ’Verdens Endep’ eqqaani atortussanik toqqorsivissaq aamma pilersinneqarpoq.

Kalaallit Nunaanni Politiit Issittumilu Sakkutooqarfik sakkutooqarfiugallartunik pilersitsineq pillugu oqaaseqarsinnaanngillat.